Կենդանակերպի նշանները տարբեր վախեր ու ցանկություններ ունեն։ Կարելի է վախենալ աշխատանքը կորցնելուց, կարևոր հնարավորությունը բաց թողնելուց կամ առանց գումարի մնալուց։ Բայց այս սովորական թվացող անհանգստությունների հետևում հաճախ ավելի խորն ու անձնական վախ է թաքնված. իսկ եթե կյանքն այդպես էլ մեզ չտա այն, ինչին այդքան ձգտել ենք։ Սեր, ազատություն, գնահատված լինելու զգացում կամ գոնե համոզմունք, որ ապրել ենք մեր ուզած կյանքով։
Երբեմն այդ վախն իրեն զգացնել է տալիս ամենաաննշան պահերին։ Դժվարանում ենք անկեղծորեն ուրախանալ ուրիշի հարսանիքով, հանգիստ վայելել հանգստյան օրը կամ հրաժարվել հերթական պարտականությունից։ Թվում է՝ ամեն բաց թողած օր մեզ հեռացնում է մի կարևոր բանից, որին անպայման պետք է հասնենք։
Կենդանակերպի տասներկու նշաններից յուրաքանչյուրն իր վախերն ու չիրականացած ցանկություններն ունի։ Աստղագուշակության տեսանկյունից դրանք տարբեր կերպ են արտահայտվում։ Եվ գուցե այս նկարագրություններն օգնեն ավելի լավ հասկանալ ինքներս մեզ։ Չէ՞ որ երբեմն մեր ամենախոր ցանկությունները բացահայտվում են հենց այն ժամանակ, երբ մտածում ենք, թե ինչից ենք ամենից շատ վախենում զրկվել։
Խոյ. սեփական ուժերը փորձելու հնարավորություն
Խոյի ամենամեծ վախերից մեկն այն է, որ կարող է մի ամբողջ կյանք ապրել՝ այդպես էլ չիմանալով, թե իրականում ինչի է ընդունակ։ Անընդհատ պատրաստվել, սպասել ուրիշների հավանությանը, հնարավորությունները զիջել մյուսներին, իսկ տարիներ անց հասկանալ, որ իր ամենահամարձակ երազանքն այդպես էլ երազանք է մնացել։ Եվ հիմա դրա մասին կարող է միայն անցյալ ժամանակով պատմել. «Ժամանակին ես էլ էի ուզում…»։
Ահա թե ինչու «Քեզ համար արդեն ուշ է» արտահայտությունը կարող է նրան ավելի շատ ցավ պատճառել, քան նույնիսկ ամենակոշտ քննադատությունը։ Այդ խոսքերը նա ընկալում է որպես ևս մեկ անգամ փորձելու հնարավորությունից զրկվելու դատավճիռ։ Խոյի համար կարևոր է իմանալ, որ առջևում դեռ նոր մարտահրավերներ կան, որոնց համար արժե ուժերն ու համարձակությունը հավաքել։
Սակայն նա հաճախ մի սխալ է թույլ տալիս. կարծում է, թե սեփական ուժերի իսկական փորձությունը միայն մեծ հաղթանակն է։ Մինչդեռ երբեմն շատ ավելի մեծ քաջություն է պահանջվում անծանոթ գործը զրոյից սկսելու կամ ինքն իրեն անկեղծորեն խոստովանելու համար, որ նախկին նպատակն այլևս իրեն չի հետաքրքրում։
Ցուլ. հանգստություն, որի համար այլևս պետք չէ պայքարել
Ցուլը վախենում է, որ կարող է ամբողջ կյանքում աշխատել ապահով ու կայուն կյանք ստեղծելու համար, բայց այդպես էլ չհասնել այն պահին, երբ վերջապես հանգիստ շունչ կքաշի։ Գումարն արդեն վաստակել է, տունը՝ կարգի բերել, հարազատների կարիքները՝ հոգացել, բայց ներսում դեռ մի անհանգիստ միտք է պտտվում. «Իսկ եթե այս ամենը բավարար չէ՞»։
Իրականում նա կյանքից մի շատ պարզ բան է ուզում՝ առանց մեղքի զգացման վայելել իր ունեցածը։ Առանց շտապելու նախաճաշել, գեղեցիկ իր գնել ու հետո չփոշմանել ծախսած գումարի համար, երեկոն հանգիստ անցկացնել տանը՝ առանց մտածելու, թե այդ ընթացքում կարող էր մի օգտակար գործ անել։
Հենց այս վախի պատճառով էլ Ցուլը երբեմն անվերջ հետաձգում է կյանքի հաճույքները՝ սպասելով ավելի հարմար ժամանակների։ Գեղեցիկ սպասքը պահում է հյուրերի համար, արձակուրդը թողնում է ավելի հարմար պահի, իսկ հանգիստը նախատեսում է այն օրվա համար, երբ բոլոր գործերն ավարտված կլինեն։ Միայն թե գործերը մի տարօրինակ հատկություն ունեն՝ դրանք երբեք չեն վերջանում։
Երկվորյակներ. վստահություն, որ կյանքի ամենահետաքրքիրը բաց չեն թողել
Երկվորյակներին անհանգստացնում է այն միտքը, որ իրենց կյանքը կարող էր բոլորովին այլ կերպ դասավորվել։ Գուցե այլ մարդկանց հանդիպեին, ուրիշ քաղաքներում ապրեին, ավելի հետաքրքիր զրույցներ ունենային ու անսպասելի արկածների միջով անցնեին։ Իսկ իրենք չափազանց շուտ են ընտրել հնարավոր ճանապարհներից մեկը՝ մյուս բոլոր տարբերակները թողնելով անցյալում։
Այս վախը հաճախ արտահայտվում է բոլոր հնարավորությունները բաց պահելու սովորությամբ։ Նրանք չեն շտապում վերջնական որոշումներ կայացնել, պահպանում են բազմաթիվ ծանոթություններ և նույնիսկ հաճելի հանդիպման ընթացքում շարունակում են ստուգել հեռախոսը։ Ո՞վ գիտի, գուցե հենց այդ պահին մի հետաքրքիր բան է տեղի ունենում, որից իրենք կարող են անմասն մնալ։
Երկվորյակների համար հետաքրքրասիրությունը շատ կարևոր է։ Բայց նոր տպավորությունների անվերջ որոնումները երբեմն խանգարում են վայելել ներկա պահը։ Չէ՞ որ երբեմն ամենահետաքրքիր զրույցը սկսվում է հենց այն ժամանակ, երբ վերջապես հեռախոսը մի կողմ ես դնում ու ամբողջ ուշադրությունդ հատկացնում դիմացինին։
Խեցգետին. մի վայր, որտեղ իրեն միշտ սպասում են
Խեցգետինը վախենում է, որ կյանքում այդպես էլ չի գտնի իր հարազատ մարդկանց շրջանակը։ Այն մարդկանց, որոնց կողքին կարիք չի լինի անընդհատ ապացուցելու, որ արժանի է սիրո ու մտերմության։ Ովքեր կհիշեն իր սիրած բաները, կնկատեն, երբ ինքը կողքին չէ, և երբեմն պարզապես կզանգահարեն՝ առանց որևէ հատուկ առիթի։
Նրա համար հատկապես ցավալի է պատկերացնել, որ կարող է բոլորի համար հոգատար, վստահելի ու անհրաժեշտ մարդ լինել, բայց ներքուստ իրեն միայնակ զգալ։ Բոլորին օգնել, բոլորին հավաքել իր շուրջը, հիշել բոլորի հոգսերի մասին, բայց այդպես էլ ոչ մեկից չլսել. «Իսկ դո՞ւ ինչպես ես։ Պատմիր քո մասին»։
Այս վախը երբեմն ստիպում է Խեցգետնին չափազանց երկար կառչած մնալ այնպիսի հարաբերություններից, որտեղ միայն ինքն է ջերմություն տալիս։ Նրա համար դժվար է ընդունել, որ միասին անցկացրած տարիներն ու ընդհանուր հիշողությունները դեռ չեն նշանակում, թե մարդիկ այսօր էլ նույնքան մտերիմ են։
Առյուծ. բացահայտ ու անկեղծ սիրված լինելու երջանկություն
Առյուծի համար կարևոր է զգալ, որ մարդիկ ուրախ են իր ներկայությամբ։ Որ հպարտանում են իրենով, գնահատում են իրեն ու պատրաստ են իր համար ինչ-որ բան անել՝ առանց խնդրելու։ Այդ պատճառով նրա ամենախոր վախերից մեկն այն է, որ կարող է ամբողջ կյանքն անցկացնել մարդկանց կողքին, որոնք կարծես սիրում ու գնահատում են իրեն, բայց երբեք դա չեն արտահայտում։
Նա կարող է երկար պատրաստվել որևէ տոնի, մեծ ուշադրությամբ նվեր ընտրել կամ յուրահատուկ անակնկալ մտածել։ Սակայն այդ առատաձեռնության հետևում երբեմն մի շատ պարզ ցանկություն է թաքնված. գուցե մի օր էլ ինչ-որ մեկը նույնքան ջանք գործադրի հենց իր համար։
Առյուծի համար ամենադժվարը այդ ուշադրությունն ուղղակիորեն խնդրելն է։ Նրան թվում է, թե խնդրելով ստացած ուշադրությունն այլևս նույն արժեքը չունի։ Բայց մտերիմները միշտ չէ, որ հասկանում են, թե որքան կարևոր են նրա համար ուրիշների ներկայությամբ ասված մի քանի ջերմ խոսքը կամ հատուկ իր համար կազմակերպված երեկոն։
Կույս. զգացողություն, որ արածն արդեն բավական է
Կույսը վախենում է, որ կարող է ամբողջ կյանքն անցկացնել սխալներն ուղղելով, թերությունները շտկելով ու ամեն ինչ կատարելագործելով, բայց այդպես էլ գոհ չմնալ իր արածից։ Միշտ մի բան կգտնվի, որը կարելի էր ավելի լավ անել, ավելի շուտ նկատել կամ ավելի ճիշտ ասել։
Նույնիսկ լիովին արժանի գովեստ լսելիս նա երբեմն շտապում է ավելացնել. «Իրականում դեռ աշխատելու տեղ կա»։ Կարծես սեփական հաջողությամբ ուրախանալու համար նախ պետք է համոզվի, որ ամեն ինչ անթերի է։ Իսկ այդպիսի պահի հասնելը գրեթե անհնար է։
Նրա ամենամեծ ցանկություններից մեկը մի օր սեփական կյանքին նայելն է՝ առանց ամեն ինչում սխալներ փնտրելու։ Նկատել, թե որքան բանի է արդեն հասել, ինչ դժվարություններ է հաղթահարել և որքան լավ բան է ստեղծել իր ջանքերով։ Ու վերջապես իրեն թույլ տալ օրն ավարտել՝ առանց մտածելու, թե էլ ինչ կարող էր ավելի լավ անել։
Կշեռք. փոխադարձություն, որի համար պետք չէ անընդհատ ջանք թափել
Կշեռքները վախենում են, որ այդպես էլ չեն զգա, թե ինչպիսին են հարաբերությունները, որոնց պահպանման համար երկուսն էլ հավասարապես ջանք են գործադրում։ Երբ պետք չէ անընդհատ զգուշությամբ բառեր ընտրել, գուշակել դիմացինի տրամադրությունը, հարթել անհարմար իրավիճակները կամ ամեն վեճից հետո առաջինը հաշտության ձեռք մեկնել։
Նրանք հիանալի կարողանում են հաճելի մթնոլորտ ստեղծել, և շրջապատողները շատ արագ սովորում են դրան։ Այնքան արագ, որ երբեմն նույնիսկ չեն նկատում, թե որքան ջանք ու հոգատարություն է պահանջվում այդ ներդաշնակությունը պահպանելու համար։
Կշեռքներն ուզում են զգալ, որ դիմացինն էլ է իրենց ընդառաջ գալիս։ Որ երբեմն հենց նա է առաջինը հարցնում, հետաքրքրվում, ինչ-որ բան առաջարկում, զիջում կամ նկատում, որ վիրավորել է իրենց։ Բայց այդ փոխադարձությունը չստանալու վախից նրանք երբեմն սկսում են ավելի շատ ջանք թափել։ Մինչդեռ գուցե արժեր մի փոքր դադար վերցնել ու տեսնել՝ արդյոք մյուս կողմն էլ է պատրաստ որևէ քայլ անել հարաբերությունները պահպանելու համար։
Կարիճ. մտերմություն, որի մեջ կարելի է թուլացնել պաշտպանությունը
Կարիճին վախեցնում է այն միտքը, որ կարող է ամբողջ կյանքում մնալ մարդ, որին շատերն են ճանաչում, բայց իրականում ոչ ոք չի հասկանում։ Շրջապատի աչքում նա ուժեղ է, հետաքրքիր ու ինքնավստահ, սակայն իր ներաշխարհի ամենախոցելի կողմերը խնամքով թաքցնում է բոլորից։
Նա կարող է անկեղծ հարաբերություններ ցանկանալ, բայց միաժամանակ զգուշանալ, երբ զրույցը չափազանց անձնական է դառնում։ Չէ՞ որ մեկի առաջ սիրտը բացել նշանակում է նաև ցույց տալ այն տեղերը, որտեղ ամենահեշտն է իրեն ցավ պատճառել։
Իրականում Կարիճը ցանկանում է սեփական փորձով համոզվել, որ կարելի է վստահել մարդուն ու չվախենալ դրանից։ Որ խանդը խոստովանելու համար իրեն չեն ծաղրի, թուլությունը չեն օգտագործի իր դեմ, իսկ դժվար խոսակցությունը պարտադիր չէ, որ բաժանմամբ ավարտվի։ Սակայն նման մտերմությունը միանգամից չի ստեղծվում։ Դրա համար ժամանակ է պետք և փոքր, բայց անկեղծ քայլեր՝ միմյանց ընդառաջ։
Այծեղջյուր. սեփական ժամանակը տնօրինելու իրավունք
Այծեղջյուրը վախենում է, որ կյանքի լավագույն տարիները կանցկացնի միայն անհրաժեշտ գործերով զբաղվելով, իսկ իր իսկական ցանկություններին այդպես էլ հերթ չի հասնի։ Սկզբում ուսում, հետո աշխատանք, ընտանիքին աջակցելու անհրաժեշտություն, նոր պարտավորություններ։ Եվ քանի որ նա կարողանում է գլուխ հանել դժվարություններից, շրջապատողները կամաց-կամաց ավելի ու ավելի շատ գործեր են վստահում նրան։
Նրա համար հատկապես ծանր է այն միտքը, որ հանգստանալու ժամանակ կունենա միայն այն ժամանակ, երբ բոլորին ամեն ինչով ապահոված լինի։ Բայց այդ օրը կարծես երբեք չի գալիս։ Միշտ ինչ-որ նոր խնդիր է առաջանում, ինչ-որ մեկը կրկին իր օգնության կարիքն է ունենում։
Իսկ նա ուզում է մի օր պարզապես ինքնուրույն որոշել, թե ինչպես անցկացնի օրը։ Շաբաթվա կեսին դուրս գալ զբոսնելու, զբաղվել վաղուց սիրած գործով կամ հրաժարվել հերթական առաջադրանքից՝ առանց երկար բացատրելու ու արդարանալու։
Սակայն դրա համար Այծեղջյուրը պետք է ընդունի մի ոչ այնքան հաճելի ճշմարտություն. իր պարտականությունների մի մասից ոչ ոք իրեն ինքնակամ չի ազատելու։ Եթե ուզում է ժամանակ ունենալ նաև սեփական կյանքի համար, ստիպված է ինքը սահմաններ դնել։
Ջրհոս. սեփական ձևով ապրելու և ընդունված լինելու հնարավորություն
Ջրհոսը վախենում է, որ որևէ միջավայրի մաս դառնալու համար ստիպված կլինի հրաժարվել սեփական անհատականության մի կարևոր մասից։ Խոսել այնպես, ինչպես ընդունված է, ցանկանալ այն, ինչ հավանության է արժանանում, և լռել, երբ անհարմար հարցեր են առաջանում։
Նրա համար չափազանց կարևոր է պահպանել սեփական տեսակետն ու անկախությունը։ Բայց այդ ընդգծված ինքնուրույնության հետևում երբեմն շատ մարդկային մի անհանգստություն է թաքնված. արդյոք կգտնվե՞ն մարդիկ, որոնք իրեն կընդունեն այնպիսին, ինչպիսին կա՝ առանց անվերջ բացատրություններ տալու կամ բոլորին հասկանալի դառնալու համար իրեն փոխելու։
Նա ցանկանում է պարզապես զգալ, որ իրեն ընդունում են։ Որ կարելի է տարօրինակ նախասիրություն ունենալ, կենցաղը կազմակերպել սեփական ձևով, չկիսել ընդհանուր ոգևորությունն ու միևնույն է հարազատ մնալ շրջապատին։ Երբեմն այդպիսի միջավայր ստեղծելու համար նույնիսկ մեկ մարդն է բավական։ Մեկը, որի կողքին պետք չէ ամեն անգամ նախապես մտածել, թե ինչպես պաշտպանել սեփական ընտրությունն ու տեսակետը։
Ձկներ. զգացողություն, որ կյանքում դեռ տեղ կա գեղեցիկի համար
Ձկներին վախեցնում է այն միտքը, որ կարող են աստիճանաբար համակերպվել այնպիսի բաների հետ, որոնք ժամանակին անընդունելի էին համարում։ Դադարել լավ բաների սպասել, անտեսել սեփական ցանկությունները և նույնիսկ ուրիշների քնքշությանն ու հոգատարությանը կասկածանքով վերաբերվել։
Նրանք հաճախ շատ ծանր են տանում հիասթափությունները, որովհետև որևէ մարդու կամ երազանքի հետ միասին կորցնում են նաև այն ապագան, որն արդեն պատկերացրել էին իրենց մտքում։ Մի քանի նման հիասթափությունից հետո կարող է առաջանալ այլևս ոչնչի հետ մեծ հույսեր չկապելու ցանկություն։ Այդպես, թվում է, ավելի հեշտ կլինի խուսափել նոր ցավից։
Բայց Ձկների համար կարևոր է զգալ, որ կյանքը դեռ կարող է հուզել ու զարմացնել իրենց։ Դա կարող է լինել գեղեցիկ երաժշտություն, անկեղծ զրույց, ճանապարհորդություն կամ ինչ-որ մեկի անսպասելի ուշադրությունը։ Եվ նման պահեր հնարավոր է գտնել նույնիսկ ամենասովորական օրվա մեջ։ Երբեմն դեպի սեփական ցանկություններն ու զգացմունքները վերադառնալու համար բավական է ընդամենը մի փոքրիկ երազանք, որին վերջապես սկսում են լուրջ վերաբերվել։
Մեզ ամենից շատ անհանգստացնող վախերը հաճախ հուշում են այն ցանկությունների մասին, որոնք երկար ժամանակ անտեսել ենք։ Գրգռվածության հետևում կարող է թաքնված լինել ազատության կարիքը, հոգնածության հետևում՝ հոգատարության պակասը, իսկ մեզ ուրիշների հետ անընդհատ համեմատելու սովորության հետևում՝ մի երազանք, որի իրականացումը վաղուց հետաձգել ենք։
Երբեմն արժե ինքներս մեզ մի պարզ հարց տալ. «Ի՞նչն եմ անընդհատ հետաձգում՝ սպասելով, որ կյանքումս վերջապես ամեն ինչ իր տեղը կընկնի»։
Պատասխանը կարող է շատ ավելի պարզ ու հստակ լինել, քան առաջին հայացքից թվում է։
Գրանցվիր մեր 
