7 նշան, որ ձեր կողքին ստոր մարդ է

Նենգությունն ու ստորությունը հազվադեպ են արտահայտվում բացահայտ ագրեսիայով։ Դրանք գործում են լուռ ու աննկատ՝ ներսից աստիճանաբար քայքայելով ձեր անձնական սահմանները, վստահությունն ու ապահովության զգացումը։ Հոգեբանության մեջ այսպիսի վարքագիծը հաճախ կապում են թաքնված նարցիսիզմի ու միտումնավոր մանիպուլյացիայի հետ։ Նման մարդկանց միշտ չէ, որ հնարավոր է անմիջապես ճանաչել. նրանք կարող են լինել հմայիչ, ուշադիր և նույնիսկ հոգատար։ Բայց այդ դիմակի տակ հաճախ թաքնված է սառը հաշվարկն ու հանուն սեփական շահի ամեն ինչի գնալու պատրաստակամությունը։

Ստորությունը հույզերի պոռթկում չէ, այլ կայուն վարքագիծ։ Եվ այն ունի իր հստակ նշանները, որոնք ժամանակի ընթացքում ավելի ու ավելի տեսանելի են դառնում։

1. Նա հեշտությամբ դավաճանում է ու ձևացնում, թե բան չի եղել

Ստոր մարդու համար դավաճանությունը ոչ թե ներքին կոնֆլիկտ է կամ բարոյական երկընտրանք, այլ ընդամենը գործիք։ Նա կարող է հանգիստ խախտել պայմանավորվածությունները, ամենակարևոր պահին հուսախաբ անել կամ ուրիշներին պատմել ձեր գաղտնիքները՝ առանց խղճի խայթ զգալու։

Ամենավատն այստեղ ոչ թե բուն արարքն է, այլ նրա արձագանքը։ Նա կա՛մ նվազեցնում է կատարվածի կարևորությունը, կա՛մ էլ հոգեբանական ճնշման (գազլայթինգի) միջոցով ամեն ինչն այնպես է շրջում, որ դուք ինքներդ եք սկսում կասկածել ձեր ադեկվատությանը։ Այսպես նա խուսափում է պատասխանատվությունից, ու դա դառնում է սովորություն։

2. Նա ասում է մի բան, անում՝ լրիվ այլ, և սա պատահական չէ

Խոսքի ու գործի անհամապատասխանություն բոլորիս մոտ էլ պատահում է։ Բայց ստոր մարդկանց մոտ դա ոչ թե բացառություն է, այլ ապրելակերպ։

Նրանց խոստումները շատ համոզիչ են հնչում, ծրագրերը՝ տրամաբանական, բայց իրականում ամեն ինչ այլ կերպ է ստացվում։ Ընդ որում՝ նրանք միշտ ունենում են արդարացումներ, որոնք այնքան անթերի են ձևակերպված, որ դժվար է հակափաստարկ գտնել։ Այս մարտավարությունը նպատակաուղղված կերպով ձեր մեջ կոգնիտիվ դիսոնանս է առաջացնում. դուք տեսնում եք վատ արարքներ, բայց լսում եք «իդեալական» պատճառաբանություններ։

Ժամանակի ընթացքում սկսում եք հասկանալ, որ գործ ունեք ոչ թե իրական մարդու, այլ արհեստականորեն կերտված և խնամքով պահպանվող մի կերպարի հետ։

3. Նա վստահությունն օգտագործում է որպես զենք

Այս տեսակի մարդկանց համար վստահությունը ոչ թե արժեք է, այլ ինֆորմացիա կորզելու միջոց։ Նա ուշադիր լսում է ձեզ, ճիշտ հարցեր է տալիս, մտերմության պատրանք է ստեղծում։ Սակայն դա արվում է ոչ թե հարաբերություններ կառուցելու, այլ ձեր մասին տվյալներ հավաքելու և վերահսկողության հասնելու համար։

Անկեղծության պահին ասված ցանկացած խոսք հետագայում անպայման կօգտագործվի ձեր դեմ՝ վեճի ժամանակ, մանիպուլյացիաներում կամ նրբորեն ցավեցնելու նպատակով։ Ու դա կարվի ամենաանսպասելի ու խոցելի պահին։

4. Նա ձեզ է մեղավոր հանում անգամ իր սեփական սխալների համար

Նրանց ամենաքայքայիչ հատկություններից մեկը իրականությունը գլխիվայր շրջելու տաղանդն է։ Անգամ եթե ակնհայտ է, որ նա է սխալ վարվել, խոսակցությունը կավարտվի նրանով, որ դուք ձեզ մեղավոր կզգաք։

Հոգեբաններն այս մարտավարությունը կոչում են DARVO (ժխտում, հարձակում և զոհի ու մեղավորի դերերի փոխանակում)։ Նա կշեղի թեման, կհիշեցնի անցյալի դեպքեր, կստիպի ձեզ կասկածել սեփական հիշողությանը։ Արդյունքում դուք ոչ միայն հարցի պատասխանը չեք ստանա, այլև կկորցնեք վստահությունը ինքներդ ձեր հանդեպ։

Կարդացեք նաև՝ Ստորության համար միշտ հատուցում է գալիս. դա միայն ժամանակի հարց է

5. Տարբեր մարդկանց հետ նա իրեն լրիվ տարբեր կերպ է պահում

Նենգ մարդիկ հազվադեպ են միատեսակ լինում բոլորի հետ։ Նրանք շատ լավ զգում են իրավիճակն ու հարմարվում դրան։

Մեկի հետ նա կարող է լինել մեղմ ու հոգատար, մյուսի հետ՝ սառն ու արհամարհական։ Սա ոչ թե բնավորության ճկունություն է, այլ սառը հաշվարկ. նա ընտրում է այն վարքագիծը, որն այդ պահին իրեն ձեռնտու է։ Այս սոցիալական «դիմակավորումը» նաև օգնում է մեկուսացնել զոհին։ Քանի որ շրջապատողները տեսնում են միայն նրա դրական կողմը, նրանք դժվարությամբ են հավատում, երբ պատմում եք նրա իրական դեմքի մասին։

6. Պատասխանատվություն ստանձնելու փոխարեն՝ նա միայն արդարացումներ է փնտրում

Անգամ ամենաակնհայտ իրավիճակներում նա երբեք ուղիղ չի ընդունում իր սխալը։ Փոխարենը միանգամից մեջտեղ են գալիս հազարավոր բացատրություններ ու արտաքին պատճառներ։

Մեղավորը միշտ ուրիշներն են՝ հանգամանքները, կյանքը կամ ձեր «սխալ ընկալումը»։ Սա ստեղծում է փակ շրջանի տպավորություն, որտեղ ոչինչ երբեք չի փոխվում, քանի որ մարդն ուղղակի հրաժարվում է վերլուծել իր արարքներն ու սովորել սեփական սխալների վրա։

7. Նրա կողքին դուք կամաց-կամաց կորցնում եք ինքներդ ձեզ

Ամենակարևոր ազդանշանը ձեր ներքին վիճակն է։ Ստոր մարդու կողքին միշտ կա լարվածություն, անբացատրելի տագնապ և զգացողություն, որ պետք է անընդհատ զգոն լինել։ Դուք սկսում եք վերահսկել ձեր ամեն մի բառն ու շարժումը՝ նոր կոնֆլիկտից խուսափելու համար։

Ժամանակի ընթացքում այս մշտական սթրեսը վերածվում է ինքնակասկածի, ինքնագնահատականի անկման և ներքին անկայունության։ Հենց սա է ամենագլխավոր նշանն այն բանի, որ ձեր կողքին գտնվող մարդը թունավոր է, իսկ հարաբերությունները՝ վտանգավոր։

Ստորությունը միանգամից ու ակնհայտ չի դրսևորվում։ Այն բացահայտվում է կամաց-կամաց՝ կրկնվող մանր արարքների միջոցով։ Առանձին վերցրած՝ այդ արարքները գուցե կարելի է ինչ-որ կերպ արդարացնել, բայց միասին դրանք ստեղծում են հստակ ու վտանգավոր մի պատկեր։

Եթե սկսում եք նկատել նման նշաններ, կենսականորեն կարևոր է աչք չփակել դրանց վրա։ Որովհետև ստորությունը պատահականություն կամ վատ տրամադրության արդյունք չէ։ Դա գիտակցված ընտրություն է, որը մարդն անում է ամեն օր։