Երբեմն կանայք թաքցնում են արհամարհանքը նույնիսկ առաջին հայացքից լիովին քաղաքավարի թվացող խոսքերի հետևում։ Նույն արտահայտությունը բոլորովին այլ իմաստ կարող է ստանալ, երբ հնչում է հեգնանքով, սառը տոնով կամ թաքնված նյարդայնությամբ։ Ինչպես գրում է YourTango-ն, երբ կինը թաքուն արհամարհում է որևէ մեկին, դա երբեմն զգացվում է նաև նրա խոսքից՝ անտարբերության, հեգնանքի կամ քողարկված դժգոհության հազիվ նկատելի երանգներով։
Կարևոր նրբություն․ ինքնին որևէ արտահայտություն դեռ արհամարհանքի ապացույց չէ։ Շատ բան կախված է խոսքի տոնից, իրավիճակից և մարդկանց միջև հարաբերություններից։
«Դու այնքան ինքնավստահ ես»
Հոդվածի հեղինակի խոսքով՝ այս արտահայտությունը երբեմն կարող է բոլորովին էլ հաճոյախոսություն չլինել։ Դրանով մարդուն կարող են ակնարկել, որ նա չափազանց մեծ կարծիք ունի իր մասին կամ իրեն չափից շատ բան է թույլ տալիս։ Ուղիղ քննադատելու փոխարեն դժգոհությունը պարզապես ներկայացվում է որպես ինքնավստահության մասին դրական դիտարկում։
«Երևի հաճելի է…»
Ինչպես նշում է պարբերականը, որոշ կանայք այսպես կարող են արձագանքել ուրիշի հաջողությանը կամ թանկարժեք գնումին, երբ քաղաքավարի խոսքերի հետևում իրականում նախանձ կամ դառնություն կա։ Հատկապես շատ բան կարող է հուշել այն տոնը, որով արտասանվում է այս արտահայտությունը։
«Ապրե՛ս»
Թվում է՝ սա սովորական գովեստ կամ աջակցության խոսք է։ Բայց որոշ իրավիճակներում այն կարող է հնչել սառը, անտարբեր կամ նույնիսկ հեգնական։ Օրինակ՝ մարդը լավ լուր է հայտնում, իսկ դիմացինը «Ապրե՛ս» է ասում այնպես, որ անկեղծ ուրախության փոխարեն ավելի շուտ զգացվում է վիրավորվածություն կամ դժգոհություն։
«Ես երբեք չէի կարող այդպես անել»
Այս խոսքերը երբեմն կարող են քողարկված քննադատություն լինել մարդու արտաքինի, հագուստի կամ վարքի հասցեին։ Թվում է՝ զրուցակիցը պարզապես ասում է, թե ինքն այդպես չէր վարվի, բայց իրականում ակնարկում է, որ դիմացինի ընտրությունն էլ ճիշտ կամ ընդունելի չի համարում։
«Դու բոլորովին չես փոխվել»
Եթե այս արտահայտությունն ասվում է սառը կամ ընդգծված տոնով, այն կարող է բոլորովին էլ հաճոյախոսություն չլինել։ Հոդվածում նշվում է, որ այս կերպ կարելի է ակնարկել, թե մարդու բնավորության կամ վարքի մեջ տարիների ընթացքում ոչ մի դրական փոփոխություն չի եղել՝ առանց դա ուղիղ ասելու։
«Դու միշտ հետաքրքիր ընտրություններ ես անում»
Այստեղ ամեն ինչ կախված է «հետաքրքիր» բառից։ Երբեմն այն պարզապես փոխարինում է ավելի ուղիղ գնահատականներին՝ «անհաջող», «տարօրինակ» կամ նույնիսկ «սարսափելի»։ Բառի երկիմաստությունն էլ թույլ է տալիս իրական վերաբերմունքը չարտահայտել բաց տեքստով։
«Ես պարզապես փորձում եմ օգնել»
Այս արտահայտության տակ երբեմն կարող է թաքնված լինել բավական կոշտ քննադատություն։ Օրինակ՝ մարդու հագուստի կամ արտաքինի մասին վիրավորական դիտողություն անելուց հետո կարելի է ասել, թե դա ընդամենը օգնելու ցանկությունից էր։ Մինչդեռ իրականում նման խոսքերը երբեմն ավելի շատ մեծամտություն են արտահայտում, քան հոգատարություն։
«Չէի սպասում քեզ այստեղ տեսնել»
Առանձին վերցրած՝ այս արտահայտությունը միանգամայն չեզոք է թվում։ Բայց որոշ իրավիճակներում այն կարող է հնչել այնպես, կարծես մարդու ներկայությունն այնքան էլ ցանկալի չէ։ Այդպիսի խոսքը հեշտությամբ կարող է զրուցակցին անհարմար դրության մեջ գցել։
«Ես իսկապես շատ ուրախ եմ քեզ համար»
Այս դեպքում ուշադրության կենտրոնում «իսկապես» բառն է։ Եթե մարդը հարկ է համարում հատուկ շեշտել, որ իր ուրախությունն անկեղծ է, դա երբեմն կարող է հուշել, որ հարաբերություններում որոշակի լարվածություն կամ մրցակցություն կա։
Գրանցվիր մեր 
