Մոխրագույնը հաճախ ընկալվում է որպես չեզոք և «անտեսանելի» գույն։ Բայց այդպիսի ընկալումը շատ մակերեսային է։ Նրանք, ովքեր գիտակցաբար ընտրում են մոխրագույն հագուստ կամ աքսեսուարներ, հազվադեպ են դա անում պատահականորեն։ Այս գունաշարի հանգստությունը և զսպվածությունը գրեթե միշտ թաքցնում են ներքին կայունություն, հավասարակշռության կարիք և նուրբ տակտի զգացում։

Չմոռանաք բաժանորդագրվել մեր Telegram ալիքին:

Սերը մոխրագույնի հանդեպ երբեք միապաղաղության մասին չէ։ Դա կարողություն է լինել կենտրոնում՝ առանց աղմուկի, պահպանել հեռավորություն՝ առանց օտարացման, և ունենալ էլեգանտ տեսք՝ անկախ նորաձևության միտումներից։ Այն սազում է նրան, ով կարիք չունի անընդհատ ընդգծելու իր անհատականությունը, քանի որ այն արդեն զգացվում է։

Փորձենք հասկանալ՝ ինչ իմաստներ է պարունակում մոխրագույնը, ինչու է այն այդքան արդյունավետ գործում հագուստում և միջավայրում, և ինչ է այն ասում մարդու մասին, ով նորից ու նորից ընտրում է այն։

Մոխրագույնը հագուստում․ ոճ՝ ժամանակից դուրս

Ի տարբերություն «անտեսանելիության» մասին տարածված միֆի, մոխրագույնը հագուստում ամենաունիվերսալ և նրբաճաշակ գույներից մեկն է։ Այն չի պահանջում պայծառություն, որովհետև ինքն է թելադրում տոնը՝ հանդարտ, հասուն, ինքնավստահ։ Առավել նրբագեղ է, երբ առկա է կտորի գործվածքում՝ կաշմիր, տվիդ, խիտ բամբակ, փափուկ բուրդ։

Այն հրաշալի է պահպանում ձևը։ Ուստի մոխրագույնը իդեալական է նրանց համար, ովքեր գնահատում են կայունությունը և կարիք չունեն արտաքին հաստատման՝ իրենց կարևորության վերաբերյալ։ Մոխրագույնը հիանալի հիմք է՝ ամբողջական կերպարների, կոստյումների, վերարկուների, աքսեսուարների համար։ Այն հեշտությամբ համադրվում է սպիտակի, շոկոլադագույնի, գինեգույնի հետ, իսկ կապույտի հետ ստեղծում է իդեալական զույգ գրասենյակային ոճում։

Ի՞նչ է ասում մարդու մասին սերը մոխրագույնի հանդեպ

Հատ ու կեն մոխրագույն իրերը զգեստապահարանում դեռևս սեր չէ։ Բայց եթե այդ երանգը գերակշռում է, ապա ահա թե ինչ է դա նշանակում։

1. Ձեր ներքին ֆիլտրը հիանալի է աշխատում․ Դուք չեք վատնում էներգիա անկարևորի վրա և չունեք արտաքին աղմուկ ստեղծելու կարիք։ Ձեզ համար հագուստը ոչ թե ինքնահաստատման միջոց է, այլ ներքին վիճակի շարունակություն։
2. Ձեզ համար կարևոր է զգալ սահմանները․ Մոխրագույնը օգնում է պահպանել հեռավորություն՝ առանց վանելու։ Դուք կարողանում եք լինել երկխոսության մեջ՝ առանց դրանում լուծվելու։
3. Դուք ինտուիտիվ ընտրում եք կայունություն․ Դա արտահայտվում է պարզ ձևերի, որակյալ կտորների և ունիվերսալ լուծումների միջոցով։ Մոխրագույնը՝ տեսողական համարժեքն է վստահ «ես կհաղթահարեմ» մտքին։
4. Ձեր էմոցիաներն ավելի խորն են, քան թվում է․ Մոխրագույնը հաճախ ընտրում են նրանք, ովքեր շատ բան են զգում, բայց չեն ցուցադրում։ Դա փակվածություն չէ, այլ գիտակցված ընտրողականություն։
5. Դուք լավ ճաշակ ունեք․ Մոխրագույնը նորաձև չէ, այլ՝ ոճային։ Այն պահանջում է ավելի խորը ըմբռնում ձևերի և նյութերի ընտրության հարցում, բայց միշտ ունի ինտելիգենտ տեսք։

Մոխրագույնի հոգեբանությունը հագուստում

• Այն մեղմացնում է ավելորդ լարվածությունը։ Մոխրագույնը կարծես մարում է աղմուկը, օգնում կենտրոնանալ և չծախսվել զգացմունքային առումով։ Ահա թե ինչու այն այդքան հաճախ կրում են փոփոխությունների, վերաիմաստավորման կամ հոգնածության ժամանակահատվածներում։
• Այն՝ ներքին ուժի մասին է, առանց ճնշման։ Դրանում չկա աղմկոտ ցուցադրականություն։ Մոխրագույն հագուստով մարդը ուշադրություն չի պահանջում, բայց երբ խոսում է՝ նրան լսում են։ Դա վստահ, բայց ոչ ագրեսիվ մարդկանց գույնն է։
• Այն ասում է՝ «ես ընթացքի մեջ եմ»։ Ոչ սպիտակ, երբ ամեն բան սկսվում է, ոչ էլ սև՝ երբ ամեն ինչ արդեն որոշված է։ Մոխրագույնը՝ շարժման, անցման, մտորումների գույնն է։
• Այն ստեղծում է վստահության զգացում։ Հատկապես գործնական միջավայրում՝ մոխրագույն կոստյումը, վերարկուն, սվիտերը՝ բոլորն ասոցացվում են այն մարդու հետ, որի վրա կարելի է հույս դնել։
• Այն ցույց է տալիս հարգանք կոնտեքստի նկատմամբ։ Մոխրագույնը դուրս չի մղում, չի վիճում, չի հակադրվում։ Այն գործում է ցանկացած իրավիճակում՝ հարցազրույցից մինչև ծնողների հետ ծանոթություն։

Կարդացեք նաև՝ Դեղին․ երբ երջանկությունը կարող է նաև գոռալ։ Ի՞նչ է պատմում մարդու մասին դեղինի հանդեպ սերը

Ում է հարմար մոխրագույնը և ինչ կարող է պատմել ձեր մասին

Մոխրագույնը՝ հայտարարություն է առանց խոսքի։ Այն հազվադեպ է պատահական ընտրություն և գրեթե միշտ կապված է ներքին վիճակի հետ։ Եթե կրկին ու կրկին ձգտում եք այդ գույնին, ամենայն հավանականությամբ, դա ոչ միայն գեղագիտական նախասիրություն է, այլ նաև ձեր անձի արտացոլում։

• Նրանց համար, ովքեր փնտրում են կայունություն, այլ ոչ՝ էֆեկտայնություն։ Մոխրագույնը իդեալական ընտրություն է, եթե ձեզ համար կարևոր են կառուցվածքը, խաղաղությունն ու զգացումը, որ դուք «ձեր տեղում եք»։ Դա այն մարդկանց գույնն է, ովքեր գնահատում են կայունությունը՝ կյանքը ցուցադրության դնելուց ավելի։
• Նրանց, ովքեր ցանկանում են լսվել, այլ ոչ թե նկատվել։ Դուք ընտրում եք չգոռալ, այլ խոսել բովանդակալից։ Մոխրագույնը մարում է տեսողական աղմուկը և տեղ է տալիս իրական հաղորդակցությանը։
• Նրանց, ովքեր ունեն հզոր ներաշխարհ։ Մարդիկ, ում սազում է մոխրագույնը, որպես կանոն, չեն վախենում լռությունից՝ ո՛չ արտաքի, ո՛չ ներքին։ Դա հասունության գույն է, անկախ տարիքից։
• Նրանց, ովքեր խաչմերուկում են։ Տեղափոխություն, աշխատանքի փոփոխություն, անձնական փոփոխություններ։ Մոխրագույնը կարծես տարածք է տալիս մտորումների համար։ Այն դառնում է վերաիմաստավորման ֆոն։
• Նրանց, ովքեր գնահատում են այն իրերը, որոնք աշխատում են միշտ։ Մոխրագույնը՝ ներդրում է, ոչ թե թրենդ։ Այն չի ձանձրացնում և չի հնանում։ Դա այն սվիտերի գույնն է, որը ձեզ կուղեկցի տասնամյակներ, սիրելի վերարկուների և «այն միակ» ժակետի գույնը, որն ամեն իրավիճակում տեղին է։