Ինքնասիրությունը պարզապես գեղեցիկ խոսքեր կամ էգոիզմի դրսևորում չէ. այն առողջ, լիարժեք և ներդաշնակ կյանք կառուցելու անկյունաքարն է: Ժամանակակից աշխարհի խելահեղ ռիթմում մենք հաճախ տարվում ենք առօրյա հոգսերով, փորձում գոհացնել ուրիշներին՝ արդյունքում մոռանալով մեր իսկ հոգևոր և ֆիզիկական բարեկեցության մասին: Սեփական անձը գնահատելն ու խնամելը պահանջում են գիտակցված ջանքեր և ամենօրյա աշխատանք։ Ստորև ներկայացված են 10 գործնական և փորձված եղանակներ, որոնք կօգնեն ձեզ վերագտնել ինքներդ ձեզ, ամրապնդել ինքնագնահատականը և լցնել կյանքն իրական սիրով ու լույսով:
Չմոռանաք բաժանորդագրվել մեր Telegram ալիքին:
1. Ազատեք ձեր կյանքն ավելորդ խառնաշփոթից
Խոսքը ֆիզիկական, էմոցիոնալ և միջանձնային այն խառնաշփոթի մասին է, որը միայն շեղում է ձեզ անձնական աճի վրա կենտրոնանալուց: Ինքնախնամքն ու ինքնասիրությունը տարածություն և էներգիա են պահանջում՝ կատարելագործվելու և հոգևոր ու հոգեբանական բարեկեցության նոր բարձունքների հասնելու համար: Անհնար է դրան հասնել՝ ձեր կյանքում հանդուրժելով անհարկի ավելորդություններ:
Մաքրեք ձեր բնակության վայրը, քանի որ շրջապատող անկարգությունն ամեն օր հոգեբանորեն ճնշում է ձեզ: Կոկիկ և կազմակերպված տարածքը հրաշքներ է գործում տրամադրության հետ և օգնում է ավելի արագ կատարել գործերը, քանի որ ամեն ինչ իր տեղում է: Խզեք թունավոր կապերն այն մարդկանց հետ, ում ներկայությունը միայն ընկճում է ձեզ: Թույլ մի տվեք, որ նեգատիվ մարդիկ տեղ զբաղեցնեն ձեր մտքում և սրտում. նրանք այնտեղ անելիք չունեն, իսկ նրանց մասին ձեր անվերջ մտորումներն ուղղակի անօգուտ են: Վերանայեք ձեր անելիքների ցանկը. դադարեք փորձել օրական միլիոնավոր գործեր անել և փոխարենը առաջնահերթություն տվեք այն խնդիրներին, որոնք իրականում կարևոր են ձեզ համար և համապատասխանում են ձեր արժեքներին:
Հիշեք՝ որակը միշտ գերազանցում է քանակին, երբ խոսքը ինքնախնամքի մասին է: Ուստի ժամանակ ու եռանդ ներդրեք միայն այնպիսի հարաբերություններում, որոնք ձեզ ավելի երջանիկ են դարձնում, հետամուտ եղեք միայն ձեր ամենախոր ցանկություններին համապատասխանող նպատակներին և խնայեք ձեր էներգիան արժանավորների համար:
2. Ամեն օր անվերապահորեն սիրեք ինքներդ ձեզ՝ անկախ ամեն ինչից
Ցավոք, աշխարհում ոչ ոք չի կարող ձեզ տալ այս սերը, բացի ինքներդ ձեզնից: Մարդիկ, թեև ընդունակ են անսահման կարեկցանքի, միևնույն է՝ հաճախ սիրում են պայմանականորեն: Երբ ես ասում եմ անվերապահ սեր, նկատի ունեմ հենց անսահման, անսպառ և իրական անվերապահ սեր: Սա կարող է անհնարին թվալ, բայց արեք հնարավոր ամեն ինչ ինքներդ ձեզ սիրելու համար՝ անկախ ձեր կարիերայից, կարգավիճակից, ֆինանսական դրությունից կամ հարաբերություններից:
Այս մտածելակերպը զարգացնելու համար խստիվ խորհուրդ եմ տալիս կարդալ Քամալ Ռավիկանտի «Սիրիր քեզ այնպես, կարծես կյանքդ կախված է դրանից» գիրքը: Ինքդ քեզ անվերապահորեն սիրել՝ նշանակում է սիրել քո ողջ էությունը՝ ներառյալ թերությունները, ուժեղ կողմերը, գաղտնիքներն ու թուլությունները: Ձեր յուրաքանչյուր մասնիկը եզակի է և արժանի սիրո: Երբ դուք սկսում եք լիարժեք սիրել ինքներդ ձեզ, շատ արագ նկատում եք այն մարդկանց, ովքեր ձեզ չեն գնահատում, ինչն էլ հեշտացնում է կյանքն ավելորդ կապերից մաքրելու գործընթացը:
3. Համակողմանիորեն հոգ տարեք ձեր մասին
Աշխատանքի և հանգստի միջև ճիշտ հավասարակշռության պահպանումը չափազանց կարևոր է: Ինքնախնամքի հարցում մի կենտրոնացեք կյանքի միայն մեկ ոլորտի վրա: Էներգիայով լիցքավորեք ձեր մարմինը, սնուցեք ոգին և կրթեք միտքը: Մեդիտացիան անփոխարինելի է հոգևոր, էմոցիոնալ և մտավոր բարեկեցության համար: Յոգան, պիլատեսը, պարերն ու վազքը հիանալի միջոց են մարզավիճակը պահպանելու և տրամադրությունը բարձրացնելու համար: Գիտակցված սնվելը կօգնի պահպանել էներգիայի օպտիմալ մակարդակը՝ միաժամանակ նվազեցնելով հիվանդությունների ռիսկը:
Ընթերցանությունը, գրելը և ձեզ հետաքրքրող դասընթացներին մասնակցելը ձեր միտքը կպահեն սուր և զգոն վիճակում: Մի մոռացեք նաև առողջ սոցիալական կյանքի և ընկերական հարաբերությունների մասին, քանի որ դրանք այն կարևոր հոգեսոցիալական ռեսուրսներն են, որոնք ապահովում են աջակցություն և օգնում լիարժեք վայելել կյանքը:
4. Սահմանեք բարձր չափանիշներ և հավատարիմ մնացեք դրանց
Ինքնահարգանքը ինքնախնամքի հիմքն է: Այն թույլ չի տալիս բավարարվել քչով, երբ դուք արժանի եք լավագույնին: Ձեր սահմաններն ու արժեքները ոտնահարելու թույլտվությունը կործանարար է ինքնագնահատականի համար: Եթե դուք անընդհատ թույլ եք տալիս ուրիշներին անտեսել ձեր սպասելիքները, դուք արժեզրկում եք ինքներդ ձեզ:
Գուցե վախենում եք, որ բարձր չափանիշներ ունենալու դեպքում մարդիկ ձեզ կհամարեն չափազանց պահանջկոտ և նույնիսկ կհեռանան ձեզանից: Թող հեռանան: Դա նշանակություն չունի. իրականում նույնիսկ լավ է, որ նրանք ցույց են տալիս իրենց իրական դեմքն ու հեռանում: Վերջիվերջո, միակ բանը, որն իսկապես կարևոր է, այն է, թե ինչ եք դուք մտածում ձեր մասին և ինչի եք ձեզ արժանի համարում:
Կարիերայում և հարաբերություններում բարձր չափանիշներ ունենալը երկարաժամկետ հեռանկարում պաշտպանում ձեզ խաբեբաներից և էմոցիոնալ վամպիրներից, որոնք փորձում են սպառել ձեր էներգիան:
Դիտարկեք այն ամենը, ինչը ցածր է ձեր չափանիշներից, որպես անշահավետ գործարք: Դուք չեք ստանում այն, ինչ ուզում եք, մինչդեռ դիմացինը շահում է: Նման ներդրումն արդարացված չէ, եթե դրանից օգուտ է քաղում միայն մյուս կողմը:
5. Հետամուտ եղեք ձեր իրական նպատակներին ու կրքերին
Կյանքը չափազանց կարճ է էներգիան այնպիսի նպատակների վրա վատնելու համար, որոնք իրականում ձերը չեն: Սեփական անձի մասին հոգ տանել նշանակում է մնալ անկեղծ և ճանաչել սեփական կոչումը: Մի ընտրեք որևէ մասնագիտություն միայն այն պատճառով, որ հասարակությունն այն ճիշտ է համարում, մի հանդուրժեք վատ աշխատանքը միայն վարձը վճարելու համար և մի ընտրեք մասնագիտություն լոկ ֆինանսական շահի համար, եթե այն ձեզ չի ոգեշնչում:
Երբեմն գոյատևելու համար ստիպված կլինեք բավարարվել ունեցածով, բայց երբեք մի դադարեք փնտրել ձեր իրական կոչումն ու կատարելագործման ուղիները: Եթե, օրինակ, դուք մատուցող եք, ով երազում է հայտնի սցենարիստ դառնալ, ազատ ժամանակ անպայման աշխատեք ձեր սցենարի վրա: Երազանքներին ժամանակ տրամադրելը կենսական է, քանի որ դրանք այն միակ բանն են, որ ոչ ոք չի կարող ձեզանից խլել:
Գաղտնիքը պրագմատիզմն ու կիրքը համատեղելու մեջ է: Դուք չեք ծնվել պարզապես գոյատևելու համար. դուք ծնվել եք ձեր երազանքներին հասնելու համար: Մի վախեցեք անհաջողությունից. դա ընդամենը փորձ է, որը կկոփի ձեզ ապագա հաղթանակների համար:
Ի՞նչ կնախընտրեիք. ապրել ափսոսանքո՞վ՝ մտածելով, թե ինչ կլիներ, եթե փորձեիք, թե՞ ռիսկի դիմել ու ապրել հետաքրքիր կյանքով, որը կհանգեցնի ձեր իրական կոչմանը: Նորմալ է ունենալ տարբեր հետաքրքրություններ, բայց եթե կա մի երազանք, որն անընդհատ կանչում է ձեզ, սկսեք գործել հենց հիմա: Ուզո՞ւմ եք գիրք գրել՝ սկսեք բլոգից կամ առաջին գլխից: Ուզո՞ւմ եք շարունակել կրթությունը՝ ուսումնասիրեք հնարավոր ծրագրերը:
Ամենահաջողակ մարդիկ պասիվ երազողներ չեն. նրանք ամեն օր փոքրիկ քայլեր են անում՝ իրենց նպատակներն իրականություն դարձնելու համար:
Կարդացեք նաև՝ Ինչպես փրկել ինքնագնահատականը. շտապ հոգեբանական օգնության 10 հնարք
6. Նվազագույնի հասցրեք բոլորին գոհացնելու սովորությունը
Մարդկանց անընդհատ հաճոյանալուց չի շահում ոչ ոք, բացի նրանցից, ովքեր պատրաստ են շահագործել ձեզ: Այս սովորությունը կտրում է մեզ մեր իրական էությունից, խլում է էներգիան և զրկում մեզ լիարժեք հոգատարությունից սեփական անձի հանդեպ: Ուրիշներին հարմարվելու համար կեղծ դիմակներ կրելով՝ մենք կորցնում ենք մեր ինքնությունը:
Վստահ եղեք՝ այն, թե ով եք դուք և ինչ եք զգում կամ ցանկանում, միանգամայն նորմալ և ընդունելի է: Դուք պարտավոր չեք փոխվել մեկ ուրիշի հավանությանն արժանանալու համար: Մերժումը չի նվազեցնում ձեր արժեքը. այն պարզապես խոսում է դիմացինի նախասիրությունների մասին: Սեփական ես-ը հարգելը եսասիրություն չէ. դա ինքնախնամքի և ինքնասիրության դրսևորում է:
7. Ապրեք գիտակցված (եղեք ներկա)
Մեզանից շատերն ապրում են մեխանիկորեն՝ կորցնելով ներկա պահի բերկրանքը: Այս անգիտակից վիճակն ավելի է խորանում ժամանակակից տեխնոլոգիաների պատճառով: Մենք այնքան ենք կլանված սոցցանցերով, որ չենք նկատում կյանքի պարզ հաճույքները՝ թռչունների երգը, երկնքի գույնը, անկեղծ ժպիտը կամ համեղ սուրճի բույրը: Նյարդաբանական հետազոտությունները հաստատում են, որ գիտակցվածությունը օգնում է կարգավորել էմոցիաները և նվազեցնել սթրեսը:
Ներկա պահի և շրջապատի հանդեպ ուշադիր լինելը կենսական է կյանքի յուրաքանչյուր ակնթարթը վայելելու համար: Օրական գոնե մի քանի ժամ անջատվեք վիրտուալ աշխարհից, վայելեք բնությունը և լիովին տրվեք այն մարդկանց հետ շփմանը, ովքեր այդ պահին ձեր կողքին են:
Եթե դժվարանում եք, փորձեք օրագիր պահել և գրի առնել օրվա ընթացքում նկատած գեղեցիկ մանրուքները: Գիտակցված ապրելը հմտություն է, որը մշտական կիրառում է պահանջում, բայց այն աննկարագրելիորեն հարստացնում է կյանքը:
8. Ձևավորեք երախտագիտության և առատության մտածելակերպի ցմահ սովորություն
Երախտապարտ լինելը չպետք է սահմանափակվի միայն տոներով. այն պետք է դառնա ապրելակերպ: Դիտարկեք երախտագիտությունը որպես գիտակցվածության անբաժան մաս և ամենօրյա սովորություն: Այն սովորեցնում է գնահատել այն ամենը, ինչն ընդունում եք որպես սովորական երևույթ՝ սկսած տեսնելու և քայլելու կարողությունից, վերջացրած լավ աշխատանքով, կրթությամբ և հավատարիմ ընկերներով:
Անկախ նրանից՝ դժվար ժամանակներ եք ապրում, թե երանելի, օգտակար է գրառումներ անել երախտագիտության օրագրում: Հիշեք՝ այն, ինչ դուք ունեք այսօր, հնարավոր է մեկ ուրիշի ամենամեծ երազանքն է:
9. Ձեր դրական ներդրումն ունեցեք այն աշխարհում, որտեղ ապրում եք
Հիշո՞ւմ եք ձեր յուրահատուկ տաղանդների մասին: Դրանք բացահայտելու լավագույն շարժառիթներից մեկն ուրիշներին օգնելն է: Դուք այս մեծ աշխարհի մի մասն եք: Կամավորություն, ակտիվիզմ, ուսուցում թե գիտություն. տալու և օգտակար լինելու անթիվ եղանակներ կան: Ներդրեք ձեր ժամանակն ու էներգիան այն նախագծերում, որոնք իսկապես հոգեհարազատ են ձեզ:
Ձեր գոյությունն իմաստ ունի, և այդ իմաստն այս աշխարհն ավելի լավը դարձնելու մեջ է: Որքան շատ սիրեք ու հոգ տանեք ձեր մասին, այնքան ավելի շատ դրական էներգիա և սեր կունենաք ուրիշներին փոխանցելու համար: Ընդունեք ձեր առաքելությունն ու փոխեք աշխարհը:
10. Հարգեք և ընդունեք ձեր զգացմունքները. բոլորը՝ առանց բացառության
Որպես մարդ, ով համարվում է գերզգայուն անձնավորություն, ես գիտեմ, թե որքան դժվար է պահպանել հույզերը մի աշխարհում, որն աստիճանաբար անտարբեր է դառնում անկեղծ զգացմունքների նկատմամբ: Այնուամենայնիվ, սա ինքնախնամքի թերևս ամենակարևոր կանոնն է: Եթե դուք չհարգեք ձեր ապրումները, ուրիշներին թույլ կտաք արժեզրկել դրանք՝ դրանով իսկ ճանապարհ հարթելով թունավոր մարդկանց համար:
Այդպես դուք խոցելի կդառնաք մանիպուլյացիաների և շահագործման հանդեպ ու կհամակերպվեք վատ վերաբերմունքի հետ՝ կարծելով, թե ձեր զգացմունքները կարևոր չեն: Բայց դրանք չափազանց կարևոր են: Դուք ապրում եք ձեր հույզերով ամեն օր, ուստի կենսականորեն անհրաժեշտ է սովորել հարգել դրանք:
Ընդունեք ձեր յուրաքանչյուր հույզ, անգամ եթե այն թվում է «սխալ» կամ անտեղի: Զգացմունքները պարտադիր չէ, որ տրամաբանական լինեն. դրանք ազդանշաններ են, որոնք հուշում են ձեր վիճակի և մտքերի մասին: Ձեր զգացմունքներն ընդունել՝ նշանակում է ասել ինքներդ ձեզ. «Նորմալ է, որ ես սա եմ զգում: Այս հույզն ինձ ինչ-որ բան է հուշում: Այժմ ես կարող եմ որոշել, թե ինչպես արձագանքել դրան»:
Պարտադիր չէ որոշումներ կայացնել բացառապես հույզերի հիման վրա, բայց հարաբերություններ և նպատակներ կառուցելիս դրանք անպայման պետք է հաշվի առնել: Հարգեք ձեր զգացմունքները, և դրանով իսկ կհարգեք ինքներդ ձեզ:
Գրանցվիր մեր 
