Կարևոր հանդիպումները հոգիների կողմից պլանավորված են մարմինների հանդիպելուց շատ ավելի վաղ:

Պաուլո Կոելյո

Մեզանից շատերն են իրենց կյանքում հանդիպել բազմաթիվ հարազատ հոգիների: Նրանք բոլորն էլ շատ կարևոր են մեզ համար և մեծ հաշվով ազդում են մեր կյանքի վրա:

Հարազատ հոգի. ընկեր

Երբեմն հանդիպում ենք մարդու և հասկանում, որ նա մերն է: Այնպիսի զգացողություն ենք ունենում, որ նրան ամբողջ կյանքում ճանաչել ենք, եթե նույնիսկ ընդամենը մի քանի րոպե գիտենք: Կարող եք միմյանց ամեն ինչ պատմել: Կարող եք ժամերով խոսել և չեք ձանձրանա: Նման ընկերը կարող է ձեզ իմանալ և հասկանալ ավելի լավ, քան ինքներդ, և չքննադատել: Եվ դա շատ կարևոր է:

Հարազատ հոգի. հանդուգն

Հարազատ հոգիները նրանք չեն, որոնք մեզ ավելի երջանիկ են դարձնում: Հարազատ հոգիները նրանք են, որոնք մեզ ստիպում են առավելագույնս զգալ, ծայրահեղ զգացմունքներ զգալ: Այդ մարդիկ ներխուժում են մեր կյանք, մեզ մարտահրավեր նետում, կասկածի տակ դնում այն ամենը, ինչով ապրել ենք նախկինում: Դրանից հետո մեր կյանքը բաժանվում է ՄԻՆՉԵՎ-ի և ՀԵՏՈ-ի, և մենք հասկանում ենք, որ բոլորովին այլ մարդ ենք դարձել: Սովորաբար դրանք ռոմանտիկ հարաբերություններ են լինում, որոնք փոթորկում են մեզ, իսկ հետո առանց նախազգուշացման երկնքից ցած նետում:

Հարազատ հոգի. սիրեկան

Սովորաբար դրանք կարճաժամկետ, բայց հրաշալի սիրային հարաբերություններ են լինում: Հնարավոր է՝ առաջին սեր կամ կարճ, բայց բուռն սիրավեպ, կամ պարզապես ազատ հարաբերություններ հանճարեղ սիրեկանի հետ: Նման մարդիկ մեր կյանք են գալիս որոշակի ժամանակով, որպեսզի մեզ օգնեն հասկանալ նաև կյանքի այլ կարևոր դասեր: Նման հարաբերությունները սկսվում են ոչ հանկարծակի, այլ զարգանում են աստիճանաբար: Նաև լավ ավարտ են ունենում. ամեն ինչից հետո դուք ընկերներ եք մնում՝ գիտակցելով, թե այդ հարաբերություններն ինչ են սովորեցրել ձեզ:

Հարազատ հոգի. անծանոթ

Միշտ ինչ-որ կարճ, բայց նշանակալի հանդիպում է լինում խորհրդավոր անծանոթի հետ: Հնարավոր է՝ պատահական ուղեկից կամ մարդ, որի հետ ծանոթացել եք մեկ երեկոյի համար, կամ նույնիսկ պարզ անցորդ, որի հետ միայն հայացքով եք հանդիպել և մի քանի բառ փոխանակել: Սովորաբար ձեզ թվում է, որ այդ մարդուն ինչ-որ տեղ արդեն հանդիպել եք, բայց չեք կարողանում հիշել, թե որտեղ: Անցյալ կյանքո՞ւմ: Սովորաբար այդ մարդիկ ասում են հենց այն, ինչ ուզում եք լսել այդ պահին, և հասկանում եք, որ այդ պատահական հանդիպումն այնքան էլ պատահական չէր:

Հարազատ հոգի. սեր

Սա հարազատ հոգու հենց այն տեսակն է, որի մասին երազում է յուրաքանչյուրը: Եվ եթե մեր բախտը բերի, մենք կհանդիպենք նրան և երջանիկ կլինենք ամբողջ կյանքում: Նա միավորում է վերը նշվածը. զգացողություն, որ ծանոթ եք մի ամբողջ հավերժություն, անհավանական կապ, ընկերություն, արտասովոր սեր: