Գիտնականները հաշվարկել են, թե մոտավորապես երբ կարող է ավարտվել Տիեզերքի գոյությունը: Այս եզրակացությանն են եկել Քորնելի համալսարանի, Շանհայի Ցզյաո Տուն համալսարանի և մի շարք այլ գիտական հաստատությունների հետազոտողները, գրում է Mirror պարբերականը։
Հետազոտության համաձայն, որը ստացել է նաև NASA-ի մասնագետների աջակցությունը, Տիեզերքը, հասնելով իր առավելագույն չափին, կդադարի ընդարձակվել և աստիճանաբար կսկսի սեղմվել։ Ի վերջո այն կրկին կարող է վերածվել մեկ կետի։
Այս երևույթը ստացել է «Մեծ սեղմում» անվանումը։ Ըստ էության, այն Մեծ պայթյունի հակառակ գործընթացն է։ Մեծ պայթյունի լայնորեն ընդունված տեսության համաձայն՝ Տիեզերքը սկիզբ է առել մեկ կետից, որից առաջացել են նյութը, տարածությունն ու ժամանակը։
Գիտնականների հաշվարկներով՝ «Մեծ սեղմումը» կարող է տեղի ունենալ Մեծ պայթյունից մոտ 33,3 միլիարդ տարի անց։
Քանի որ Տիեզերքի տարիքը ներկայում գնահատվում է մոտ 13,8 միլիարդ տարի, հետազոտության արդյունքներից հետևում է, որ Երկրին և մյուս բոլոր մոլորակներին մինչև վերջնական ոչնչացումը կարող է մնալ շուրջ 20 միլիարդ տարի։
Ինչի՞ վրա է հիմնված այս կանխատեսումը
Գիտնականների խոսքով՝ հետազոտության հիմքում այն տեսությունն է, ըստ որի՝ Տիեզերքը դեռ երկար ժամանակ շարունակելու է ընդարձակվել։ Սակայն ինչ-որ պահի ընդարձակմանը հակազդող ուժը կարող է ավելի ուժեղ դառնալ, ինչից հետո գործընթացը կփոխի իր ուղղությունը։
Այս տեսության մեջ կարևոր դեր է վերապահվում մութ էներգիային։ Դա էներգիայի հիպոթետիկ տեսակ է, որն ընդգրկվել է Տիեզերքի մաթեմատիկական մոդելներում՝ բացատրելու համար, թե ինչու է դրա ընդարձակումը ժամանակի ընթացքում արագանում։
Պարբերականը նշում է, որ երկար տարիներ գիտնականները հենց մութ էներգիան էին համարում Տիեզերքի արագացող ընդարձակման հիմնական պատճառը։
Սակայն վերջին բացահայտումները հիմք են տվել ենթադրելու, որ այդ ուժը, հնարավոր է, հաստատուն չէ։
Եթե այս ենթադրությունը ճիշտ է, ապա Տիեզերքի ընդարձակումը կարող է անվերջ չշարունակվել։ Որոշակի սահմանին հասնելուց հետո այն կարող է կանգ առնել, իսկ հետո սկսել հակառակ գործընթացը՝ աստիճանաբար սեղմվել։
Որքա՞ն կարող է դեռ ընդարձակվել Տիեզերքը
Նոր տեսության համաձայն՝ Տիեզերքը դեռ շարունակելու է ընդարձակվել, բայց այդ գործընթացը գնալով կդանդաղի։
Երբ այն հասնի իր առավելագույն չափին և դառնա մոտ 69 տոկոսով ավելի մեծ, քան այսօր է, կսկսվի աստիճանական սեղմումը։
Գրանցվիր մեր 
