Հրաշալի առակ երջանիկ և հաջողակ լինելու մասին և ոչ միայն.

Մի մարդ երազում տեսնում է մի խանութ, որտեղ վաճառողը հենց ինքը՝ Աստվածն է:

-Տեր Աստված, սա իսկապես Դո՞ւ ես, – երջանկացած հարցնում է նա:

-Այո, իսկապես Ես եմ:

–Իսկ ի՞նչ կարելի է Քո խանութից գնել:

– Ամեն ինչ, ինչ ցանկանաս…

– Ուրեմն, տուր ինձ առողջություն, երջանկություն, սեր, հաջողություն ու շատ փող:

Աստված բարյացակամ ժպտաց ու գնաց ետնասենյակ: Որոշ ժամանակ անց Նա վերադարձավ փոքրիկ թղթե մի տուփ բերելով:

– Այսքան մի բա՞ն,- զարմացած ու հիասթափված հարցրեց մարդը, – չէ՞ որ այնքան շատ բան էի ուզել:

– Այո, -պատասխանեց Աստված, – մի՞թե չգիտեիր, որ Ես միայն սերմեր եմ վաճառում…