Կյանքում լինում են շրջաններ, երբ թվում է՝ ամեն ինչ միանգամից վատ ուղղությամբ է գնում, և նույնիսկ դժվար է հասկանալ՝ արդյոք իսկապես սիրում եք ինքներդ ձեզ ու հոգ եք տանում ձեր մասին։ Աշխատանքում գործերը կուտակվում են, տանը մթնոլորտը լարված է, իսկ առավոտյան հայելու մեջ նայելն էլ առանձնապես տրամադրություն չի բարձրացնում։
Խնդիրներն իրար վրա են գալիս՝ ինչպես լվացարանի մեջ կուտակված կեղտոտ ափսեները, և մի պահ սկսում եք մտածել, որ այլևս ոչինչ չեք կարողանում վերահսկել։ Անհանգստությունն աճում է, ինքնավստահությունը՝ նվազում, իսկ ամենափոքր խնդիրն անգամ կարող է թվալ իսկական աղետ։
Սակայն մարդու ներքին վիճակը հաճախ երևում է ամենասովորական կենցաղային սովորություններից։ Առաջարկում ենք ստուգել, թե այս 15 սովորություններից քանիսն արդեն կան ձեր կյանքում։ Հնարավոր է՝ իրականում ամեն ինչ շատ ավելի լավ եք կառավարում, քան ինքներդ եք կարծում։
Սկսենք լավ նորությունից
Եթե երբեմն ձեզ թվում է, թե կյանքն ընթանում է՝ առանց ձեր մասնակցության, ապա այդ զգացողությունն ամենևին միայն ձեզ ծանոթ չէ։
British Gas-ի պատվերով Perspectus Global-ի անցկացրած հարցմանը մասնակցել է 2 000 բրիտանացի մեծահասակ։ Հարցվածների 56%-ը կարծում է, որ ոչ ոք երբեք ամբողջությամբ չի կարողանում վերահսկել իր կյանքը, իսկ 50 տարեկանը միջինում այն տարիքն է, երբ մարդիկ սկսում են զգալ, որ իրենց կյանքն ավելի կարգավորված ու վերահսկելի է։ Այս տվյալներին անդրադարձել է նաև The Mirror-ը։
Այնպես որ դուք ոչ մի տեղից չեք ուշացել։ Պարզապես դեռ ճանապարհի մեջ եք։ Իսկ հիմա նայեք այս ցանկին։
1. Դուք կարողանում եք ասել «ոչ»
Խնդրանք, որը կատարել ընդհանրապես չեք ցանկանում, երեկույթ, ուր գնալու տրամադրություն չունեք, հանգստյան օրերին առաջարկված լրացուցիչ աշխատանք․ դուք կարողանում եք նման բաներից հանգիստ հրաժարվել։
Ընդ որում՝ դրա համար էջերով բացատրություններ չեք գրում և հետո ժամերով ինքներդ ձեզ չեք մեղադրում։
Հենց այսպես են դրսևորվում առողջ անձնական սահմանները։ Եվ ոչ, դա եսասիրություն չէ։
2. Ձեզ լավ է նաև ինքներդ ձեզ հետ
Ուրբաթ երեկոն առանց որևէ ծրագրի ձեզ չի վախեցնում։
Կարելի է սերիալ դիտել, համեղ մի բան պատրաստել կամ պարզապես լռության մեջ նստել ու կարդալ սիրելի գիրքը։
Միայնակ մնալը ձեզ համար հանգստանալու հնարավորություն է, ոչ թե անհանգստության պատճառ։
Մարդը, որը լավ է զգում սեփական ընկերակցությամբ, ստիպված չի լինում կառչել առաջին իսկ պատահած մարդկանցից միայն նրա համար, որ մենակ չմնա։
3. Վերադառնալուց հետո նույն օրը դատարկում եք ճամպրուկը
Արձակուրդից վերադարձած ճամպրուկը, որը շաբաթներով մնում է սենյակի մեջտեղում, շատերին ծանոթ պատկեր է։
Եթե տուն հասնելուց հետո նույն օրը դասավորում եք իրերը, լվացքի ենթակա հագուստը մի կողմ եք դնում և ճամպրուկը վերադարձնում իր տեղը, նշանակում է՝ չեք սիրում կիսատ թողնել գործերը։
Բացի այդ, հաջորդ առավոտ ստիպված չեք լինում տունը տակնուվրա անել՝ պարզապես մի զույգ գուլպա գտնելու համար։
4. Դուք գիտեք, թե ուր է գնում ձեր աշխատավարձը
Խելամիտ տնտեսելը բոլորովին չի նշանակում ապրել միայն հնդկաձավարով ու կեֆիրով և հրաժարվել բոլոր հաճույքներից։
Պարզապես դուք պատկերացնում եք՝ որքան գումար է պետք կոմունալ վճարումների համար, որքան՝ սննդի, որքան կարելի է մի կողմ դնել արձակուրդի կամ որևէ այլ նպատակի համար։
Իսկ մնացած գումարը կարող եք ծախսել առանց մեղավորության զգացումի։
5. Դուք ունեք երկար տարիների ընկերներ
Ձեր կյանքում կան մարդիկ, որոնց ճանաչում եք ոչ առաջին տարին, և որոնք շարունակում են մնալ ձեր կողքին նույնիսկ այն ժամանակ, երբ ձեր կյանքում շատ բան է փոխվում։
Պարտադիր չէ ամեն օր գրել միմյանց կամ շաբաթը մեկ հանդիպել, որպեսզի մտերմությունը պահպանվի։
Այդպիսի ընկերությունը հիմնված է վստահության, ուշադրության և անհրաժեշտ պահին կողքին լինելու պատրաստակամության վրա։
6. Լվացարանում սպասք չի կուտակվում
Ընթրիքից հետո ափսեները լվանալը մի քանի րոպե է պահանջում։
Իսկ առավոտյան լվացարանի մեջ կուտակված կեղտոտ սպասքը կարող է փչացնել տրամադրությունը դեռ առաջին սուրճից առաջ։
Մարդը, որը սպասքը չի թողնում հաջորդ օրվան, իրականում փոքրիկ լավություն է անում իր վաղվա «ես»-ին։
7. Կարողանում եք ընդունել, որ սխալվել եք
Ձեզ համար դժվար չէ ասել․ «Այո, այս դեպքում ես սխալվել եմ»։
Դուք կարիք չունեք ամեն գնով ապացուցելու, որ միշտ ճիշտ եք։
Կարողանում եք լսել ուրիշի տեսակետը, վերանայել ձեր որոշումը և ընդունել սխալը, եթե այն իսկապես ձերն է։
Բոլորն էլ սխալվում են։ Շատ ավելի կարևոր է դրանից հետևություն անել և շարունակել առաջ շարժվել։
8. Հագուստը պահարանում է, ոչ թե աթոռի վրա
Աթոռի թիկնակին գցված շապիկը կամ վերնաշապիկը երբեմն այնտեղ է մնում օրերով։
Եթե ձեր հագուստը սովորաբար վերադարձնում եք իր տեղը, ապա առավոտյան ստիպված չեք լինում հագուստի կույտի մեջ փնտրել անհրաժեշտ սվիտերը։
Պարզ սովորություն է, բայց կյանքը զգալիորեն հեշտացնում է։
9. Բժշկի եք գնում ոչ միայն այն ժամանակ, երբ արդեն ցավը ստիպում է
Դուք ժամանակ եք գտնում կանխարգելիչ զննման համար, անհրաժեշտության դեպքում անալիզներ եք հանձնում և ատամնաբույժի այցը չեք հետաձգում մինչև այն պահը, երբ ցավն արդեն անտանելի է դարձել։
Սա ամենապարզ ձևերից մեկն է՝ առողջական փոքր խնդիրը լուրջ հետևանքի չհասցնելու համար։
10. Չեք վճարում վաղուց մոռացված բաժանորդագրությունների համար
Դուք թույլ չեք տալիս, որ ամիսներով կամ տարիներով չօգտագործվող ծառայությունները շարունակեն ձեր քարտից գումար գանձել։
Ժամանակ առ ժամանակ ստուգում եք բանկային գանձումները, նայում եք՝ որ ծառայություններից եք իսկապես օգտվում, իսկ ավելորդ բաժանորդագրությունները պարզապես անջատում եք։
Այդպես նույնիսկ փոքր գումարներն աննկատ չեն կորչում ամենամսյա ծախսերի մեջ։
11. Տանը պահեստային գուլպաներ, ատամի խոզանակ և սրբիչ ունեք
Տանը կա գուլպաների լրացուցիչ զույգ, նոր ատամի խոզանակ և մաքուր սրբիչ։
Դրա շնորհիվ ստիպված չեք որևէ իր օգտագործել այնքան ժամանակ, մինչև այն վերջնականապես մաշվի կամ այլևս օգտագործման ենթակա չլինի։
Դուք կարողանում եք ժամանակին հասկանալ, որ որևէ իր արդեն ծառայել է իր ժամանակը, և առանց մեծ դրամայի բաժանվել դրանից։
Սիրելի շապիկը կարող է կապված լինել հաճելի հիշողությունների հետ, բայց միայն դրա համար պարտադիր չէ այն պահել մինչև այն օրը, երբ արդեն կարելի կլինի հատակը մաքրել դրանով։
12. Դուք ինքներդ եք ընտրում ձեր գրաֆիկը
Ոչ բոլորին է հարմար աշխատանքը սկսել առավոտյան ժամը ութին և ավարտել ճիշտ երեկոյան վեցին։
Մեկն ավելի արդյունավետ է առավոտյան, մյուսը՝ կեսօրից հետո, իսկ երբեմն անձնական գործերի պատճառով պարզապես անհրաժեշտ է փոխել օրվա ռիթմը։
Եթե հնարավորություն ունեք ձեր աշխատանքային օրը հարմարեցնել ձեր սեփական ռիթմին և իսկապես օգտվում եք դրանից, նշանակում է՝ հաշվի եք առնում նաև ձեր կարիքները, այլ ոչ թե ապրում միայն ուրիշների թելադրած ժամանակացույցով։
13. Խոհանոցում կարգուկանոն է
Բացեք համեմունքների պահարանը։
Այնտեղ չկան փշրանքներ, դատարկ փաթեթներ կամ երեք տարի առաջ բացված ու արդեն անհասկանալի պարունակությամբ տոպրակներ։
Եթե այդպես է, հիանալի է։
Մաքուր ու կարգավորված խոհանոցում պատրաստելն ավելի հաճելի է, իսկ դուք միշտ գիտեք՝ ինչ ունեք և ինչն է վերջացել։
14. Մեքենայում և ննջասենյակում աղբ չի կուտակվում
Կոնֆետի թուղթը, դատարկ բաժակը կամ ուտելիքի տարան շատ հեշտ է մի կողմ դնել՝ մտածելով, որ հետո կգցեք։
Բայց հենց այդպիսի մանրուքներից էլ ժամանակի ընթացքում առաջանում է մշտական անկարգությունը։
Դուք աշխատում եք մեքենան կամ ննջասենյակը չվերածել աղբի ժամանակավոր պահեստի և սովորաբար անմիջապես հավաքում եք ձեր հետևից։
Արդյունքում տարածքը մաքուր է մնում ոչ թե այն պատճառով, որ ամեն օր մեծ մաքրություն եք անում, այլ որովհետև պարզապես չեք թողնում, որ քաոսը կուտակվի։
15. Դուք հավաքում եք անկողինը
Այստեղ կարելի է հիշել ամերիկացի ծովակալ Ուիլյամ Մաքրեյվենին։
2014 թվականին նա ելույթ էր ունենում Տեխասի համալսարանի շրջանավարտների առջև և խորհուրդ էր տալիս օրը սկսել անկողինը հավաքելուց։
Նրա խոսքով՝ առավոտյան կատարած առաջին փոքր գործը որոշակի ընթացք է տալիս ամբողջ օրվան։
Թվում է՝ ընդամենը անկողին եք հավաքել։ Բայց օրը արդեն սկսել եք փոքրիկ հաղթանակով։
Գրանցվիր մեր 
