Մեկ բաժակ սուրճ… հետո ևս մեկը։ Քննությունից, կարևոր նախագծից կամ ուղղակի ընկերների հետ զվարճալի երեկույթից առաջ մենք բոլորս երբեմն քունը դարձնում ենք մեր թշնամին։ Մենք պայքարում ենք նրա դեմ՝ փորձելով օրվանից ևս մի քանի ժամ կորզել։
Չմոռանաք բաժանորդագրվել մեր Telegram ալիքին:
Բայց ի՞նչ կլինի, եթե այդ թշնամանքը շարունակվի ոչ թե մեկ գիշեր, այլ օրեր շարունակ։ Ի՞նչ կպատահի, եթե դուք ուղղակի որոշեք այլևս չքնել։ Պատասխանը շատ ավելի սարսափելի է, քան կարող եք պատկերացնել։ Եկեք քայլ առ քայլ դիտարկենք, թե ինչպես է ձեր մարմինն ու ուղեղը սկսում քայքայվել։
24 ժամ անքուն (Առաջին զանգը)
Առաջին անքուն գիշերից հետո դուք գուցե ձեզ հերոս զգաք, բայց ձեր ուղեղն արդեն համաձայն չէ։ 24 ժամ անքնությունից հետո ձեր կոգնիտիվ ֆունկցիաները խանգարվում են այնքան, որ դա հավասարազոր է արյան մեջ 0.10% ալկոհոլի պարունակությանը։ Սա նշանակում է՝
- Դուք դառնում եք դյուրագրգիռ և էմոցիոնալ։
- Ձեր հիշողությունը կտրուկ վատանում է։
- Որոշումներ կայացնելու ունակությունը նվազում է։
Դուք դեռ դուք եք, բայց ձեր ավելի վատ, կենտրոնանալու ունակությունից զուրի և անհաջողակ տարբերակը։
36 ժամ անքուն (Իրականության սահմանին)
Անցել է մեկուկես օր։ Այստեղ իրավիճակը սկսում է լրջանալ։ Ձեր մարմինը սկսում է անհագ կերպով պահանջել հանգիստ, և ուղեղը սկսում է անջատվել ձեր կամքին հակառակ։
- Սկսվում են «միկրոքնի» դրվագներ։ Դուք կարող եք մի քանի վայրկյանով քնել բաց աչքերով՝ նույնիսկ չգիտակցելով դա։ Սա մահացու վտանգավոր է, եթե մեքենա եք վարում կամ որևէ մեխանիզմ եք կառավարում։
- Ձեր հորմոնալ համակարգը քաոսի մեջ է։ Սթրեսի հորմոն կորտիզոլի մակարդակը կտրուկ բարձրանում է։
- Դուք կարող եք սկսել լացել աննշան առիթից կամ ծիծաղել անտեղի։
48 ժամ անքուն (Ուրվականներ են հայտնվում)
Երկու օր առանց քնի։ Ձեր ուղեղն այլևս չի կարողանում տարբերել իրականն ու երևակայականը։ Այստեղ է, որ սկսվում է ամենասարսափելին։
- Դուք սկսում եք ունենալ հալյուցինացիաներ։ Դուք կարող եք սկսել տեսնել կամ լսել բաներ, որոնք գոյություն չունեն՝ պատերին սողացող ստվերներ, անհասկանալի ձայներ, առարկաներ, որոնք կարծես շնչում են։
- Ձեր իմունային համակարգը գրեթե անջատվում է։ Ցանկացած վիրուս կամ մանրէ կարող է ձեզ համար դառնալ լուրջ սպառնալիք։
- Զարգանում է պարանոյա։ Ձեզ կարող է թվալ, թե բոլորը ձեր դեմ դավադրություն են կազմակերպում կամ հետևում են ձեզ։
Կարդացեք նաև՝ 6 խորհուրդ, որոնք կօգնեն «գոյատևել» անքուն գիշերից հետո
72 ժամ անքուն (Ուղեղն անջատվում է)
Երեք օր։ Ձեր ուղեղի ունակությունը՝ տրամաբանորեն մտածելու, պլանավորելու և նույնիսկ խոսելու, գրեթե զրոյանում է։
- Նույնիսկ ամենապարզ առաջադրանքները, օրինակ՝ ձեր անունը գրելը կամ պարզ հարցի պատասխանելը, դառնում են անհնարին։
- Հալյուցինացիաները դառնում են բարդ և համակարգված։ Դուք կարող եք ամբողջությամբ կորցնել կապն իրականության հետ՝ հայտնվելով ձեր սեփական մղձավանջային աշխարհում։
- Ձեր մարմինը սկսում է ուղղակիորեն տառապել։ Հնարավոր են սրտի ռիթմի խանգարումներ, մարմնի ջերմաստիճանի անկում և ուժեղ դող։
Պատմության մեջ ամենահայտնի դեպքը 1965 թվականին տեղի ունեցած գիտափորձն է, երբ 17-ամյա Ռենդի Գարդները չի քնել 11 օր ու 25 րոպե (264.4 ժամ)։ Վերջին օրերին նա չէր կարողանում խոսել, տառապում էր ուժեղագույն պարանոյայից և գրեթե ամբողջությամբ կորցրել էր հիշողությունը։
Քունը պարզապես հանգիստ չէ։ Դա կենսական անհրաժեշտություն է, որի ընթացքում մեր ուղեղը բառացիորեն «լվանում» է ինքն իրեն տոքսիններից, դասավորում է հիշողությունները և վերականգնում մարմինը։ Երբեք մի՛ թերագնահատեք նրա ուժը։
Իսկ դուք առավելագույնը որքա՞ն եք մնացել առանց քնի։
Գրանցվիր մեր 
