Որոշ կենդանակերպի ներկայացուցիչներ չեն սիրում նմանվել մյուսներին և նախընտրում են ապրել սեփական պատկերացումներով։ Մինչ որոշ մարդիկ հեշտությամբ հարմարվում են շրջապատին, նրանք ընտրում են իրենց ճանապարհը՝ անկախ նրանից, թե ինչ են մտածում կամ ընդունելի համարում մյուսները։ Աստղագուշակության համաձայն՝ խոսքը Ջրհոսների, Երկվորյակների և Ձկների մասին է։ Նրանցից յուրաքանչյուրն աշխարհն ընկալում է յուրովի, ոգեշնչում գտնում անսպասելի բաներում և միշտ չէ, որ ցանկանում է հետևել ընդունված կանոններին։ Հենց ինքնատիպ մտածողությունն ու սեփական անհատականությունը պահպանելու ձգտումն էլ նրանց առանձնացնում են մյուսներից։
♒ Ջրհոս
Ջրհոսները չեն սիրում, երբ ինչ-որ մեկը փորձում է իրենց սովորեցնել, թե ինչպես պետք է ապրել, մտածել կամ վարվել։ Նրանք նախընտրում են ինքնուրույն որոշումներ կայացնել և չեն հասկանում, թե ինչու պետք է հետևեն որևէ ավանդույթի միայն այն պատճառով, որ այդպես են անում բոլորը։ Եթե սովորական մոտեցումը նրանց ձանձրալի կամ անարդյունավետ է թվում, առանց երկար մտածելու փորձում են այլ ճանապարհ գտնել։
Այս նշանի ներկայացուցիչները հաճախ անսովոր հետաքրքրություններ են ունենում, սիրում են նոր տեխնոլոգիաները, համարձակ փորձարկումներ են անում իրենց արտաքինի ու հագուստի հետ և երբեմն այնպիսի գաղափարներ են առաջարկում, որոնք շրջապատին սկզբում չափազանց տարօրինակ կամ համարձակ են թվում։ Նրանց գրավում է ամեն ինչ, ինչը թույլ է տալիս դուրս գալ սովորական պատկերացումների սահմաններից և ծանոթ երևույթներին այլ աչքով նայել։
Սակայն դա չի նշանակում, թե Ջրհոսներն ամեն գնով փորձում են տարբերվել կամ զարմացնել մյուսներին։ Իրականում նրանց համար շատ ավելի կարևոր է ազատ զգալը, քան ուշադրության կենտրոնում հայտնվելը։ Նրանք չեն վախենում բոլորից տարբերվող կարծիք ունենալուց և կարող են հանգիստ մնալ իրենց համոզմունքներին հավատարիմ, նույնիսկ եթե ոչ ոք իրենց հետ համաձայն չէ։ Ընդ որում, միշտ չէ, որ հարկ են համարում բացատրել, թե ինչու են այս կամ այն որոշումը կայացրել։
Անձնական հարաբերություններում նույնպես Ջրհոսները մեծ տեղ են տալիս անկախությանը։ Նրանց համար կարևոր է, որ մտերիմները հարգեն իրենց անձնական տարածքը, հետաքրքրություններն ու սեփական կարծիք ունենալու իրավունքը։ Այդ պատճառով էլ, երբ ինչ-որ մեկը փորձում է վերահսկել նրանց կամ սահմանափակել ազատությունը, սովորաբար հանդիպում է լուրջ դիմադրության։
♊ Երկվորյակներ
Երկվորյակների յուրօրինակությունն առաջին հերթին նրանց աշխույժ մտքի և ամեն նոր բանով արագ հետաքրքրվելու կարողության մեջ է։ Այսօր նրանք կարող են տարվել հոգեբանությամբ, վաղը հետաքրքրվել արվեստի պատմությամբ, իսկ մի քանի օր անց ամբողջությամբ խորանալ մի թեմայի մեջ, որի մասին նախկինում գրեթե ոչինչ չգիտեին։
Այս նշանի ներկայացուցիչները սիրում են հարցեր տալ, անսովոր թեմաներ քննարկել և բացահայտել բաներ, որոնց մասին շատերն անգամ չեն մտածում։ Նրանք ճկուն միտք ունեն, հեշտությամբ են դիտարկում տարբեր տեսակետներ և անհրաժեշտության դեպքում կարողանում են փոխել սեփական կարծիքը։ Բացի այդ, Երկվորյակները հաճախ հետաքրքիր կապեր են նկատում այնպիսի երևույթների միջև, որոնք առաջին հայացքից բոլորովին կապ չունեն իրար հետ։
Երկվորյակների համար դժվար է երկար ժամանակ ապրել միապաղաղ առօրյայով։ Նոր ծանոթությունները, տպավորությունները, ճանապարհորդություններն ու հետաքրքիր բացահայտումները նրանց կյանքն ավելի հագեցած են դարձնում։ Միևնույն ժամանակ նրանք կարող են այսօր մի բանով ոգևորվել, իսկ վաղը բոլորովին այլ հետաքրքրություն գտնել։ Հենց այդ պատճառով էլ երբեմն շրջապատի աչքում փոփոխական ու անկայուն մարդու տպավորություն են թողնում։
Երկվորյակներին բնորոշ է նաև հումորի լավ զգացումը։ Նրանք կարողանում են աշխուժացնել նույնիսկ ամենաձանձրալի զրույցը, մեղմել լարվածությունը և սովորական խնդիրներին անսպասելի տեսանկյունից նայել։ Նրանց ինքնատիպությունն ամենևին էլ կանոնները խախտելու ցանկությամբ չի պայմանավորված։ Պարզապես նրանք կարողանում են ազատ մտածել և հնարավորություններ տեսնել նույնիսկ այնտեղ, որտեղ մյուսները ոչ մի առանձնահատուկ բան չեն նկատում։
♓ Ձկներ
Կենդանակերպի մյուս՝ ավելի ակտիվ ու շփվող նշանների համեմատ Ձկները կարող են հանգիստ, զուսպ և նույնիսկ աննկատ թվալ։ Սակայն այդ հանգստության հետևում հաճախ թաքնված է մտքերով, երևակայությամբ ու խոր ապրումներով լի մի ամբողջ աշխարհ։
Ձկներին հատկապես գրավում են երաժշտությունը, գրականությունը, նկարչությունը, կինոն և արվեստի մյուս տեսակները։ Դրանց միջոցով նրանք կարողանում են ավելի լավ հասկանալ զգացմունքները, երևակայել ու մտովի տեղափոխվել բոլորովին այլ աշխարհներ։ Նրանք կարող են ժամերով տարվել հետաքրքիր գրքով, սեփական պատմություններ հորինել կամ երկար մտածել մի գաղափարի շուրջ, որը հանկարծակի է ծնվել իրենց մտքում։
Աստղագուշակության մեջ Ձկներին վերագրում են հարուստ երևակայություն և շրջապատի տրամադրությունները զգալու առանձնահատուկ ունակություն։ Նրանք հաճախ նկատում են այնպիսի մանրուքներ, որոնք ուրիշների աչքից վրիպում են՝ խոսակցի ձայնի հնչերանգը, դեմքի արտահայտությունը կամ վարքագծի աննշան փոփոխությունը։ Երբեմն Ձկները կարողանում են զգալ, որ ինչ-որ մեկին մի բան անհանգստացնում է, դեռ նախքան այդ մարդն ինքը կսկսի խոսել իր խնդիրների մասին։
Նրանց աշխարհընկալումը միշտ չէ, որ հեշտ է բացատրել բառերով։ Ձկները հաճախ որոշումներ են կայացնում՝ վստահելով իրենց ներքին ձայնին, զգացողություններին ու մտքում առաջացող զուգորդումներին, այլ ոչ թե առաջնորդվելով միայն սառը տրամաբանությամբ։ Գուցե հենց դրա շնորհիվ էլ նրանք կարողանում են ոգեշնչում գտնել ամենափոքր մանրուքներում և առանձնահատուկ իմաստ տեսնել այնպիսի բաներում, որոնք ուրիշներին սովորական ու աննշան են թվում։
Սակայն հարուստ երևակայությունը երբեմն նաև իր բացասական կողմն է ունենում։ Ձկները կարող են այնքան խորանալ սեփական մտքերի ու երազանքների մեջ, որ կտրվեն առօրյա իրականությունից։ Այդ պատճառով նրանց համար կարևոր է սովորել համատեղել երազկոտությունն ու գործնական մտածողությունը՝ չմոռանալով նաև առօրյա գործերի ու պարտականությունների մասին։
Գրանցվիր մեր 
