Չինական մի քաղաքում կանգնած են երկու պատմական անձնավորությունների արձաններ, որոնք դարեր շարունակ խորհրդանշում են դավաճանությունն ու չարիքը։ Ամեն օր հարյուրավոր մարդիկ մոտենում են դրանց, ապտակում և նույնիսկ թքում վրան։ Նրանք անկեղծորեն համոզված են, որ այս պատմական գործիչներն արժանի են նման վերաբերմունքի նույնիսկ մահից երկար տարիներ անց։ Ովքե՞ր են նրանք, և ի՞նչ վատ բան են արել Չինաստանի համար։
Չմոռանաք բաժանորդագրվել մեր Telegram ալիքին:
Ցին Հուեյի և նրա կնոջ արձանները
Չինական Հանչժոու քաղաքի սրտում՝ հենց այն զորավարի վեհաշուք դամբարանի դիմաց, որին նրանք դավաճանել են, կանգնեցված են Ցին Հուեյի և նրա կնոջ արձանները։ Ծնկաչոք, գլուխները խոնարհած և ձեռքերը մեջքի հետևում կապած՝ նրանք կարծես հավերժ նվաստացման են դատապարտված։
Բայց սա անգամ բավարար չէ. հարյուրավոր մարդիկ ամեն օր ապտակում են, հարվածում և թքում այս թուջե կերպարների վրա՝ կարծես վրեժխնդրության հնագույն ծեսի մասնակցելով։ Հինգ դարերի ընթացքում արձանները փոխարինվել են արդեն 11 անգամ, և ներկայումս կանգնած են 1979 թվականի նմուշները։
Չինաստանի ամենահայտնի դավաճանները
Ցին Հուեյը 12-րդ դարում Սուն դինաստիայի կանցլերն էր և վճռորոշ դեր է ունեցել Ցզին դինաստիայի հետ խաղաղ բանակցություններում։ Սակայն չինացիների համար նա հերոս չէ։ Թշնամու հետ հաշտություն կնքելու համար նա զորավար Յուե Ֆեյին մեղադրեց անհնազանդության և պետական դավաճանության մեջ, որից հետո վերջինիս մահապատժի ենթարկեցին բանտում։
Իսկ չէ՞ որ Յուե Ֆեյը փայլուն հաղթանակներ էր տանում զավթիչների դեմ և դարձել էր նվիրվածության ու պատվի խորհրդանիշ։ Այս դավաճանության պատճառով Ցին Հուեյը դարձավ չարիքի և պետական դավաճանության մարմնացում։
Ատելությունն այս զույգի նկատմամբ այնքան ուժեղ է, որ ներթափանցել է նույնիսկ առօրյա կյանք։ Չինական հայտնի նախուտեստներից մեկը՝ յուտյաոն (յուղի մեջ տապակած խմորի երկարավուն կտորներ), երբեմն անվանում են «ճարպոտ սատանա»։ Համարվում է, որ այս անվանումը նույնպես կապված է Ցին Հուեյի և նրա կնոջ հետ։ Մարդիկ կարծես սիրում են «պատժել» նրանց ամեն կերպ, սակայն արձանները մնում են նրանց զայրույթի գլխավոր թիրախը։
Չինաստանի արտասովոր տեսարժան վայրը
Յուրաքանչյուր հարված և թուք հազարավոր մարդկանց աչքում արդարության վերականգնման փոքրիկ արարողություն է։ Արձաններին ապտակելու գայթակղությանը երբեմն չեն կարողանում դիմակայել նույնիսկ զբոսաշրջիկները։ Շատերի համար սա յուրօրինակ ծես է, որը հիշեցնում է հասարակության մեջ հավատարմության և ազնվության կարևորության մասին։
Կարդացեք նաև՝ Չինական դաստիարակության առանձնահատկությունները. ինչպես երեխայից «սուպերմարդ» սարքել
Չինաստանի պատմությունը բարդ է, և Ցին Հուեյի վերաբերյալ կարծիքները մինչ օրս հակասական են։ Սակայն դա գրեթե ոչինչ չի փոխում. հինգ դար անց նա և նրա կինը շարունակում են իրենց պատիժը կրել ժողովրդի կողմից, որը սրբորեն պահպանում է հավատարմության ու արդարության գաղափարները և երբեք չի մոռանում դավաճաններին։
Գրանցվիր մեր 
