Ոչ բոլորն են բացահայտ ցույց տալիս, որ ինչ-որ մեկին չեն սիրում։ Երբեմն հակակրանքը կարելի է նկատել մարդու հայացքից, դեմքի արտահայտությունից կամ շարժումներից։ Հոգեբաններն առանձնացնում են 5 թաքնված նշան, որոնք կարող են հուշել, որ մարդը նախընտրում է հեռու մնալ ձեզանից։ Սակայն այդ նշաններից ոչ մեկն ինքնին չի ապացուցում, որ նա բացասաբար է տրամադրված ձեր հանդեպ, գրում է BBC Science Focus-ը։
Ինչպե՞ս հասկանալ, որ մարդը ձեզ չի համակրում
Մարդիկ միշտ չէ, որ անկեղծորեն խոսում են իրենց զգացմունքների մասին։ Երբեմն գործընկերոջ, ծանոթի կամ պարզապես շրջապատի որևէ մարդու իրական վերաբերմունքը կարելի է կռահել նրա պահվածքից։
Հոգեբանների կարծիքով՝ երբ մարդը չի ցանկանում շփվել ինչ-որ մեկի հետ, դա կարող է արտահայտվել տարբեր ձևերով։ Օրինակ՝ նա խուսափում է զրուցակցի աչքերին նայելուց, հազվադեպ է ժպտում, դեմքի որոշակի արտահայտություններով ցույց է տալիս իր վերաբերմունքը կամ փորձում է ֆիզիկական հեռավորություն պահպանել։
Սակայն ճիշտ եզրակացություն անելու համար պետք է ուշադրություն դարձնել ոչ թե առանձին շարժումներին, այլ նրան, թե մարդն ինչպես է իրեն պահում տարբեր իրավիճակներում։
1
Մարդը խուսափում է ձեր աչքերին նայելուց
Հայացքը շատ բան կարող է պատմել այն մասին, թե ինչն է գրավում մարդու ուշադրությունը։ Հետազոտությունները ցույց են տալիս, որ մենք ավելի հաճախ ենք աչքերի մեջ նայում նրանց, ովքեր մեզ հետաքրքրում են, և ում հետ ցանկանում ենք շփվել։
Իսկ եթե զրուցակիցն անընդհատ հայացքը փախցնում է, խոսելիս նայում է շուրջը կամ խուսափում է ձեր աչքերին նայելուց, հնարավոր է՝ նա փորձում է որոշակի հոգեբանական հեռավորություն պահպանել։
Բայց դա դեռ չի նշանակում, որ նա ձեզ չի սիրում։ Որոշ մարդիկ պարզապես ամաչկոտ են, իսկ մյուսները կարող են խուսափել աչքերի մեջ նայելուց հոգնածության կամ անհանգստության պատճառով։
2
Նրա դեմքին արհամարհանք կամ զզվանք է նկատվում
Երբեմն մարդու դեմքն ավելի շատ բան է ասում, քան նրա խոսքերը։ Հակակրանքի հնարավոր նշաններից մեկն արհամարհական արտահայտությունն է, որը կարող է դրսևորվել շուրթերի մի անկյան հազիվ նկատելի բարձրացմամբ։
Նման արտահայտությունը երբեմն մատնում է վերևից նայելու, իրեն մյուսից բարձր դասելու կամ զրուցակցից հեռու մնալու ցանկությունը։
Մեկ այլ հնարավոր նշան է զզվանքի արտահայտությունը։ Ընդ որում, զզվանք կարող են առաջացնել ոչ միայն տհաճ համերն ու հոտերը։ Այդ զգացումը երբեմն կապված է նաև որոշակի մարդու հետ շփվելուց խուսափելու ցանկության հետ։
Այնուամենայնիվ, միայն դեմքի արտահայտությամբ հնարավոր չէ վստահ ասել, թե մարդն ինչ է զգում ձեր հանդեպ։
3
Ձեր ներկայությամբ նա գրեթե չի ժպտում
Ժպիտը մարդկանց միջև ջերմություն և վստահություն ստեղծելու ամենապարզ միջոցներից է։ Դրանով մենք հաճախ ցույց ենք տալիս, որ բարյացակամ ենք տրամադրված և պատրաստ ենք շփվելու։ Բացի այդ, ժպտացող մարդիկ սովորաբար ավելի անմիջական ու վստահելի են թվում։
Ուշադրություն դարձրեք՝ արդյոք մարդը հաճախ է ժպտում ուրիշների հետ շփվելիս, բայց ձեր ներկայությամբ գրեթե երբեք չի ժպտում կամ դրական հույզեր ցույց տալիս։ Նման տարբերությունը կարող է հուշել, որ նրա վերաբերմունքը ձեր նկատմամբ նույնը չէ, ինչ մյուսների հանդեպ։
Սակայն այստեղ էլ պետք չէ շտապել եզրակացություններ անել։ Ժպիտի բացակայությունը դեռ հակակրանքի ապացույց չէ։ Մարդը կարող է պարզապես վատ տրամադրություն ունենալ, հոգնած լինել կամ տվյալ պահին ժպտալու ցանկություն չունենալ։
4
Զրուցակիցը մարմնով շրջվում է ձեզանից
Երբ ցանկանում ենք շփվել ինչ-որ մեկի հետ, սովորաբար ոչ միայն նայում ենք նրան, այլև մարմնով շրջվում նրա կողմը։ Իսկ երբ զրուցակցի ուսերն ու իրանն ուղղված են այլ կողմ, դա երբեմն կարող է վկայել, որ նա այնքան էլ հետաքրքրված չէ զրույցով։
Պատահում է, որ մարդը շարունակում է խոսել ձեզ հետ, բայց նրա կեցվածքից այնպիսի տպավորություն է ստեղծվում, կարծես ուզում է հեռանալ։ Օրինակ՝ նա կանգնած է կիսաշրջված և խոսելուն զուգահեռ անընդհատ հետևում է, թե ինչ է կատարվում շուրջը։
Իհարկե, նման պահվածքը միշտ չէ, որ ինչ-որ բան է նշանակում։ Հնարավոր է՝ մարդը պարզապես շեղված է այլ գործերով կամ տվյալ իրավիճակում իրեն անհարմար է զգում։
5
Նա մշտապես փորձում է հեռավորություն պահպանել
Մարդկանց միջև ֆիզիկական հեռավորությունը նույնպես կարող է որոշ բան հուշել նրանց հարաբերությունների մասին։ Որպես կանոն, որքան մտերիմ ենք զգում մեզ ինչ-որ մեկի հետ, այնքան ավելի փոքր հեռավորությունն է մեզ հարմար թվում։
Եթե նկատում եք, որ զրուցակիցը շարունակ հետ է քաշվում, խուսափում է ձեզ մոտենալուց կամ ամեն կերպ փորձում է ավելի հեռու կանգնել, հնարավոր է՝ նա ցանկանում է սահմանափակել ձեր շփումը։
Բայց պետք է հաշվի առնել նաև, որ յուրաքանչյուր մարդ անձնական տարածքի իր պատկերացումն ունի։ Ոմանց համար նույնիսկ մտերիմ մարդկանց հետ որոշակի հեռավորություն պահպանելը լիովին բնական է։ Հետևաբար միայն այն փաստը, որ մարդը հեռու է կանգնում ձեզանից, դեռ չի նշանակում, որ նա ձեզ չի համակրում։
Ինչո՞ւ չի կարելի եզրակացություններ անել միայն մեկ նշանի հիման վրա
Հոգեբանները զգուշացնում են՝ ոչ մի առանձին շարժում, հայացք կամ դեմքի արտահայտություն չի կարող միանշանակ ապացուցել, որ մարդը ձեզ չի սիրում։
Աչքերին նայելուց խուսափելը, զուսպ դիմախաղը կամ մյուսներից հեռու մնալու սովորությունը կարող են տարբեր պատճառներ ունենալ։ Դրանց հիմքում երբեմն ամաչկոտությունն է, հոգնածությունը, անհանգստությունը կամ պարզապես անուշադրությունը։ Դեր կարող են ունենալ նաև մարդու նյարդաբանական առանձնահատկություններն ու մշակութային միջավայրը։
Ավելի շատ բան կարող է հուշել այն, երբ մի քանի նման նշաններ պարբերաբար կրկնվում են տարբեր իրավիճակներում։ Եթե ժամանակի ընթացքում նկատում եք, որ մարդը ձեզ հետ գրեթե միշտ նույն կերպ է վարվում, նրա վերաբերմունքի մասին եզրակացություն անելու ավելի հիմնավոր պատճառ կարող եք ունենալ։
Գրանցվիր մեր 
