Մարդու խելքի մասին միշտ չէ, որ կարելի է դատել նրա կրթությամբ, գիտելիքներով կամ բարդ թեմաներից խոսելու ունակությամբ։ Երբեմն շատ ավելի խոսուն են առօրյա սովորությունները։ Հենց այդ սովորություններն էլ հաճախ մատնում են սահմանափակ մտածողությամբ կնոջը: Ինչպե՞ս է նա վերաբերվում շրջապատին, ինչպե՞ս է իրեն պահում տհաճ իրավիճակներում, կարողանո՞ւմ է ընդունել սեփական սխալները։ Հենց առօրյա կյանքում են բացահայտվում բնավորության այն գծերը, որոնք գեղեցիկ խոսքերով երկար թաքցնել հնարավոր չէ։
Իհարկե, մեկ սովորության հիման վրա չի կարելի եզրակացնել, թե որքան խելացի է մարդը։ Բայց կան վարքագծի դրսևորումներ, որոնք հուշում են, որ նա առանձնապես չի ցանկանում մտածել, նոր բաներ սովորել կամ իրերին նայել այլ տեսանկյունից։
1. Մարդկանց գնահատում է արտաքինով ու սոցիալական դիրքով
Նման կնոջ համար մարդու մասին կարծիք կազմելու գլխավոր չափանիշները նրա հագուստն են, հեռախոսի ապրանքանիշը, բնակության վայրը կամ մեքենայի արժեքը։ Նա կարող է մեկին անհաջողակ համարել միայն այն պատճառով, որ համեստ է հագնված, իսկ մյուսով հիանալ պարզապես այն բանի համար, որ վերջինս ցուցադրում է իր հարստությունը։ Եվ բոլորովին կարևոր չէ, թե իրականում ինչ մարդ է կանգնած այդ արտաքին փայլի հետևում։
Խնդիրն այն չէ, որ մարդը նկատում է սոցիալական տարբերությունները կամ սիրում է գեղեցիկ հագուստ։
Խնդիրն այն է, երբ նա չի կարողանում արտաքին տպավորությունը տարբերել մարդու իրական արժանիքներից։
2. Երբեք չի ընդունում իր սխալները
Սա հատկապես լավ է երևում առօրյա մանրուքներում։ Մոռացե՞լ է պայմանավորվածության մասին, սխա՞լ է հասկացել հաղորդագրությունը, վնասե՞լ է ուրիշի իրը։ Մեղավոր կարող են լինել հանգամանքները, ամուսինը, գործընկերները կամ ցանկացած ուրիշ մեկը, միայն թե ոչ ինքը։
Նրա համար սեփական սխալն ընդունելը նույնն է, ինչ վեճում պարտվելը։ Այդ պատճառով էլ սկսում է արդարանալ, հիշեցնում է դիմացինի թերությունները կամ պարզապես ձևացնում, թե ոչինչ չի պատահել։
Մինչդեռ «ես սխալվել եմ» ասելը ամենևին էլ թուլություն չէ։ Ընդհակառակը, դա ցույց է տալիս, որ մարդը կարողանում է վերանայել իր որոշումները և դասեր քաղել անցածից։
3. Կոպտում է նրանց, ովքեր չեն կարող իրեն հակադարձել
Ուշադրություն դարձրեք, թե ինչպես է կինը խոսում մատուցողների, վաճառողների, առաքիչների, հավաքարարների կամ տարեց մարդկանց հետ։ Եթե նրանց հետ, ումից որևէ հարցում կախված է, ընդգծված սիրալիր է, իսկ նրանց, ում իրենից ցածր է համարում, թույլ է տալիս վիրավորել ու նվաստացնել, դա արդեն շատ բան է ասում նրա մասին։
Մարդկանց հետ շփվել կարողանալը միայն գեղեցիկ խոսքեր ընտրելը չէ։ Պետք է նաև հասկանալ, որ հարգանքի արժանի են բոլորը՝ անկախ պաշտոնից, եկամուտից կամ այն բանից, թե ինչ օգուտ կարող են տալ քեզ։
4. Բամբասանքներին հավատում է առանց ստուգելու
Նման կնոջ համար ուրիշներից լսած ցանկացած պատմություն շատ արագ դառնում է հաստատված փաստ։ Ինչ-որ մեկը մի բան է ասել, ծանոթներից մեկը ինչ-որ բան է տեսել, ընդհանուր չաթում մի հաղորդագրություն է հայտնվել, և վերջ՝ նա արդեն հստակ կարծիք ունի մի մարդու մասին, որին նույնիսկ կարգին չի ճանաչում։
Տեղեկության աղբյուրը ստուգելը, մտածելը, որ գուցե ամեն ինչ այլ կերպ է եղել, կամ պարզապես ընդունելը, որ ամբողջ պատմությանը ծանոթ չէ, նրան ավելորդ է թվում։
Բայց փաստերը բամբասանքներից տարբերելը կարևոր է ոչ միայն քաղաքականության կամ գիտության մեջ։ Առօրյա կյանքում էլ դա անհրաժեշտ է, որպեսզի ուրիշների տարածած անհիմն լուրերի պատճառով չփչացնենք մեր հարաբերությունները։
5. Չի կարողանում լսել դիմացինին
Զրույցի ընթացքում նման կինը շարունակ ընդհատում է խոսակցին, ամեն թեմա կապում իր հետ և դեռ դիմացինի խոսքը չավարտված՝ մտքում պատրաստում իր պատասխանը։ Ուրիշի պատմությունը նրան հիմնականում հետաքրքրում է այնքանով, որքանով հնարավորություն է տալիս մի բան էլ իր մասին պատմել։
Ընդ որում, նա կարող է իրեն հրաշալի զրուցակից համարել։ Չէ՞ որ աշխույժ է, զգացմունքային, միշտ ասելիք ունի և երբեք չի լռում։
Սակայն զրույցը մրցույթ չէ, որտեղ պետք է հնարավորինս շատ ուշադրություն գրավել։ Լսել կարողանալը նշանակում է նաև փորձել հասկանալ դիմացինի տեսակետը, հարցեր տալ և ընդունել, որ ուրիշը կարող է իմանալ մի բան, որը դու չգիտես։
6. Մանր խաբեությունները խելացիություն է համարում
Խաբել վաճառողին, չվերադարձնել պարտքով վերցրած փոքր գումարը, օգտվել ուրիշի վստահությունից կամ սեփական գործը մեկ ուրիշի վրա բարդել։ Նման կինը կարող է այս ամենը փոքրիկ հաղթանակ համարել և նույնիսկ հպարտանալ իր «ճարպկությամբ»։
«Բոլորն էլ այդպես են անում», «կարևորը հիմար չլինելն է», «ով հասցրեց, նա էլ շահեց»։ Այսպիսի արտահայտություններով կարելի է արդարացնել գրեթե ցանկացած արարք։
Բայց ամեն գնով սեփական օգուտը ստանալը դեռ խելացիության նշան չէ։ Երբեմն դա պարզապես ցույց է տալիս, որ մարդը չի մտածում իր արարքների հետագա հետևանքների մասին և առանձնապես չի գնահատում ուրիշների վստահությունը։
7. Համոզված է, որ այլևս սովորելու ոչինչ չունի
Սա թերևս ամենախոսուն սովորություններից մեկն է։ Նման կինը կտրականապես մերժում է այն ամենը, ինչը չի համապատասխանում իր համոզմունքներին։ Նոր տեխնոլոգիաները նրան անհեթեթություն են թվում, ուրիշների կարծիքները՝ հիմարություն, իսկ ցանկացած դիտողություն ընդունում է որպես անձնական վիրավորանք։
Մարդը կարող է կյանքի հարուստ փորձ ունենալ, բայց դա դեռ չի նշանակում, որ իմաստուն է։ Կարևորն այն է, թե ինչ է նա սովորել այդ փորձից։ Կարողանո՞ւմ է տեսնել սեփական սխալները, հասկանալ, թե որտեղ է մոլորվել, և փոխել կարծիքը, երբ իրեն համոզիչ փաստեր են ներկայացնում։
Խելքը միայն նրանով չի չափվում, թե մարդն ինչքան բան գիտի։ Կարևոր է նաև, թե ինչպես է վերաբերվում այն ամենին, ինչ դեռ չգիտի։
Վերջաբանի փոխարեն
Առօրյա սովորություններն իսկապես շատ բան են պատմում մարդու մասին։ Բայց սխալ կլինի դրանց հիման վրա որոշել՝ մարդը խելացի՞ է, թե՞ ոչ։ Բոլորս էլ երբեմն կարող ենք կոպիտ պատասխանել, բամբասել, չլսել դիմացինին կամ քննադատությանը վատ արձագանքել։
Շատ ավելի կարևոր է, թե նման պահվածքը որքան հաճախ է կրկնվում։ Մարդը նկատո՞ւմ է իր սխալները, հարգո՞ւմ է ուրիշներին, երբեմն կասկածի տակ դնո՞ւմ է սեփական եզրակացությունները, կարողանո՞ւմ է դասեր քաղել իր փորձից։
Եվ, թերևս, սահմանափակ մտածողության ամենավստահելի նշանը ոչ թե ինչ-որ բան չիմանալն է, այլ այն համոզմունքը, թե դու արդեն ամեն ինչ բավականաչափ լավ գիտես և սեփական պատկերացումներդ վերանայելու կարիք չունես։
Գրանցվիր մեր 
