Թեև ընդունված է ասել, որ գեղեցկությունը ճաշակի հարց է, նոր գիտական հետազոտությունը ցույց է տվել, որ դեմքի որոշ գծեր մարդկանց մեծամասնությանն ավելի գրավիչ են թվում։ Այս մասին գրում է Daily Mail-ը։
Պարբերականը ներկայացրել է միջազգային հետազոտական խմբի եզրակացությունները։ Գիտնականներն ուսումնասիրել են մարդկանց դեմքերի 601 եռաչափ սկանավորում։ Հետազոտության ամբողջական արդյունքները հրապարակվել են «Influence of facial shape on perceived attractiveness» գիտական աշխատանքում։
Ինչպե՞ս է անցկացվել հետազոտությունը
Հետազոտությանը մասնակցել են 21-ից 35 տարեկան երիտասարդներ։ Յուրաքանչյուր մասնակցի դեմքի բարձր ճշգրտությամբ 3D մոդել է ստեղծվել, իսկ դրա կառուցվածքը նկարագրվել է 1021 թվային հենակետի միջոցով։
Դրանից հետո վեց անկախ փորձագետներ՝ երեք տղամարդ և երեք կին, գնահատել են յուրաքանչյուր դեմքի գրավչությունը։ Գնահատականները տրվել են 0-ից 100 միավորանոց սանդղակով։
Կանացի դեմքի ո՞ր գծերն են ավելի գրավիչ համարվել
Վերլուծությունը ցույց է տվել, որ կանացի դեմքերի դեպքում օրինաչափություններն ավելի հստակ են եղել։
Ավելի բարձր գնահատականներ են ստացել ավելի նեղ դեմքով, քիչ արտահայտված այտերով, ավելի լի շուրթերով և հստակ ուրվագծերով կանայք։
Ավելի գրավիչ են համարվել նաև նեղ քիթը և դրա փոքր-ինչ առաջ ցցված ծայրը։
Գիտնականները պարզել են․ կանացի դեմքերը միջինում ավելի գրավիչ են համարվում, քան տղամարդկայինը
Տղամարդկային դեմքի ո՞ր գծերն են ավելի գրավիչ համարվել
Տղամարդկանց դեմքերի վերաբերյալ արդյունքներն այդքան միանշանակ չեն եղել։
Այնուամենայնիվ, ավելի բարձր գնահատականներ հիմնականում ստացել են արտահայտիչ ստորին ծնոտ, անկյունային դիմագծեր և դեմքի հստակ ուրվագիծ ունեցող տղամարդիկ։
Գրավչությունը մեկ դիմագծով չի որոշվում
Միևնույն ժամանակ հետազոտության հեղինակները զգուշացրել են, որ արդյունքները չպետք է չափազանց պարզեցված մեկնաբանել։
«Գրավիչ դեմքը չի որոշվում միայն կատարյալ քթով կամ ծնոտով։ Կարևոր է դեմքի բազմաթիվ գծերի բնական ներդաշնակությունը», — նշել են հետազոտողները։
Daily Mail-ը նաև ներկայացնում է հոգեբանների տեսակետը, ըստ որի՝ արտաքինի գնահատումը միայն դեմքի կառուցվածքով չի սահմանափակվում։
Մարդու ուղեղը զրուցակցի մասին առաջին տպավորությունը ձևավորում է ընդամենը մի քանի ակնթարթում։ Գեղեցկության ընկալման վրա ազդում են ոչ միայն կենսաբանական գործոնները, այլև մարդու կենսափորձը, մշակութային միջավայրը և արտաքինի որոշ տեսակների նկատմամբ ձևավորված սովորությունը։
Որտե՞ղ կարող են կիրառվել հետազոտության արդյունքները
Հետազոտողների կարծիքով՝ ստացված տվյալները կարող են օգտակար լինել օրթոդոնտների, դիմածնոտային վիրաբույժների և պլաստիկ վիրաբույժների համար։
Միևնույն ժամանակ նրանք ընդգծում են, որ գեղեցկության համընդհանուր «բանաձև» գոյություն չունի։ Գրավչությունը ձևավորվում է դեմքի օբյեկտիվ առանձնահատկությունների և յուրաքանչյուր մարդու անհատական ընկալման համադրությամբ։
Ո՞ր հայտնի մարդիկ են համապատասխանում այս չափանիշներին
Daily Mail-ի լրագրողներն իրենց հերթին նկատել են, որ գիտնականների առանձնացրած չափանիշներին համապատասխանում են մի շարք հայտնի մարդիկ, որոնց շատերը համարում են գեղեցկության և գրավչության օրինակներ։
Կանանցից նշվել են դերասանուհի Մարգո Ռոբին և ֆոտոմոդել Էլզա Հոսքը, իսկ տղամարդկանցից՝ ֆոտոմոդել Դևիդ Գենդին և դերասան Հենրի Քավիլը։
Գրանցվիր մեր 
