Ներկայացնում ենք օգտակար մի քանի խորհուրդ, որոնք վերաբերում են հագուստի, իրերի պահպանմանը և խնամքին.

Վաղուց չօգտագործված հագուստը, նախքան արդուկելը, պետք է սրբել անուշադրի սպիրտի թույլ լուծույթով (1 թեյի գդալ՝ 1 բաժակ ջրին)։ Այն թարմացնում է գույնը։

Եթե հագուստի վրա ցեխի հետքեր կան, թողնել որ չորանան, ապա խոզանակել։ Եթե, այնուամենայնիվ, հետքերը մնան, ապա մաքուր շորը թրջել բորակի թույլ լուծույթի մեջ և սրբել։

Մի շտապեք հանած հագուստը տեղավորել պահարանում։ Ինչո՞ւ։ Մարդու մաշկի ծակոտիների միջոցով օրական գոլորշիանում է մոտ մեկ լիտր հեղուկ։ Գոլորշիները «ֆիլտրվում են» կտորի միջոցով։ Այդ «զտիչը»՝ կտորը պետք է ազատել գոլորշիների մնացորդներից։

Տաբատները և շրջազգեստները կախել միայն գոտուց, որպեսզի ծալքեր չառաջանան։

Եթե արդուկելիս կոստյումի վրա փայլ է առաջացել, այն սրբել թունդ թեյի մեջ թրջած լաթով։

Եթե պիջակի օձիքը ճարպոտել է, 5գ կերակրի աղը լուծել 25գ 10 տոկոսանոց անուշադրի սպիրտի մեջ և սպունգով մաքրել օձիքը։

Եթե դուք պատին հենվելով կեղտոտել եք մուգ կոստյումը, ապա մի շտապեք խոզանակով հեռացնել կիրը։ Կոստյումը պետք է թափ տալ, ապա կեղտոտված տեղը շփել մի կտոր սև, խավոտ մահուդով։

Տաբատների վրայի մաշափայլը սրբել կտրտած հում կարտոֆիլով, թողնել չորանա, հետո խոզանակել։

Որպեսզի հագուստի ծալքերը հարթվեն (որոնց արդուկելն անհնար է), այն կախել ոչ մեծ սենյակում (լողասենյակ, խորդանոց)՝ տակը դնելով եռացրած ջրով լի կաթսա և պինդ փակել դուռը։