Չինական ծագմամբ կանադացի դասախոս և քաղաքական վերլուծաբան Ցզյան Սյուեցինը, որին սոցիալական ցանցերում անվանում են «չինացի Նոստրադամուսը», 2027 թվականի համար հինգ մտահոգիչ կանխատեսում է արել։ Նա խոսել է հնարավոր պատերազմից, պարտադիր զինվորական զորակոչից և համաշխարհային տնտեսական ճգնաժամից։ Այս մասին հայտնում է Catamarcaya պարբերականը։
Ինչ պետք է իմանալ այս կանխատեսումների մասին
Աստղագուշակությունը, տարոն, նումերոլոգիան, ձեռնագուշակությունը, էքստրասենսորիկան և նմանատիպ այլ զբաղմունքները գիտական ուղղություններ չեն։ Դրանք հիմնված են հին ավանդույթների, հավատալիքների և մեկնաբանությունների վրա, որոնց արդյունավետությունը գիտականորեն ապացուցված չէ։ Նման մեթոդները չեն ընդունվում ակադեմիական գիտական շրջանակներում, իսկ դրանց մասին հրապարակումները հաճախ ժամանցային բնույթ ունեն։ Ուստի դրանք չարժե օգտագործել որպես որոշումներ կայացնելու կամ ապագան ծրագրելու հուսալի հիմք։ Հոգեբանական կամ առողջական խնդիրների դեպքում անհրաժեշտ է դիմել համապատասխան մասնագետների։
Ցզյան Սյուեցինը հայտնի է միջազգային հակամարտությունների մասին իր վերլուծություններով։ Նա նաև փորձում է կանխատեսել, թե ինչ քայլեր կարող են անել աշխարհի առաջնորդները։ Նրա հետևորդների համոզմամբ՝ վերլուծաբանին հաջողվել է կանխատեսել Դոնալդ Թրամփի հաղթանակը 2024 թվականի նախագահական ընտրություններում, ինչպես նաև ԱՄՆ-ի և Իսրայելի անմիջական մասնակցությունն Իրանի դեմ ռազմական գործողություններին՝ Թրամփի նախագահության երկրորդ ժամկետում։
Սակայն ինքը՝ Ցզյանը, շեշտում է, որ գերբնական որևէ ունակություն չունի։ Նրա խոսքով՝ պարզապես ուսումնասիրում է քաղաքական առաջնորդների նպատակները, հետևում նրանց քայլերին և փորձում հասկանալ, թե ինչ որոշումներ կարող են նրանք կայացնել։ Նա այդ գործընթացը համեմատում է պոկերի խաղին հետևելու հետ։ Բացի այդ, վերլուծաբանը ներկայիս իրադարձությունները համադրում է պատմության մեջ տեղի ունեցած նմանատիպ դեպքերի հետ։
Իր կանխատեսումները Ցզյանը ներկայացրել է 2026 թվականի ապրիլին՝ փոդքասթեր Ջեք Նիլի հետ զրույցում։
«Քաղաքացիական պատերազմի համար բոլոր նախադրյալներն արդեն պետք է առկա լինեն՝ երկրի ներսում դժգոհություն, անկարգություններ, բողոքի ցույցեր և ապստամբություններ։ Իսկ համաշխարհային տնտեսությունը մինչև 2027 թվականը պետք է արդեն փլուզված լինի»,– ասել է նա։
1. ԱՄՆ-ի և Իրանի միջև պատերազմը կարող է տասնամյակներ տևել
Առաջին կանխատեսումը վերաբերում է Իրանին։ Ցզյանի կարծիքով՝ Վաշինգտոնի և Թեհրանի միջև հակամարտությունն ավելի է սրվելու և ի վերջո հանգեցնելու է Իրանի տարածք ամերիկյան ցամաքային զորքերի ներխուժմանը։ Նա չի բացառում, որ ԱՄՆ-ը կարող է ներքաշվել տասնամյակներ տևող պատերազմի մեջ։
«Կարծում եմ՝ ԱՄՆ-ի և Իրանի միջև պատերազմը միայն ընդլայնվելու է։ Այս իրավիճակից ելք չկա։ Մենք կտեսնենք, թե ինչպես են ամերիկյան ցամաքային զորքերը ներխուժում Իրան, և ԱՄՆ-ը խրվում է այդ պատերազմի մեջ։ Չորս տարին դեռ լավատեսական կանխատեսում է։ Հնարավոր է՝ պատերազմը տևի տասը կամ նույնիսկ քսան տարի»,– հայտարարել է Ցզյանը։
2. ԱՄՆ-ում կարող են վերականգնել պարտադիր զինվորական զորակոչը
Երկրորդ կանխատեսումն անմիջականորեն կապված է առաջինի հետ։
Վերլուծաբանի կարծիքով՝ եթե պատերազմը երկարաձգվի և մեծ ծավալներ ստանա, ԱՄՆ-ին ավելի շատ զինվորներ պետք կգան։ Այդ դեպքում ամերիկյան իշխանությունները կարող են վերականգնել 18 տարին լրացած երիտասարդների պարտադիր զինվորական զորակոչը։
Ցզյանը ենթադրում է, որ դրա համար անհրաժեշտ օրենքներն ու վարչական մեխանիզմները կարող են նախապատրաստվել արդեն 2027 թվականին։
Միաժամանակ պարբերականն ընդգծում է, որ սա ընդամենը վերլուծաբանի ենթադրությունն է։ ԱՄՆ իշխանությունները նման պաշտոնական որոշում չեն հայտարարել։
✦ ԿԱՐԴԱՑԵՔ ՆԱԵՎ ✦
Ի՞նչ է սպասվում 2026-ին. Նոստրադամուսի սարսափազդու կանխատեսումներն ու լույսը թունելի վերջում
3. Ուժային կառույցներն ավելի մեծ լիազորություններ կստանան, իսկ Թրամփը կփորձի պահպանել իշխանությունը
Երրորդ կանխատեսումը վերաբերում է ԱՄՆ ուժային կառույցներին։
Ցզյանի համոզմամբ՝ ԱՄՆ ներգաղթի և մաքսային վերահսկողության ծառայությունը (ICE) շատ ավելի մեծ լիազորություններ կստանա, իսկ երկրի խոշոր քաղաքներում կտեղակայվեն Ազգային գվարդիայի ստորաբաժանումներ։
«Մինչև 2027 թվականը համազգային զորակոչ իրականացնելու համակարգը պետք է արդեն պատրաստ լինի։ ICE-ը շատ ավելի հզոր կդառնա, քան մարդիկ պատկերացնում են։ Նրանք ցանկանում են Ազգային գվարդիան տեղակայել ԱՄՆ բոլոր խոշոր քաղաքներում, քանի որ պատրաստվում են տնտեսական փլուզման»,– կարծում է վերլուծաբանը։
Ցզյանը նաև կարծում է, որ Դոնալդ Թրամփն իրեն համարում է Ամերիկան «փրկելու» առաքելություն ունեցող մարդ։ Նրա կարծիքով՝ Թրամփը կփորձի ճանապարհ գտնել Սպիտակ տանը մնալու նաև 2028 թվականից հետո, թեև Սահմանադրությունը թույլ չի տալիս նրան երրորդ անգամ ընտրվել նախագահի պաշտոնում։
Պարբերականը հատուկ նշում է, որ սա միայն Ցզյանի կարծիքն է, ոչ թե անձամբ Թրամփի արած հայտարարությունը։
4. Ամերիկյան տնտեսության փլուզումը կարող է համաշխարհային ճգնաժամ առաջացնել
Չորրորդ կանխատեսումն առնչվում է ԱՄՆ տնտեսությանը։ Ցզյանի կարծիքով՝ ամերիկյան տնտեսության հնարավոր փլուզումը ծանր հետևանքներ կունենա ամբողջ աշխարհի համար։
Վերլուծաբանը կարծում է, որ ճգնաժամի պատճառներից մեկը կարող է դառնալ Հորմուզի նեղուցի երկարատև փակումը։ Չի բացառվում նաև, որ նեղուցը պարբերաբար փակվի և վերաբացվի։ Սա չափազանց կարևոր ծովային ճանապարհ է, որով տեղափոխվում է աշխարհում արդյունահանվող նավթի և գազի զգալի մասը։
Ցզյանի կարծիքով՝ նման իրավիճակում կտրուկ կբարձրանան նավթի, գազի և պարարտանյութերի գները։ Դրանից հետո կթանկանան նաև սննդամթերքը, բեռնափոխադրումները և առաջին անհրաժեշտության այլ ապրանքներն ու ծառայությունները։
«Եթե ԱՄՆ-ը պարտվի այս պատերազմում, դա կնշանակի ամերիկյան տնտեսության փլուզում»,– զգուշացրել է նա։
5. ԱՄՆ-ում կարող են սկսվել զանգվածային անկարգություններ և բախումներ
Հինգերորդ կանխատեսումը վերաբերում է ԱՄՆ-ի ներքին իրավիճակին։ Ցզյանը կարծում է, որ երկիրը կարող է հայտնվել զանգվածային բողոքի ցույցերի, անկարգությունների և բռնի բախումների ալիքի մեջ։
Թեև նա օգտագործում է «քաղաքացիական պատերազմ» արտահայտությունը, սակայն չի կարծում, թե ԱՄՆ տարածքում իրար դեմ դուրս կգան երկու մեծ բանակներ։
Ինչպես պարզաբանում է պարբերականը, խոսքն ավելի շուտ երկրի տարբեր հատվածներում բռնկվող զանգվածային բողոքի ցույցերի, անկարգությունների և դաշնային ուժերի հետ առանձին բախումների մասին է։
Ընդ որում, լարվածության հիմնական պատճառներից մեկը կարող են դառնալ հենց ICE-ի և Ազգային գվարդիայի գործողությունները ամերիկյան քաղաքներում։
Գրանցվիր մեր 
