Բանականությո՞ւն, թե՞ զգացմունքներ․ ինչպես են ԿԵՆԴԱՆԱԿԵՐՊԻ նշանները կարևոր որոշումներ կայացնում

♈ Խոյ․ նախ գործում է, հետո մտածում

Խոյերը հաճախ պահի ազդեցության տակ են որոշումներ կայացնում։ Սկզբում անում են այն, ինչ ցանկանում են, և միայն հետո մտածում հետևանքների մասին։ Նրանց ներքին պայքարն էլ սովորաբար սկսվում է այն ժամանակ, երբ զգացմունքներն արդեն հաղթել են։

Բանականությունը հաճախ շատ ուշ է գործի դրվում, երբ կատարվածն այլևս հնարավոր չէ փոխել։ Բայց Խոյերը հազվադեպ են զղջում իրենց որոշումների համար։ Եթե ինչ-որ բան արել են սրտի թելադրանքով, ուրեմն համոզված են, որ այդպես էլ պետք է լիներ։ Կարևորը միայն այն է, որ հապճեպ չգործեն այնպիսի իրավիճակներում, երբ սխալը կարող է չափազանց թանկ արժենալ։

♉ Ցուլ․ բանականությունն է առաջնորդում, բայց զգացմունքներն ավելի խորն են, քան թվում է

Ցուլերը սիրում են կայունություն և սովորական կյանքի հարմարավետությունը։ Նրանք թույլ չեն տա, որ պահի զգացմունքները խախտեն իրենց կյանքի բնականոն ընթացքը։

Սակայն դա ամենևին չի նշանակում, թե Ցուլերը զգացմունքային չեն։ Պարզապես նրանք սովոր են ամեն ինչ սառը գլխով գնահատել և միայն դրանից հետո որոշում կայացնել։ Ցուլը կարող է երկար ժամանակ լռեցնել իր ներքին ձայնը, թաքցնել ապրումներն ու ձևացնել, թե ամեն ինչ կարգին է։ Բայց մի օր կուտակված զգացմունքներն անպայման դուրս կգան։

♊ Երկվորյակներ․ անվերջ պայքար սեփական մտքերի հետ

Երկվորյակները կարող են միաժամանակ և՛ կողմ լինել ինչ-որ որոշման, և՛ դեմ։ Նրանք արագ են մտածում, կարողանում են տրամաբանել, բայց միևնույն ժամանակ շատ զգացմունքային են։ Այսօր, նույնիսկ այս պահին, կարող են մի որոշում կայացնել, իսկ մեկ ժամ անց ամբողջությամբ փոխել իրենց կարծիքը։

Սրտի և բանականության պայքարը Երկվորյակների համար հազվադեպ պատահող երևույթ չէ։ Դա նրանց առօրյայի մի մասն է։ Երբեմն նրանք պարզապես չեն կարողանում վերջնական ընտրություն կատարել։ Բայց հենց այդ հակասական բնավորությունն էլ նրանց դարձնում է այդքան անմիջական ու անկեղծ։

♋ Խեցգետին․ սիրտն է որոշում ամեն ինչ, նույնիսկ երբ դա ցավ է պատճառում

Խեցգետիններն ավելի շատ վստահում են իրենց սրտին, քան բանականությանը։ Նրանք լավ զարգացած ինտուիցիա ունեն, ամեն ինչ խորն են զգում և հեշտությամբ են կապվում մարդկանց հետ։ Դրա պատճառով հաճախ խոցելի են դառնում, բայց միևնույն ժամանակ կարողանում են անկեղծ ու անմնացորդ սիրել։

Նույնիսկ երբ բանականությունը հուշում է, որ ժամանակն է հեռանալու, Խեցգետինը շարունակում է կառչած մնալ մարդուց կամ հարաբերություններից։ Նա մինչև վերջին պահը հույս ունի, որ ամեն ինչ կփոխվի։ Եվ հաճախ միայն հոգեկան ծանր ցավն է ստիպում նրան ընդունել իրականությունը։

♌ Առյուծ․ որոշումները կայացնում է սառը գլխով, բայց սրտում փոթորիկ է

Առյուծները կարողանում են զսպել իրենց զգացմունքները և ողջամիտ որոշումներ կայացնել, հատկապես երբ խոսքը վերաբերում է իրենց հեղինակությանը։ Նրանք չեն սիրում ցույց տալ, թե որքան ուժեղ կարող են ինչ-որ բան ապրել։

Բայց դա չի նշանակում, որ Առյուծները չեն տառապում։ Նրանց ներսում հաճախ իսկական պայքար է ընթանում, հատկապես երբ բախվում են սերն ու հպարտությունը։ Նման իրավիճակներում Առյուծը սովորաբար ընտրում է այն ճանապարհը, որն ամենաճիշտն է թվում շրջապատի աչքում։ Եվ ոչ ոք չի էլ կռահում, թե այդ պահին ինչ է կատարվում նրա սրտում։

♍ Կույս․ բանականությունը հաղթում է, իսկ զգացմունքները մնում են ստվերում

Կույսերը սիրում են ամեն ինչ մանրամասն վերլուծել։ Նախքան որոշում կայացնելը նրանք փորձում են հասկանալ իրավիճակը, կշռադատել բոլոր հնարավոր հետևանքները և միայն դրանից հետո գործել։ Զգացմունքներին էլ աշխատում են հնարավորինս քիչ տեղ տալ։

Սակայն դա չի նշանակում, թե Կույսերը ոչինչ չեն զգում։ Պարզապես նրանք սովոր են իրենց ապրումները պահել ներսում և թույլ չտալ, որ դրանք ազդեն որոշումների վրա։

Կույսերը հաճախ վախենում են սխալվելուց, դրա համար էլ ճնշում են սեփական զգացմունքները։ Իսկ անընդհատ ինքնատիրապետումը ժամանակի ընթացքում հոգնեցնում է նրանց։

♎ Կշեռք․ սիրտն ու բանականությունը հավասար ուժ ունեն

Կշեռքների համար որոշում կայացնելը հաճախ իսկական փորձություն է։ Նրանք միաժամանակ բազմաթիվ զգացմունքներ են ունենում, նկատում են ամենափոքր մանրուքներն ու կարողանում են իրավիճակին նայել տարբեր կողմերից։ Բացի այդ, չեն ցանկանում իրենց ընտրությամբ որևէ մեկին վիրավորել։

Բանականությունը մի բան է հուշում, սիրտը՝ մեկ այլ։ Կշեռքներն էլ շարունակ տատանվում են՝ հույս ունենալով, որ ժամանակն ամեն ինչ իր տեղը կդնի, և ճիշտ լուծումն ինքն իրեն կգտնվի։

Արդյունքում նրանց համար ամենադժվարը դառնում է հենց որոշում կայացնելը։

♏ Կարիճ․ զգացմունքներն են կառավարում, բայց ամեն ինչ տրամաբանության տեսք ունի

Առաջին հայացքից Կարիճը կարող է շատ սառնասիրտ ու հաշվենկատ թվալ։ Սակայն այդ հանգստության հետևում հաճախ ուժեղ զգացմունքներ են թաքնված։ Իր պահվածքով նա պարզապես փորձում է պաշտպանվել և ցույց չտալ, թե իրականում ինչ է զգում։

Կարիճը կարող է վստահ պնդել, որ ամեն քայլը նախապես մտածված է և հիմնված է սառը հաշվարկի վրա։ Բայց իրականում նրա որոշումների վրա հաճախ ազդում են սերը, վիրավորանքը կամ կիրքը։

Կարիճի ներսում կարող է իսկական պայքար ընթանալ, որը շրջապատի համար աննկատ կմնա։ Նա հազվադեպ է բացահայտում իր ապրումները և սովորաբար նախընտրում է ամեն ինչ հաղթահարել միայնակ։

♐ Աղեղնավոր․ սիրտն առաջ է սլանում, բանականությունը՝ հետևից

Աղեղնավորները սիրում են ապրել պահով և հավատալ, որ ամեն ինչ լավ է լինելու։ Նրանք հեշտությամբ են տրվում ոգևորությանը, հետևում իրենց ցանկություններին և հաճախ գործում առանց երկար մտածելու։

Իհարկե, Աղեղնավորները նույնպես կարողանում են տրամաբանորեն դատել։ Պարզապես որոշումներ կայացնելիս բանականությունը նրանց համար սովորաբար երկրորդ պլանում է մնում։

Միայն իրենց քայլերի հետևանքներին բախվելուց հետո են նրանք սկսում մտածել՝ գուցե արժե՞ր մի փոքր ավելի զգույշ լինել։ Բայց նույնիսկ այդ դեպքում Աղեղնավորը, ամենայն հավանականությամբ, կրկին կընտրի ազատությունը, ոչ թե զգուշավորությունը։

♑ Այծեղջյուր․ բանականությունն առաջին տեղում է, զգացմունքները՝ երկրորդ

Այծեղջյուրները ոչ միայն մտածում են իրենց անելիքների մասին, այլև փորձում են ամեն քայլը նախապես ծրագրել։ Նրանք հստակ նպատակներ ունեն և չեն սիրում, երբ զգացմունքները խանգարում են իրենց ծրագրերին։ Այդ պատճառով էլ հաճախ մի կողմ են դնում անձնական ապրումներն ու կենտրոնանում այն ամենի վրա, ինչն անհրաժեշտ են համարում։

Այծեղջյուրը կարող է շատ ծանր որոշում կայացնել՝ համոզված լինելով, որ դա միակ ճիշտ ճանապարհն է։ Նույնիսկ եթե այդ ընտրությունը հոգու խորքում մեծ ցավ է պատճառում նրան։

Նրա ամենամեծ ներքին հակասությունն էլ հենց այստեղ է։ Հանուն նպատակի նա կարող է երկար ժամանակ անտեսել սեփական զգացմունքները, իսկ երբ վերջապես հասնի ցանկալի արդյունքին, հանկարծ դատարկություն զգա։

♒ Ջրհոս․ բանականությունն է առաջնորդում, բայց սիրտը կարող է զարմացնել

Ջրհոսները սիրում են տրամաբանել և հաճախ մտածում են բոլորովին այլ կերպ, քան շրջապատողները։ Նրանք կարողանում են անսովոր լուծումներ գտնել և երբեմն այնպիսի բաներ նկատել, որոնք ուրիշների մտքով անգամ չեն անցնում։

Արտաքուստ Ջրհոսները կարող են սառն ու զգացմունքներից հեռու թվալ։ Բայց երբ սիրտն իսկապես սկսում է թելադրել իր ցանկությունները, նրանց պահվածքը կարող է անճանաչելիորեն փոխվել։ Նրանք կարող են տարիներ շարունակ առաջնորդվել միայն բանականությամբ, իսկ հետո հանկարծ սիրահարվել և հանուն այդ սիրո ամբողջությամբ փոխել իրենց սովորական կյանքը։

♓ Ձկներ․ ապրում են սրտով՝ հաճախ անտեսելով բանականությունը

Ձկները համարվում են կենդանակերպի ամենազգայուն և ուժեղ ինտուիցիա ունեցող նշաններից մեկը։ Նրանց գրավում են նաև խորհրդավոր ու առեղծվածային երևույթները։ Ձկների համար սրտի ձայնը գրեթե միշտ ավելի կարևոր է, քան բանականության հուշումները։

Նրանք կարող են հանուն ուրիշների զոհաբերել սեփական ցանկություններն ու շահերը, իդեալականացնել մարդկանց և աչք փակել նույնիսկ ամենաակնհայտ փաստերի վրա։ Իսկ երբ ամեն ինչ փլուզվում է, միայն այդ ժամանակ են սկսում սթափ գնահատել իրավիճակը։

Ձկների համար հատկապես դժվար է ընդունել այն իրականությունը, որը հակասում է իրենց զգացմունքներին։