Տղամարդկանց մեծ մասն ապրում է մի աշխարհում, որտեղ նրանց հույզերն ու խոցելիությունը հաճախ թերագնահատվում են։ Մի աշխարհում, որտեղ թուլություն ցուցաբերելը գրեթե հանցագործություն է, իսկ բաց սիրտը՝ շքեղություն։ Հենց այստեղ էլ նրանք թաքուն երազում են պարզ, բայց անհավանական հազվագյուտ բաների մասին՝ այնպիսի բաների, որոնք քչերն են նկատում և որոնց մասին գրեթե չեն խոսում։

Չմոռանաք բաժանորդագրվել մեր Telegram ալիքին:

Ահա թե ինչ են նրանք ցանկանում հոգու խորքում, բայց թաքցնում են բոլորից, անգամ՝ իրենք իրենցից։

1. Ընտրվել՝ առանց ջանք թափելու

Նա ուզում է զգալ, որ իրեն ընտրել են ոչ թե հարմար լինելու, հանգամանքների բերումով կամ պարզապես «կողքին լինելու» պատճառով, այլ որովհետև ինչ-որ մեկը տեսել է հենց իրեն։

Տեսել է նրա յուրահատկությունը, ներքին ուժը և միաժամանակ՝ մարդկային խոցելիությունը՝ ասելով. «Այո՛, հենց դու»։ Նրա հոգում սա արձագանքում է որպես սեփական ես-ի ճանաչում. դա այն եզակի պահերից է, երբ նա զգում է, որ իսկապես ապրում է։

Նա ուզում է լինել ինչ-որ մեկի առաջնային ընտրությունը ոչ թե հանգամանքներից ելնելով, այլ դիմացինի մաքուր զգացմունքով ու ներքին մղումով։

2. Հասկացվել առանց ավելորդ բառերի

Տղամարդիկ դժվարանում են խոսել իրենց մասին՝ վախերի, կասկածների, իրենց տանջող, ճնշող կամ անհանգստացնող մտքերի մասին։ Երբ ինչ-որ մեկը նկատում է նրա լռությունը, լարվածությունը, ինքնամփոփ վիճակը և հասկանում է կատարվողը՝ առանց հարցուփորձի ու բացատրություններ պահանջելու, դա հոգեկան մեծ թեթևացում է բերում։

Դա այն զգացողությունն է, որ ինչ-որ մեկը տեսնում է քո իրական տեսակը, այլ ոչ թե այն կերպարը, որը փորձում ես խաղալ։ Տղամարդու համար երբեմն ավելի կարևոր է հասկացված լինել լռության մեջ, քան լսել հազարավոր բառեր։

3. Լինել ուժեղ, բայց և՝ քնքուշ

Աշխարհը նրանից պահանջում է տոկունություն, ուժ, ինքնատիրապետում։ Նա պաշտպան է, առաջնորդ, հենարան։ Բայց երբեմն նա ցանկանում է վայր դնել զրահները։

Թույլ տալ իրեն լինել մեղմ, նուրբ, փխրուն։ Արտասվել առանց ամոթի, հանգրվանել գրկում, զգալ ջերմություն՝ չփորձելով ձևացնել, թե «ամեն ինչ կարգին է»։

Ուժեղ լինելու պարտավորության և այնպիսին, ինչպիսին կա սիրված լինելու պահանջմունքի միջև եղած ներքին հակասությունը տղամարդու համար ամենաբարդ ու նուրբ խնդիրներից է։

4. Գնահատված լինել

Նա անընդհատ ձգտում է շտկել իրավիճակը, վերահսկել, հաղթել, լինել օգտակար։ Այդ ջանքերը հաճախ աննկատ են մնում, հազվադեպ են արժանանում ճանաչման։ Ուստի, երբ ինչ-որ մեկը նկատում է անքուն գիշերները, փոքրիկ հաղթանակները, անդադար ջանքերը և ասում. «Ես տեսնում եմ, որ դու ջանում ես։ Հիանալի է ստացվում», դա փոխում է նրա ներաշխարհը։

Նա գովասանք չի փնտրում, նա փնտրում է հաստատում առ այն, որ ինքը ձգտում է լինել իր լավագույն տարբերակը, և դա գնահատվում է։

5. Զգալ անվտանգություն՝ անկեղծանալիս

Նա հազվադեպ է ցուցադրում իր վախերն ու թուլությունները։ Բայց նա թաքուն երազում է մի վայրի մասին, որտեղ կարելի է լինել խոցելի՝ չվախենալով մերժումից։

Մի վայր, որտեղ կարելի է խոսել վախերի, ցավի ու տագնապների մասին՝ միաժամանակ զգալով սեր, ընդունում և աջակցություն։ Հենց այդ անվտանգության զգացումն է նրան թույլ տալիս բացվել, ինչը նշանակում է՝ դառնալ իսկական։

Կարդացեք նաև՝ Ինչի մասին են լռում տղամարդիկ. տղամարդկանց 12 գաղտնիք, որոնք կարող են զարմացնել ձեզ 

6. Լինել տեսանելի, ոչ թե միայն՝ պիտանի

Աշխարհը գնահատում է նրա գործողությունները, ոչ թե ներկայությունը։ Նա ուզում է, որ իրեն պարզապես տեսնեն, զգան նրա էությունը։ Որպեսզի հասկանան՝ նրա բացակայությունից դատարկություն է առաջանում։ Որպեսզի նրան գնահատեն ոչ թե արած գործի, այլ իր տեսակի համար։

Այս զգացողության մեջ է թաքնված սեփական կարևորության խորը գիտակցումը։

7. Զգալ ցանկալի, ոչ թե պարզապես՝ անհրաժեշտ

Նա ուզում է, որ իրեն ցանկանան ոչ թե կարգավիճակի, դիրքի, ապահովելու ունակության, պաշտպանելու կամ սպասելիքներին արդարացնելու համար։ Նա ուզում է, որ իրեն ցանկանան պարզապես իր գոյության համար։

Որպեսզի ինչ-որ մեկն անկեղծորեն նայի նրան և ուզենա լինել կողքին, որովհետև դա Ինքն է։ Ցանկալի լինելու զգացումը տղամարդուն տալիս է ներքին ազատություն՝ լինելու ինքն իրենով, այլ ոչ թե սոսկ գործառույթներ կատարող։

8. Լինել մեկը, ում սիրտ են վստահում

Երբ կինը նրան իսկապես վստահում է, դա նրա համար դառնում է սրբազան երևույթ։ Դա միաժամանակ ուժի և պատասխանատվության զգացում է, նպատակի գիտակցում՝ լինել հոգատար, ուշադիր, ազնիվ։

Երբեմն վստահությունն ավելի թանկ է, քան բուն սերը։

Այն մղում է տղամարդուն դառնալ ավելի լավը ոչ թե հանուն գովասանքի, այլ հանուն նրա, ով իրեն վստահել է։

Տղամարդիկ հազվադեպ են բարձրաձայնում այս մասին, բայց հոգու խորքում զգում են դա։ Նրանք ուզում են լինել ընտրված, հասկացված և ընդունված։

Մի աշխարհում, որն անընդհատ նրանցից պահանջում է ուժ, վճռականություն և անսասանություն, նրանց պետք է գոնե մեկ մարդ, ում կողքին կարելի է շունչ քաշել, թուլացնել զգոնությունը, լինել մեղմ։ Լինել պարզապես մարդ։

Եվ դա թուլություն չէ։ Դա իսկականն է։