Որոշ մարդիկ առանց դժվարության պատմում են իրենց ապրումների, ծրագրերի ու զգացմունքների մասին։ Մյուսները, հակառակը, նախընտրում են անձնականը պահել իրենց մեջ և ոչ բոլորին վստահել իրենց գաղտնիքները։ Աստղագուշակության համաձայն՝ կենդանակերպի ամենագաղտնապահ նշաններն են Կարիճը, Այծեղջյուրը, Ձկները, Կույսը և Ջրհոսը։
Սակայն նրանց գաղտնապահության պատճառները տարբեր են։ Ոմանք չեն ցանկանում ցույց տալ իրենց թույլ կողմերը, մյուսները փորձում են պահպանել անկախությունը, իսկ ոմանք էլ պարզապես չեն սիրում, երբ ուրիշները չափազանց խորն են ներխուժում իրենց անձնական կյանք։
♏ Կարիճ
Կարիճը կենդանակերպի ամենախորհրդավոր նշաններից մեկն է համարվում։ Աստղագուշակները նրան նկարագրում են որպես ուշադիր, խոր զգացմունքներ ունեցող և մարդկանց հետ հարաբերություններում զգուշավոր մարդու։ Նա կարող է ժամերով լսել զրուցակցին, տեղին հարցեր տալ, նկատել մանրուքներ, որոնք վրիպում են մյուսների աչքից, բայց այդ ընթացքում գրեթե ոչինչ չպատմել իր մասին։
Կարիճը մարդկանց միանգամից չի վստահում։ Նախքան որևէ մեկի առաջ սիրտը բացելը՝ նա փորձում է լավ ճանաչել այդ մարդուն, հետևում է նրա պահվածքին և հասկանում՝ կարելի՞ է արդյոք նրան վստահել։ Նույնիսկ ամենամտերիմ մարդկանց Կարիճը միշտ չէ, որ պատմում է իր բոլոր ապրումների մասին։ Նա հատկապես խուսափում է խոսել ցավոտ հիշողություններից, անձնական հարաբերություններից և ապագայի ծրագրերից։
Սակայն Կարիճի լռությունը միշտ չէ, որ անվստահության նշան է։ Երբեմն նա պարզապես ցանկանում է ինքնուրույն հասկանալ, թե ինչ է կատարվում իր ներսում՝ առանց սեփական ապրումները բոլորի հետ քննարկելու։ Միևնույն ժամանակ, աստղագուշակության համաձայն, Կարիճը կարողանում է նաև ուրիշների գաղտնիքները պահել, հատկապես եթե վստահում և հարգում է այդ մարդկանց։
♑ Այծեղջյուր
Առաջին հայացքից Այծեղջյուրը կարող է բավականին բաց ու անմիջական մարդու տպավորություն թողնել։ Նա խոհեմ է, հետևողական և սովորաբար սիրում է խոսել հստակ ու առանց ավելորդությունների։ Սակայն նրա զուսպ պահվածքի հետևում հաճախ այնպիսի ապրումներ են թաքնված, որոնց մասին շրջապատը նույնիսկ չի էլ կասկածում։
Աստղագուշակության մեջ Այծեղջյուրին բնորոշ են համարում ինքնատիրապետումը, պատասխանատվության զգացումը և կայունության ձգտումը։ Նա չի սիրում ցույց տալ, որ շփոթված է, դժվարությունների մասին բողոքել կամ քիչ ծանոթ մարդկանց հետ քննարկել անձնական խնդիրները։ Այծեղջյուրը նախընտրում է նախ ինքնուրույն լուծել խնդիրը և միայն հետո, երբ ամեն ինչ արդեն անցյալում է, պատմել կատարվածի մասին։
Նա հատկապես գաղտնապահ է աշխատանքի, ֆինանսների և ապագայի մեծ ծրագրերի հարցերում։ Այծեղջյուրը կարող է երկար ժամանակ ոչ մեկին չպատմել իր մտադրությունների մասին, քանի դեռ համոզված չէ, որ կկարողանա դրանք իրականացնել։
Այս զգուշավորությունն օգնում է նրան ավելի վստահ զգալ, բայց երբեմն շրջապատում սառնության տպավորություն է ստեղծում։ Իրականում նրա լռության պատճառը կարող է ոչ թե զգացմունքների բացակայությունը լինել, այլ այն, որ նա պարզապես չի ցանկանում ուրիշներին ցույց տալ իր խոցելի կողմերը։
♓ Ձկներ
Ի տարբերություն Կարիճի և Այծեղջյուրի՝ Ձկների գաղտնապահությունը աստղագուշակները հիմնականում կապում են նրանց զգայուն բնավորության և հարուստ ներաշխարհի հետ։ Համարվում է, որ այս նշանի ներկայացուցիչներն ունեն վառ երևակայություն, զգացմունքային են և հաճախ շատ խորն են ապրում անգամ այն իրադարձությունները, որոնց ուրիշները կարող են առանձնապես ուշադրություն չդարձնել։
Ձկները կարող են լինել բարեհամբույր, շփվող և առօրյա զրույցներում բավականին անկեղծ։ Սակայն երբ խոսքը հասնում է իրենց ամենանվիրական զգացմունքներին, նրանք հաճախ նախընտրում են լռել։ Երբեմն պարզապես դժվարանում են բառերով արտահայտել այն, ինչ զգում են։ Որոշ ապրումներ նրանց համար այնքան անձնական կամ բարդ են, որ ավելի հեշտ է դրանք պահել իրենց մեջ։ Իսկ դժվար պահերին Ձկները երբեմն նախընտրում են առանձնանալ և մենակ հաղթահարել իրենց ապրումները, քան բացատրել շրջապատին, թե ինչ է իրենց հետ կատարվում։
Աստղագուշակները Ձկներին վերագրում են նաև վեճերից ու լարված իրավիճակներից խուսափելու ցանկություն։ Նրանք կարող են չարտահայտել իրենց դժգոհությունը միայն այն պատճառով, որ չեն ուզում վիրավորել մտերիմ մարդուն կամ ավելի սրել իրավիճակը։
Սակայն զգացմունքները մշտապես թաքցնելը կարող է թյուրըմբռնումների պատճառ դառնալ։ Այդ պատճառով Ձկների համար հատկապես կարևոր է այնպիսի հարաբերություններ ունենալը, որտեղ նրանք կարող են անկեղծ խոսել իրենց զգացմունքների մասին՝ չվախենալով, որ իրենց կդատապարտեն կամ սխալ կհասկանան։
♍ Կույս
Կույսին սովորաբար չեն դասում կենդանակերպի խորհրդավոր նշանների շարքին։ Սակայն դա չի նշանակում, թե նա գաղտնապահ չէ։ Պարզապես նրա դեպքում այդ հատկությունն այլ կերպ է արտահայտվում։ Աստղագուշակության մեջ Կույսին բնորոշ են համարում վերլուծական մտածողությունը, գործնական մոտեցումն ու մանրուքների նկատմամբ ուշադրությունը։ Նա սիրում է ամեն ինչ նախ լավ ծանրութեթև անել և միայն հետո իր մտքերով կիսվել ուրիշների հետ։
Կույսը կարող է հանգիստ ու մանրամասն խոսել աշխատանքի, կենցաղային հոգսերի կամ առօրյա իրադարձությունների մասին, բայց երբ խոսքը վերաբերում է սեփական վախերին, թուլություններին ու կասկածներին, նախընտրում է լռել։ Համարվում է, որ այս նշանի ներկայացուցիչները փորձում են վերահսկել իրենց խոսքերն ու գործողությունները։ Այդ պատճառով նրանք հազվադեպ են պահի ազդեցության տակ անկեղծանում։ Ավելի հաճախ Կույսը նախ մտածում է՝ ինչ ասել, ինչպես ասել և արդյոք ընդհանրապես արժե՞ այդ մասին խոսել։
Իր անհանգստությունը Կույսը հաճախ թաքցնում է զբաղվածության հետևում։ Օրինակ՝ փոխանակ պատմելու, թե ինչն է իրեն մտահոգում, նա կարող է ամբողջությամբ կենտրոնանալ խնդիրը լուծելու վրա, սկսել տունը կարգի բերել կամ մանրամասն ծրագիր կազմել։
Շրջապատին երբեմն թվում է, թե Կույսին ոչինչ չի անհանգստացնում։ Մինչդեռ իրականում նա կարող է շարունակ մտովի վերադառնալ նույն խնդրին, վերլուծել կատարվածն ու հնարավոր լուծումներ փնտրել։
Սակայն նման զսպվածությունը միշտ չէ, որ անվստահություն է նշանակում։ Կույսի համար պարզապես կարևոր է պահպանել անձնական սահմանները և վստահ լինել, որ իր խոսքերը սխալ չեն հասկանա կամ այլ կերպ չեն մեկնաբանի։
♒ Ջրհոս
Ջրհոսը կարող է շատ շփվող լինել, հեշտությամբ նոր ծանոթություններ հաստատել և հաճույքով զրուցել ամենատարբեր թեմաներից։ Բայց շփվող լինելը դեռ չի նշանակում, թե մարդը պատրաստ է բոլորի առաջ բացել իր հոգին։ Աստղագուշակության մեջ Ջրհոսին բնորոշ են համարում անկախությունը, ինքնուրույն մտածողությունը և սեփական ընտրության ազատությունը պահպանելու ձգտումը։
Ջրհոսը չի սիրում, երբ իրեն ստիպում են անկեղծանալ կամ փորձում են վերահսկել նրա որոշումները։ Նա կարող է չպատմել իր անձնական ծրագրերի մասին, հարկ չհամարել բացատրել յուրաքանչյուր քայլը և խուսափել չափազանց զգացմունքային զրույցներից։ Նրա համար կարևոր է ունենալ սեփական անձնական տարածքը, որտեղ ստիպված չի լինի անընդհատ արդարանալ կամ ապրել ուրիշների սպասելիքներով։
Երբեմն նման պահվածքը կարող է սառնության կամ անտարբերության տպավորություն թողնել։ Սակայն դա ամենևին չի նշանակում, թե Ջրհոսը չի գնահատում հարաբերությունները կամ չի կարող խորապես կապված լինել մեկ այլ մարդու հետ։ Պարզապես նա նախընտրում է իր զգացմունքներն արտահայտել ոչ թե անվերջ խոստովանություններով, այլ գործերով, աջակցությամբ և դիմացինի ազատությունը հարգելով։
Գրանցվիր մեր 
