100-ամյա կինը ամեն օր ընթրիքին նույն բանն է ուտում․ նրա «գաղտնիքը» մեծ արձագանք է ստացել համացանցում

Հարավային Կալիֆոռնիայում ապրող 100-ամյա կինը` Ֆրիդան, սոցիալական ցանցերում իսկական աստղ է դարձել իր յուրահատուկ երեկոյան սովորույթի շնորհիվ։ Նա ամեն օր ընթրիքին նույն բանն է ուտում՝ մանանեխով և մանր կտրատած սոխով հոթ-դոգ, իսկ հետն էլ դիետիկ կոլա է խմում։

Նրա դուստրը՝ Քվինը, որը նաև խնամում է մորը, Ֆրիդայի 100-ամյակի առթիվ տեսանյութ է հրապարակել։ Հոլովակն արագ տարածվել է համացանցում, հավաքել միլիոնավոր դիտումներ, իսկ օգտատերերը պարզապես հմայվել են կենսուրախ կնոջով։

Ֆրիդան այնքան է սիրում իր ամենօրյա ընթրիքը, որ դրա մասին նույնիսկ փոքրիկ երգ է հորինել։

«Ես դրախտում եմ, որովհետև ունեմ հոթ-դոգ ու դիետիկ կոլա։ Ի՞նչ կարող է ավելի լավ լինել, քան հոթ-դոգն ու դիետիկ կոլան։ Ես կյանքիս ամեն օր դրախտում եմ», — երգում է 100-ամյա կինը տեսանյութում։

Տեսանյութի կադրերում Ֆրիդան ձեռքին պահում է հոթ-դոգն ու գազավորված ըմպելիքի տարան, ապա ուրախ երգում իր ընթրիքի մասին։ Այս տեսարանները մեծ արձագանք են ստացել սոցիալական ցանցերում։ Որոշ օգտատերեր նույնիսկ կատակել են, թե գուցե հենց այս սնունդն է նրա անձնական «երիտասարդության աղբյուրը»։

Ինքը՝ Ֆրիդան, կարծես շատ հանգիստ ու հաճույքով է ընդունել համացանցում հայտնի դառնալը։ Հաջորդ տեսանյութերից մեկում նա պատմում է, որ «վիրալ է դարձել», թեև խոստովանում է՝ այնքան էլ չի հասկանում, թե իրականում դա ինչ է նշանակում։

Նրա դուստրն ասում է, որ մոր մասնակցությամբ տեսանյութերը նրանց համար նաև միասին ժամանակ անցկացնելու և ավելի մտերմանալու միջոց են դարձել։

«Պարզապես ուզում եմ ասել, որ սա մեզ համար իսկապես շատ ուժեղ մտերմության փորձառություն էր։ Մենք պարզապես պաշտում ենք միմյանց», — ասում է Քվինը։

Ընտանիքը Ֆրիդայի կյանքից նաև այլ դրվագներ է հրապարակում՝ հին թերթերից կտրված նյութեր, ընտանեկան փաստաթղթեր և նրա սիրելի ուտեստների մասին տեսանյութեր։ Հոլովակներից մեկում կինը, ձեռքին պահելով դիետիկ կոլայի մի ամբողջ արկղ, նույնիսկ կատակել է, որ պատրաստվում է այն խմել այնքան, մինչև «պայթի»։

Մեկնաբանություններում մարդիկ աջակցել են Ֆրիդային և հիացել կյանքի հանդեպ նրա վերաբերմունքով։ Շատերը նրան հրաշալի կին են անվանել, նշել, թե որքան հաճելի է տեսնել, որ նա կարողանում է ուրախանալ ամենապարզ բաներից, իսկ ոմանք էլ կատակել են, որ իրենք նույնպես կցանկանային հետևել նրա ամենօրյա սովորույթին։

Ո՞րն է Ֆրիդայի երկարակեցության գաղտնիքը

Իսկ երբ Ֆրիդային հարցրել են, թե որն է երկարակեցության գլխավոր գաղտնիքը և ինչ խորհուրդ կտա նրանց, ովքեր ցանկանում են ապրել մինչև 100 տարեկան, նա չափազանց պարզ պատասխան է տվել․

«Շարունակեք շնչել»։