Ընկերությունը լավ բան է, բայց երբեմն հենց ամենամտերիմ մարդիկ են անցնում թույլատրելիի սահմանները։ Նրանք կարող են պարտքով գումար խնդրել, խառնվել Ձեր անձնական կյանքին, իրենց ուզածի պես տնօրինել Ձեր ժամանակը և նույնիսկ նեղանալ, երբ մերժում եք։ Իսկ ամենադժվարն այն է, որ ընկերոջն «ոչ» ասելը հաճախ շատ ավելի բարդ է, քան անծանոթ մարդուն մերժելը։ Սակայն կան բաներ, որոնց չպետք է համաձայնեք նույնիսկ ամենամտերիմ մարդկանց խնդրանքով։
Կան խնդրանքներ, որոնք չարժե կատարել նույնիսկ տարիների ընկերությունը պահպանելու համար։ Եվ դա ամենևին էլ եսասիրություն չէ։ Պարզապես իսկական մտերմությունը չի նշանակում, որ Դուք պետք է անընդհատ զիջեք ու զոհաբերեք սեփական շահերը։
1. Պարտքով մեծ գումար տալ, եթե չեք կարող Ձեզ թույլ տալ կորցնել այն
«Օգնիր, մինչև աշխատավարձ ստանամ», «Քեզնից բացի ոչ ոքի չեմ կարող դիմել»։ Ծանո՞թ խոսքեր են։
Եթե խնդրվող գումարը Ձեզ համար մեծ է, չարժե վտանգել սեփական ֆինանսական վիճակը։ Հատկապես, եթե այդ մարդը նախկինում էլ է պարտքով գումար վերցրել և ժամանակին չի վերադարձրել։
Ընկեր լինելը չի նշանակում, որ պարտավոր եք ցանկացած պահի գումար տալ։
2. Անընդհատ լուծել ուրիշների խնդիրները
Մի բան է դժվար պահին ընկերոջն օգնելը, մեկ այլ բան՝ մշտապես նրա սխալների հետևանքները վերացնելը։
Եթե ընկերոջ յուրաքանչյուր զանգից հետո պարզվում է, որ կրկին պետք է ինչ-որ հարց լուծեք նրա փոխարեն, արժե մտածել՝ արդյոք միայն Դուք չեք ջանք թափում այդ ընկերությունը պահպանելու համար։
3. Ստել ուրիշի շահերի համար
Ընկերոջը պաշտպանելու համար ստել նրա զուգընկերոջը, ղեկավարի առաջ արդարացում հորինել կամ հաստատել մի պատմություն, որին ինքներդ չեք հավատում։
Երբեմն նման խնդրանքները նույնիսկ ներկայացվում են որպես ընկերության փորձություն։
Բայց եթե ընկերն ուզում է, որ Դուք ստեք իր փոխարեն, դա դեռ չի նշանակում, որ պարտավոր եք համաձայնել։
4. Անընդհատ փոխել սեփական ծրագրերն ու հարմարվել ուրիշներին
Ընկերը ձանձրանում է՝ Դուք պետք է գնաք նրա մոտ։ Նա շտապ խոսելու կարիք ունի՝ Ձեր գործերը կարող են սպասել։ Նա նորից ուշանում է՝ Դուք նորից սպասում եք։
Մեկ-մեկ սեփական ծրագրերը փոխելն ու ընկերոջը հարմարվելը բնական է։ Դա ուշադրության և հոգատարության նշան է։ Բայց երբ դա մշտական է դառնում, դիմացինը սկսում է մտածել, թե կարող է տնօրինել Ձեր ժամանակն այնպես, ինչպես իրեն է հարմար։
Կրկին համաձայնվեցի, թեև չէի ուզում․ ինչո՞ւ չենք կարող պարզապես ոչ ասել
Ինչո՞ւ է այդքան դժվար մերժել մարդկանց, և ինչպե՞ս սովորել «ոչ» ասել՝ առանց մեղքի զգացումով տանջվելու։
5. Պահել գաղտնիքներ, որոնք կարող են վնասել ուրիշներին
Յուրաքանչյուր մարդ ունի անձնական կյանքի և գաղտնիքներ պահելու իրավունք։ Բայց մի բան է անձնական գաղտնիքը, բոլորովին այլ բան՝ բռնությունը, վտանգավոր արարքը կամ լուրջ խաբեությունը թաքցնելու խնդրանքը։
Թույլ մի տվեք, որ «գաղտնիք պահելը» Ձեզ դարձնի ուրիշի արարքների մեղսակիցը։
6. Մեղքի զգացումից դրդված գումար կամ իրեր տալ
«Ես կարծում էի՝ մենք ընկերներ ենք», «Մի՞թե ափսոսում ես ինձ համար», «Ես քո փոխարեն ամեն ինչ կանեի»։
Եթե մարդը հանգիստ խնդրելու փոխարեն փորձում է ստիպել Ձեզ մեղավոր զգալ, դա արդեն լուրջ ազդանշան է։
Օգնությունը պետք է լինի Ձեր ցանկությամբ, ոչ թե այն պատճառով, որ ինչ-որ մեկը կարողացել է մեղքի զգացում առաջացնել Ձեր մեջ։
7. Հանդուրժել վիրավորանքներն ու նվաստացումները
Նույնիսկ եթե ընկերը կյանքի դժվար շրջան է ապրում, դա նրան իրավունք չի տալիս իր զայրույթը Ձեզ վրա թափել, ուրիշների ներկայությամբ նվաստացնել կամ ծաղրել Ձեր թույլ կողմերը։
Կարելի է հասկանալ, որ մարդը դժվարություններ ունի, բայց դա չի նշանակում, որ պետք է թույլ տաք նրան ոտնահարել Ձեր արժանապատվությունը։
Երբ լույս ես ճառագում, զայրացնում ես մթության մեջ ապրողներին
MEDIAMAG TV
8. Հրաժարվել սեփական սկզբունքներից՝ հարաբերությունները պահպանելու համար
Ամենավտանգավորն այն խնդրանքներն են, որոնց համաձայնելու դեպքում ստիպված եք լինում դեմ գնալ սեփական համոզմունքներին։
Կարևոր չէ՝ խոսքը գումարի, անձնական հարաբերությունների, աշխատանքի, թե այլ մարդկանց նկատմամբ վերաբերմունքի մասին է։
Եթե ընկերությունը պահպանելու համար անընդհատ ստիպված եք հրաժարվել Ձեր սկզբունքներից, գուցե խնդիրը ոչ թե Ձեր մերժումների, այլ հենց այդ ընկերության մեջ է։
Ինչպե՞ս մերժել՝ առանց խոսակցությունը վեճի վերածելու
Պետք չէ երկար-բարակ արդարանալ կամ բազմաթիվ պատճառներ բերել։ Որքան շատ եք փորձում բացատրել, թե ինչու չեք կարող օգնել, այնքան ավելի շատ հնարավորություն եք տալիս դիմացինին՝ Ձեզ հակառակը համոզելու։
Երբեմն բավական է պարզապես ասել.
«Հասկանում եմ, որ օգնության կարիք ունես, բայց ես չեմ կարող դա անել»։
Եվ մի կարևոր բան էլ. ուշադրություն դարձրեք, թե մարդն ինչպես է արձագանքում Ձեր մերժմանը։ Դա կարող է շատ բան պատմել նրա մասին։
Իսկական ընկերը կարող է նեղվել կամ հիասթափվել, բայց չի փորձի Ձեզ պատժել իր նեղացած պահվածքով, սպառնալ կամ մեղադրել միայն այն բանի համար, որ Դուք նույնպես ունեք անձնական սահմաններ։
Գրանցվիր մեր 
