Քայլելու սովորությունից ելնելով՝ մարդկանց կարելի է պայմանականորեն բաժանել երկու խմբի՝ արագ և դանդաղ քայլողների։ Բավական է հետևել առավոտյան աշխատանքի շտապող մարդկանց, և այս տարբերությունն անմիջապես աչքի կընկնի։ Այս մասին գրում է Upworthy պարբերականը։
Ինչպես նշում է պարբերականը, արագ և դանդաղ քայլողները հաճախ նյարդայնացնում են միմյանց, հատկապես երբ փորձում են մարդաշատ փողոցով մի տեղ հասնել։ Սակայն հոգեբանական տեսանկյունից նրանց տարբերությունները միայն քայլելու արագությամբ չեն սահմանափակվում։
«Արագ քայլող մարդիկ ունեն բնավորության և անհատականության որոշակի գծեր, որոնք կապված են նրանց քայլելու տեմպի հետ։ Այդ կապը հաստատվում է նաև գիտական հետազոտություններով», – նշվում է հոդվածում։
Օրինակ՝ արագ քայլող մարդիկ հաճախ աչքի են ընկնում պարտաճանաչությամբ։
«Պարտաճանաչ մարդը սովորաբար կազմակերպված է, կարգապահ և վստահելի։ Նման մարդիկ կարողանում են ճիշտ տնօրինել իրենց ժամանակը և հստակ նպատակներով առաջնորդվել։ Հետազոտությունները ցույց են տալիս, որ արագ քայլողները հաճախ նպատակասլաց են նաև իրենց գործողություններում։ Նրանք կարողանում են արդյունավետ աշխատել, հետևողականորեն առաջ շարժվել և ժամանակն անտեղի չվատնել», – Upworthy-ին պատմել է հոգեբան Քրիսթալ Կաստանյոցը։
Հոգեբանն առանձնացրել է բնավորության ևս վեց գիծ, որոնք հաճախ հանդիպում են արագ քայլող մարդկանց մոտ։
Արագ քայլող մարդկանց բնավորության 6 գծերը
1
Նրանք շփվող են և եռանդուն
Արագ քայլող մարդկանց հաճախ բնորոշ է էքստրավերտությունը։ Նրանք սիրում են շփվել, ակտիվ կյանք վարել և ժամանակ անցկացնել մարդկանց շրջապատում։
«Էքստրավերտները սովորաբար շփվող, եռանդուն մարդիկ են, որոնք հաճույք են ստանում ուրիշների հետ հաղորդակցվելուց։ Նրանք ավելի ակտիվ են և իրենց լավ են զգում այնպիսի միջավայրում, որտեղ կարող են զբաղված լինել թե՛ ֆիզիկապես, թե՛ մտավոր առումով։
Հետազոտությունները ցույց են տալիս, որ էքստրավերտներն ավելի շատ են շարժվում, իսկ նրանց շարժուձևը սովորաբար ավելի աշխույժ է։ Արագ քայլելը նույնպես կարող է խոսել այդ եռանդի մասին», – բացատրում է Կաստանյոցը։
2
Նրանք ավելի հանգիստ են և հուզականորեն կայուն
Հոգեբանության մեջ կա «նևրոտիզմ» հասկացությունը, որը բնութագրում է մարդու հակվածությունը տագնապի, անհանգստության և սթրեսի նկատմամբ ուժեղ արձագանքի։
Հոգեբանի խոսքով՝ արագ քայլող մարդիկ հաճախ ունենում են նևրոտիզմի ավելի ցածր մակարդակ։ Նրանք սովորաբար ավելի հանգիստ են, հավասարակշռված և դժվար իրավիճակներում կարողանում են պահպանել ինքնատիրապետումը։
«Լայնածավալ հետազոտությունները ցույց են տվել, որ հուզականորեն կայուն մարդիկ հակված են ավելի արագ քայլելու։ Գիտնականների կարծիքով՝ պատճառներից մեկն այն է, որ նրանք ավելի քիչ ժամանակ ու էներգիա են վատնում անհանգստացնող մտքերի վրա։ Նրանք անվերջ չեն ծանրանում խնդիրների շուրջ և ավելի վստահ ու ազատ են շարժվում», – պարզաբանում է հոգեբանը։
3
Նրանք սիրում են նորություններն ու բացահայտումները
Արագ քայլող մարդիկ հաճախ հետաքրքրասեր են և պատրաստ նոր փորձառությունների։ Նրանց կարող է գրավել այն ամենը, ինչը նոր է, անսովոր կամ դեռևս չբացահայտված։
«Նոր փորձառությունների հանդեպ բաց լինելը կապված է հարուստ երևակայության, հետաքրքրասիրության և նոր բաներ փորձելու ցանկության հետ։
Իհարկե, այս հատկանիշի և քայլելու արագության միջև ուղիղ կապ չկա։ Սակայն նորի հանդեպ հետաքրքրությունն ու ոգևորությունը երբեմն կարող են արտահայտվել նաև շարժումների մեջ՝ ստիպելով մարդուն ավելի արագ քայլել», – ասում է Կաստանյոցը։
4
Նրանք բարյացակամ են և հեշտ են լեզու գտնում մարդկանց հետ
Արագ քայլող մարդիկ կարող են աչքի ընկնել նաև բարյացակամությամբ։ Նրանք հաճախ պատրաստ են համագործակցելու, հասկանալու ուրիշներին և հաշվի առնելու նրանց ցանկությունները։
«Բարյացակամությունը կապված է ջերմ վերաբերմունքի, կարեկցանքի և ուրիշների հետ համագործակցելու պատրաստակամության հետ։
Նման մարդիկ, օրինակ, կարող են իրենց քայլելու արագությունը հարմարեցնել կողքին քայլող մարդու տեմպին։ Եթե դիմացինը արագ է քայլում, նրանք նույնպես կարող են արագացնել քայլերը՝ նրան համընթաց շարժվելու համար», – նշում է հոգեբանը։
5
Նրանք ինքնավստահ են և կարողանում են պաշտպանել իրենց տեսակետը
Արագ քայլող մարդիկ հաճախ աչքի են ընկնում նաև ինքնավստահությամբ և հաստատակամությամբ։ Նրանք կարող են ավելի համարձակ լինել, քան դանդաղ քայլողները, և չեն վախենում անհրաժեշտության դեպքում նախաձեռնություն ցուցաբերել։
«Հոգեբանության մեջ սա անվանում են ասերտիվություն՝ սեփական կարծիքն ու դիրքորոշումը վստահ արտահայտելու, ինչպես նաև նախաձեռնություն ցուցաբերելու կարողություն։
Այսպիսի մարդիկ սովորաբար հստակ գիտեն, թե ինչ են ուզում և ուր են գնում։ Նրանց շարժումները նպատակաուղղված են, իսկ քայլվածքը՝ վստահ։ Հետազոտությունները նույնպես ցույց են տալիս, որ հաստատակամ մարդիկ հաճախ ավելի արագ են քայլում», – բացատրում է Կաստանյոցը։
6
Նրանք հավակնոտ են և ձգտում են հաջողության
Արագ քայլող մարդկանց բնորոշ մյուս հատկանիշը հավակնոտությունն է։ Նրանք հաճախ մեծ նպատակներ ունեն, ցանկանում են առաջ շարժվել և պատրաստ են ջանքեր գործադրել ցանկալի արդյունքին հասնելու համար։
«Հավակնոտ մարդիկ ներքին ուժեղ մղում ունեն զարգանալու, առաջադիմելու և իրենց համար կարևոր նպատակներին հասնելու։
Նրանք հաճախ շտապելու ներքին զգացողություն ունեն, և դա կարող է արտահայտվել նաև քայլելու արագությամբ։ Նման մարդիկ գնահատում են իրենց ժամանակը, սիրում են ակտիվ գործել և կենտրոնանում են այն ամենի վրա, ինչը կօգնի հասնել նախապես սահմանած նպատակներին», – եզրափակում է հոգեբան Քրիսթալ Կաստանյոցը։
Գրանցվիր մեր 
