Ի՞նչն է ընդհանուր նրանց միջև, ովքեր իրենց 100-ամյակը դիմավորում են առողջ ու կենսուրախ։ Այս հարցին պատասխանել են Վեսթմինսթերի համալսարանի (Մեծ Բրիտանիա) հետազոտողները։ Նրանք առանձնացրել են չորս առանցքային սովորություն, որոնք, իրենց համոզմամբ, իսկապես ապահովում են երկար ու առողջ կյանք։

Չմոռանաք բաժանորդագրվել մեր Telegram ալիքին:

1. Ավելի շատ շարժում՝ ավելի երկար կյանք

Շաբաթական ընդամենը 75 րոպե արագ քայլքը կարող է ձեր կյանքը երկարացնել երկու տարով։ Ընդ որում, խոսքը մարաթոնյան վազքի մասին չէ. կարևորը կանոնավոր շարժվելն է։ Գիտնականները նստակյաց կենսակերպը համարում են երկարակեցության գլխավոր թշնամին։ Խորհուրդը պարզ է՝ յուրաքանչյուր կես ժամը մեկ ոտքի կանգնեք և օրական 30 րոպե զբաղվեք չափավոր ֆիզիկական ակտիվությամբ՝ լինի դա զբոսանք, լող, հեծանվավազք, թե պար։

2. Ոչ թե խիստ, այլ խելամիտ սննդակարգ

Բանջարեղենը, մրգերը, ընկույզներն ու ամբողջահատիկ մթերքները երկարակեցության հիմքն են։ Սակայն մսից լիովին հրաժարվել նույնպես պետք չէ. հաջողության գրավականը հավասարակշռությունն է։ Հենց այս սկզբունքով էին սնվում 30 տարի տևած լայնածավալ հետազոտության այն մասնակիցները, ովքեր ապրեցին մինչև խոր ծերություն՝ առանց որևէ լուրջ քրոնիկական հիվանդության։

3. Լիարժեք քունն անփոխարինելի է

Քնի պակասը կարող է կյանքը կրճատել տասնամյակներով։ Գիտնականները զգուշացնում են, որ անկանոն քունը վաղաժամ մահվան վտանգը մեծացնում է մոտ 50%-ով։ Ամենաիդեալականը օրական 7-9 ժամ քնելն է, ընդ որում՝ ցանկալի է միևնույն ժամերին։ Առանձնապես վտանգավոր են գիշերային հերթափոխները, որոնք խախտում են օրգանիզմի կենսաբանական ռիթմերն ու արագացնում ծերացման գործընթացը։

4. Մարդկային շփումը լավագույն դեղամիջոցն է

Շփումը հզոր բուժիչ ուժ ունի։ Հետազոտությունները ցույց են տալիս, որ այն տարեց մարդիկ, ովքեր ամեն օր շփվում են հարազատների և ընկերների հետ, միջինում հինգ տարով ավելի երկար են ապրում։ Սոցիալական կապերը, յոգան, կամավորական աշխատանքը և պարզապես անկեղծ զրույցներն օգնում են հաղթահարել սթրესը, որը քայքայում է մեր օրգանիզմը բջջային մակարդակով։

Կարդացեք նաև՝ Ինչո՞ւ է բնությունը սահմանափակել մարդու կյանքը՝ ընտրելով 125 տարին

Իսկ ի՞նչ դեր ունեն գեները

Այո, ժառանգականությունն իր դերն ունի, սակայն այն որոշիչ չէ։ Գենետիկան կյանքի տևողության վրա ազդում է ընդամենը 20-40%-ի չափով։ Վառ օրինակ է բրիտանուհի Էթել Քաթերհեմը, ով ապրել է 115 տարի։ Նրա քույրն ապրել է մինչև 104 տարեկան, սակայն դուստրերն ապրել են ընդամենը 71 և 83 տարի։ Սա փաստում է, որ ապրելակերպը հաճախ շատ ավելի կարևոր է, քան ժառանգականությունը։

Նույնիսկ ամենալավ գեները չեն կարող երաշխավորել 115 տարվա կյանք։ Սակայն, ինչպես նշում են գիտնականները, առողջ սովորությունները զգալիորեն մեծացնում են մինչև խոր ծերություն ակտիվ ու լիարժեք ապրելու ձեր հնարավորությունները։

Այսպիսով, երկարակեցության գաղտնիքն իրականում շատ պարզ է՝ շարժվե՛ք ավելի շատ, սնվե՛ք խելամտորեն, ապահովե՛ք լիարժեք քուն և մի՛ մոռացեք ձեր մտերիմների մասին։ Եվ ամենակարևորը՝ սկսեք հենց այսօր։