Թեև ոչ բոլոր տղամարդիկ են թունավոր (տոքսիկ) կամ կնատյաց, շատ կանանց համար սեփական անվտանգությունն ու հոգեկան անդորրը պաշտպանելն ավելի հեշտ է՝ կասկածանքով վերաբերվելով «բոլոր» տղամարդկանց և վստահությունը զրոյից կառուցելով, գրում է Your Tango պարբերականը։
Չմոռանաք բաժանորդագրվել մեր Telegram ալիքին:
Տղամարդկանց չհարգող կանայք հաճախ են օգտագործում որոշակի արտահայտություններ։ Թեև դրանց կիրառումը հարաբերություններում կարող է վիրավորանքի և լարվածության պատճառ դառնալ, իրականում դա ընդամենը ինքնապաշտպանական մեխանիզմ է:
Ընդ որում, ինչպես նշում է պարբերականը, այդ կանայք չեն հրաժարվում տղամարդկանց հետ հարաբերություններ ստեղծելուց կամ նրանց վստահելուց ու հարգելուց։ Սակայն նրանց անհրաժեշտ են հավաստիացումներ և ապացույցներ, որպեսզի համոզվեն, որ հասարակության ու այլ տոքսիկ տղամարդկանց կողմից իրենց ենթագիտակցության մեջ արմատավորված մտահոգություններն այլևս արդիական չեն:
Պարբերականը նշում է, որ նման կանայք հաճախ օգտագործում են հետևյալ 10 արտահայտությունները.
1. «Դու միշտ ամեն ինչ փչացնում ես»
Ներողամտություն դրսևորելու, սեփական մտահոգությունները կիսելու և հարաբերություններում հստակ սահմաններ ու չափանիշներ դնելու փոխարեն՝ տղամարդկանց չհարգող կանայք հակված են հենց այս արտահայտությամբ ի ցույց դնել իրենց հիասթափությունը։
Բնականաբար, կանայք պարտավոր չեն դառնալ իրենց զուգընկերների «ծնողը», բայց երբեմն անկեղծ զրույցներն ու որոշակի ներողամտությունն անհրաժեշտ են, որպեսզի տղամարդիկ կարողանան զարգացնել այն հմտությունները, որոնք դեռ չեն հասցրել ձևավորել։
2. «Երևի հաճելի է չանհանգստանալ դրա համար»
Պարբերականը նշում է, որ նույնիսկ եթե տղամարդիկ հաղթահարում են այն սոցիալական կարծրատիպերը, որոնք ստիպում են իրենց փակվել և խուսափել խոցելի լինելուց, նրանք միևնույն է բախվում են ներքին արգելքների, որոնք խանգարում են լիովին բաց և անկեղծանալուն։
Ուստի, նույնիսկ եթե թվում է, թե նրանք բավարար ջանք չեն գործադրում կամ չեն արդարացնում սպասելիքները, իրականում տղամարդիկ կարող են պայքարել շատ ավելի մեծ դժվարությունների դեմ, քան տեսնում են նրանց զուգընկերուհիները:
3. «Դու երբեմն այնքան անուշադիր ես»
Հաշվի առնելով այն հանգամանքը, որ կանայք սովորաբար հարաբերություններում զգացմունքային աջակցություն և ներդաշնակություն են փնտրում, զարմանալի չէ, որ նրանք կարող են արհամարհանքով լցվել այն զուգընկերոջ հանդեպ, որը խուսափում է իր հույզերը ցույց տալուց կամ մնում է զգացմունքապես սառը։
Թեև առօրյա խոսակցություններում սա կարող է անվնաս թվալ, Journal of Experimental Social Psychology ամսագրում հրապարակված հետազոտությունը ցույց է տվել, որ անհարգալից վերաբերմունքը կարող է լուրջ անձնական և սոցիալական հետևանքների հանգեցնել:
4. «Ես ինքս դա կանեմ»
Շատ մարդիկ, ովքեր հասուն տարիքում դառնում են չափազանց անկախ, հաճախ փորձում են հաղթահարել մանկության տարիներին չբավարարված կարիքների կամ վերահսկողության բացակայության հետևանքով առաջացած և դեռևս չլուծված հոգեբանական տրավմաները։
Հոդվածում նշվում է, որ այս արտահայտությունն օգտագործող կանայք ներքին մղում ունեն՝ պահպանելու սեփական կյանքի վերահսկողությունը, քանի որ խոցելիությունն ու աջակցություն ստանալը կապում են վախի հետ: Նրանք չեն ցանկանում իրենց «ուժը» զիջել մեկ ուրիշին՝ անգամ եթե դա նրանց զրկում է առողջ հարաբերություններից և հոգեկան լիակատար ապաքինումից:
5. «Ամեն ինչ կարգին է»
Կանայք և տղամարդիկ տարբեր կերպ են արտահայտում իրենց էմոցիաները: Բոլորն էլ զգում են նույն հույզերը՝ սկսած կորովից մինչև ոգևորություն, բայց արտահայտում են դրանք սոցիալական նորմերի և անձնական փորձի պրիզմայով:
Սակայն տղամարդկանց չհարգող կանայք իրենց ապահով չեն զգում զգացմունքներն անկեղծորեն արտահայտելիս: Արդյունքում՝ նրանք կորցնում են բաց հաղորդակցության և աջակցության հնարավորությունը, ինչն իսկապես առողջ ու հավասարակշռված հարաբերությունների գրավականն է:
Կարդացեք նաև՝ Հոգեբանի կարծիքով՝ տղամարդկանց 100 գլխավոր «կարմիր դրոշակները»
6. «Քեզ պետք է հասունանալ»
Ըստ Frontiers in Physiology հանդեսի հետազոտության՝ ճիշտ է, որ տղամարդիկ հաճախ էմոցիոնալ առումով ավելի ուշ են հասունանում, քան կանայք, սակայն որոշ կանայք, ովքեր ներքուստ չեն հարգում տղամարդկանց, կառչում են այս փաստից՝ նրանց անընդհատ մանիպուլյացիայի ենթարկելու համար:
Պարբերականի համաձայն՝ տղամարդիկ հաճախ կանանց հետ հարաբերությունների կարիք ունեն հենց այն պատճառով, որ կանայք ապահով միջավայր են ստեղծում իրենց խոցելիությունն ու զգացմունքներն արտահայտելու համար, ինչը նրանք չեն ստանում այլ տեղերում:
Բայց առանց ապահով տարածքի, որտեղ կարելի է սխալվել ու սովորել արտահայտվել առանց դատապարտվելու, առաջանում է լուրջ լարվածություն, անհարգալից վերաբերմունք և վիրավորանք:
7. «Դու այնքան անկարող ես»
Հոգեբան Շոնա Սփրինգերի խոսքով՝ ամուսնությունների մեծ մասը քանդվում է հարգանքի բացակայության պատճառով: Թեև յուրաքանչյուր մարդ ունի արժանապատվության, իրեն ապահով և գնահատված զգալու կարիք, տղամարդկանց համար դա առանձնահատուկ կարևորություն ունի: Մինչդեռ կանայք, որպես կանոն, ավելի շատ գնահատում են զգացմունքային մտերմությունն ու դրանից ծնվող սերը:
8. «Դա մեծ նշանակություն չունի»
Համաձայն UCLA Health-ի հրապարակած հետազոտության՝ երբ զուգընկերները սթրեսի մեջ չեն գտնվում, նրանք սովորաբար միմյանց հավասարապես էմոցիոնալ աջակցություն են ցուցաբերում՝ անկախ սեռից:
Սակայն, երբ սթրեսի մակարդակը բարձրանում է, կանայք հակված են ավելի մեծ աջակցություն ցուցաբերել, քան իրենց զուգընկերները:
9. «Ուշադրություն մի դարձրեք նրան»
Անհարգալից վերաբերմունքը յուրաքանչյուրի մոտ յուրովի է դրսևորվում, սակայն կանանց պարագայում դա հաճախ կարող է արտահայտվել դիմացինի զգացմունքների ակտիվ անտեսմամբ կամ խոսակցություններում նրա դերի արժեզրկմամբ:
Տղամարդկանց չհարգող կանայք կարող են ընկերների ներկայությամբ նվաստացնել նրանց կամ ընդհատել խոսքը՝ ասելով՝ «ուշադրություն մի դարձրեք նրան», երբ վերջինս փորձում է արտահայտվել:
10. «Դուք բոլորդ նույնն եք»
Ճիշտ է, որ շատ կանայք ժամանակակից աշխարհում իրենց ավելի ապահով են զգում այս մոտեցումն որդեգրելով՝ անձնական չարաշահումներից, անհարգալից վերաբերմունքից կամ ցավից խուսափելու համար: Սակայն նման լայն ընդհանրացումները հաճախ կարող են ստիպել տղամարդկանց իրենց արժեզրկված ու անտեսված զգալ:
Ինչպես յուրաքանչյուր կին առանձնահատուկ է, այնպես էլ տղամարդիկ: Այո, կարծրատիպերն ու սոցիալական պիտակները գոյություն ունեն, բայց մարդիկ նաև ճկուն են և պատրաստ են փոխվել, եթե զգան աջակցություն և արժանապատիվ վերաբերմունք:
Գրանցվիր մեր 
