Սանկտ Պետերբուրգից լուսանկարիչ Եգոր Ցվետկովը որոշում է փորձարկել բոլորին հասանելի ծրագրերի և հավելվածների զարմանալի հնարավորությունները։ Փորձարկան արդյունքը այնքան ցնցող էր, որ նա որոշում է դրանով կիսվել «YOUR FACE IS A BIG DATA» ֆոտոնախագծում։

Նա իր այդ փորձով ցույց տվեց, թե իրականում որքան բաց են և հասանելի մեր անձնական տվյալները, որոնք մենք ինքներս առանց երկար մտածելու տեղադրում ենք սոցիալական ցանցերում։ Բացի դրանից նա ցույց տվեց, որ ի շնորհիվ ժամանակակից ծառայությունների, այսօր, բառացիորեն մի քանի վայրկյանում կարելի է տեղեկություններ իմանալ փողոցում հանդիպած գրեթե յուրաքանչյուր մարդու մասին, եթե նա գրանցված է սոցիալական ցանցում։

Չե՞ք հավատում, ահա ապացույցը՝ պատահական մարդկանց լուսանկարները մետրոյում և հեղինակի կողմից գտնված նրանց սոցիալական ցանցերի լուսանկարները։

Նախագծի նկարագրում լուսանկարիչը գրել է. «Պարզ ծրագրերի օգնությամբ ես գտնում էի մարդկանց, ովքեր նստած էին մետրոյի վագոնում ուղիղ իմ դիմաց։ Ես իմանում էի մարդու կյանքի մասին, առանց նրա հետ շփվելու»։

Որոնման համար Եգորը օգտագործում էր բոլորին հասանելի FindFace հավելվածը, որը թույլ է տալիս նույնականացնել մարդուն ըստ լուսանկարի և դրա հիման վրա ստանալ սոցիալական ցանցերում նրանց բաց պրոֆիլների հղումները։