Լեզուների ուսուցման Babbel հարթակի մասնագետներն առաջին անգամ մրցույթ են անցկացրել՝ պարզելու, թե որն է աշխարհի ամենագեղեցիկ բառը։ Նրանք ավելի քան 75 լեզվից հավաքել են 223 բառ, իսկ միջազգային ժյուրին դրանք գնահատել է ըստ հնչողության, իմաստի, հազվադեպության և մշակութային նշանակության։ Այս մասին գրել է գերմանական Bild թերթը։
Աշխարհի ամենագեղեցիկ բառը
Հաղթող է ճանաչվել մաորի լեզվի «կաիտիակիտանգա» (kaitiakitanga) բառը։
Մաորիները Նոր Զելանդիայի բնիկ ժողովուրդն են։
Այս բառը հայերենում ճշգրիտ համարժեք չունի։ Այն նշանակում է մարդու պատասխանատվությունը բնությունը պաշտպանելու և այն ապագա սերունդների համար պահպանելու հարցում։
Մաորիների աշխարհընկալմամբ՝ մարդիկ բնության տերը չեն։ Նրանք բնության մի մասն են և միաժամանակ՝ նրա պահապանները։
Ինչպե՞ս արտասանել
կաի-տի-ա-կի-տան-գա
Մաորիները Արևելյան Պոլինեզիայից եկած վերաբնակների ժառանգներն են։ Նրանց նախնիները Նոր Զելանդիայի կղզիներ են հասել մոտավորապես 1250–1300 թվականներին։
Մաորիների լեզուն կոչվում է թե ռեո մաորի։ Այն պատկանում է պոլինեզյան լեզուների խմբին և 1987 թվականից Նոր Զելանդիայի պաշտոնական լեզուներից մեկն է։
Ո՞ր բառերն են ընդգրկվել կարճ ցուցակում
Թեկնածուների թվում էին՝
- ճապոներեն «իկիգայ» բառը, որը նշանակում է կյանքի նպատակի զգացում,
- պորտուգալերեն «սաուդադե» բառը, որը նկարագրում է բացակայող մարդու կամ որևէ բանի հանդեպ խոր կարոտը,
- ուելսերեն «հիրաեթ» բառը, որը նշանակում է կարոտ կորցրած կամ նույնիսկ երբեք գոյություն չունեցած տան հանդեպ։
Եզրափակիչ փուլ էին հասել նաև բառեր, որոնց իմաստը դժվար է փոխանցել նույնիսկ ամբողջ նախադասությամբ։
Օրինակ՝ յագաներեն «մամիհլապինատապաի» բառը նկարագրում է այն պահը, երբ երկու մարդ նայում են միմյանց, և նրանցից յուրաքանչյուրը ցանկանում է, որ առաջին քայլն անի մյուսը։
Իսկ ֆիններեն «պորոնկուսեմա» բառը նշանակում է այն ճանապարհը, որը հյուսիսային եղջերուն կարող է անցնել մինչև միզելու համար հաջորդ կանգառը։
Ինչպե՞ս են ընտրել հաղթողին
Կազմակերպիչներն ուսումնասիրել են Reddit-ում, TikTok-ում և լեզուներին նվիրված տարբեր առցանց համայնքներում ընթացող քննարկումները։
Դրանից հետո կազմված ցանկը փոխանցվել է ժյուրիին, որի կազմում եղել են լեզվաբաններ, գրողներ և մշակույթի ոլորտի փորձագետներ։
Նրանք գնահատել են ոչ միայն բառերի գեղեցիկ հնչողությունը, այլև դրանց իմաստը, հազվադեպությունը և կապը տվյալ ժողովրդի մշակույթի հետ։
Գրանցվիր մեր 
