Ինչու չեք կարողանում հանգստանալ տանը. ինչպես է վիզուալ աղմուկը խլում մեր էներգիան

Պատրաստել եք երիցուկի թեյ, վառել եք բուրավետ մոմը և հարմար տեղավորվել բազմոցին։ Բայց հանգստանալու փոխարեն ներսում լարվածություն կա։ Ծանո՞թ է։ Պատճառը միշտ չէ, որ նյարդերն են։ Երբեմն խնդիրը շատ ավելի պարզ է. մեր աչքի առաջ պարզապես չափազանց շատ բան կա։

Ի՞նչ է վիզուալ աղմուկը

Պատկերացրեք, որ մեր հայացքը շատ զգայուն միկրոֆոն է։ Հանգիստ ու ներդաշնակ տանը այն «որսում է» հաճելի մանրուքները՝ փայտի հյուսվածքը, մեղմ լույսը, փափուկ ծածկոցը։

Բայց երբ այդ միկրոֆոնի վրա միաժամանակ շատ ձայներ են լցվում, առաջանում է աղմուկ։

Վիզուալ աղմուկը հենց դա է՝ սառնարանի վրայի 37 մագնիսները, բարձերի վրա միանգամից հինգ տարբեր նախշերը, սեղանի տակ խճճված լարերը, հարդարման սեղանին շարված օծանելիքի դատարկ շշիկները։

Ուղեղը չի հասցնում առանձնացնել կարևորը երկրորդականից և անընդհատ փորձում է հասկանալ՝ ինչի՞ վրա կենտրոնանալ։ Արդյունքում այն հոգնում է այնպես, կարծես յոթ ժամ անցկացրել եք աղմկոտ արտադրամասում։

Դրա համար էլ երբեմն տանը կարծես լռություն կա, բայց իրական հանգիստ՝ չկա։

Մեր ինտերիերում էներգիա խլող 3 գլխավոր «գողերը»

1. Տարբեր նախշեր

Ռոմբերով գորգ, կետիկներով վարագույրներ, գծավոր բազմոց։ Սա արդեն ոչ թե ոճ է, այլ նախշերի կռիվ։

Աչքը չի հասկանում՝ ինչին նայի, և սկսում է անհանգիստ «վազել» մի կետից մյուսը։ Իսկ էներգիան ծախսվում է նրա վրա, որ ուղեղը փորձի այդ ամենից մեկ ամբողջական պատկեր ստանալ։

2. Բաց պահեստավորման համակարգեր

Դռնակներ չունեցող դարակաշար, որտեղ կողք կողքի փոշոտվում են հին սկավառակները, դահուկային գլխարկը և փոշեկուլը։ Սա վիզուալ անկարգություն է՝ ուղիղ աչքի առաջ։

Եվ ամեն անգամ ուղեղը կարծես սայթաքում է այդ խառնաշփոթի վրա, նույնիսկ եթե դուք ուղիղ այդ կողմը չեք նայում։ Ծայրամասային տեսողությունը, միևնույն է, ամեն ինչ նկատում է։

3. Չավարտված գործերի հիշեցումներ

Կոտրված աթոռ, որը ափսոս է դեն նետել։ Հայելու վրա կպցրած թուղթ՝ «Լվանալ պատուհանները» գրությամբ։ Դատարկ ակվարիում։

Այսպիսի ամեն առարկա չավարտված գործի հիշեցում է։ Դրանք նման են ծորակից անդադար կաթացող ջրին. քիչ-քիչ, բայց անընդհատ սպառում են մեր ներքին ռեսուրսը։

Ինչպես ազատվել տան վիզուալ աղմուկից

Կանոն №1. 80/20

Մակերեսների 80%-ը պետք է տեսողականորեն հանգիստ լինի՝ միագույն, պաստելային, փայտի կամ բետոնի բնական երանգներով։

Իսկ մնացած 20%-ը կարող է լինել վառ շեշտադրում՝ մեկ-երկու նկար, մեկ ակնառու բազկաթոռ գեղեցիկ նախշով։

Փորձեք սենյակում թողնել միայն մեկ կամ երկու արտահայտիչ նախշ, իսկ մնացածը դարձնել ավելի հանգիստ։ Շատ հնարավոր է՝ արդեն նույն օրը զգաք, որ տանը շնչելն ավելի հեշտ է դարձել։

Կանոն №2. Քաոսի համար «կույր գոտիներ» ստեղծեք

Գնեք փակ տուփեր ու զամբյուղներ։ Որակյալները։ Թող դրանք լինեն կրաֆտից կամ ռոտանգից։

Դա կօգնի ոչ միայն աչքերին, այլև հոգեկան հանգստությանը։

Հատկապես ննջասենյակում տեսողական խաղաղություն է պետք։ Այնտեղ աչքի առաջ չպետք է մնա որևէ բան, որը կապ չունի քնի հետ։ Ոչ հաշիվներ, ոչ փաստաթղթեր, ոչ նոթբուք, ոչ լիցքավորիչներ։ Լարերին՝ ոչ։

Կանոն №3. Վերանայեք տան յուրաքանչյուր անկյունը

Վերցրեք հեռախոսը կամ լուսախցիկը և շրջեք տնով։ Լուսանկարեք անկյունները։

Նկարում վիզուալ աղմուկը շատ ավելի պարզ է երևում, քան իրականում՝ աչքով նայելիս։ Հաճախ ներդաշնակ պատկերը ստացվում է ոչ թե ինչ-որ բան ավելացնելու, այլ ավելորդը հեռացնելու շնորհիվ։

Սա մինիմալիզմի և ճաշակի պարզ սկզբունքներից է. մեկ մտածված դետալը միշտ ավելի գեղեցիկ է նայվում, քան երեք պատահական բան։

Վերջաբան

Տունը պետք է տեղ թողնի մեր մտքերի համար, ոչ թե լցնի դրանք իր գրգռիչներով։

Անջատեք վիզուալ աղմուկը, և ձեր նյարդային համակարգը շնորհակալ կլինի։

P.S. Եթե այս հոդվածը կարդալուց հետո ցանկացաք մեղմացնել լույսը և հեռախոսը հեռացնել մահճակալի կողքի պահարանից, ուրեմն ամեն ինչ ճիշտ եք հասկացել։